Read Ninia Yali MAZMUR 58 Bible Online

MAZMUR 58 - Ninia Yali bible

MAZMUR 58

¹Ap homi en suni wilibi folug enebe ambine urukmu melal-enepuk on fahet, suni unggul unuk: Unggul waruk fug, ulug uruk on ai fene felaleg on. Daud Asuni.

²Yaho hit ap henalong wereg ma[30] melal-enepuk kahep on, hiren wene kong-duruk kahep on etma re katukdoho neg kong-duruk kahep a? Hiren ap homi enawene bilinggoho ayo wit-enepuk kwit de, bekitdoho neg duruk kahep a?

³Eleg, o suma fam hiren siag on neg abug baleheg, ne henebi fam enobam haro ale neg deheg, duruk kahep.

⁴Ap siag duruk on de it enebe enesingasi enahummu wereg latswa huli en enebe mundoho nong-hong uswa, ne ite eneb endag-atswa huli en anggere enele seiale neg uruk katswa

⁵It enebe re kisu aeg olok en senggel enepuk on aeg kamol wereg on anyo hag deg, ne kisu ap homi enowatuk on wangdeg lit bok wereg hag iren enesanggo lare fahat-dauk.

⁶Iren de ap hwal enap mun enggat enap enele oho, ite it hein og-angge fam hagdoho enele matuk kwit uruk mun hebel-bebel deg enap enele ohore iren enele holduk fug.

⁷Allah nakni, it eneg etma sobo esakin, TUHAN nakni, no singa ket sauwe on aeg dum hag on etma hen esakin.

⁸Ik ahe lahalug firitog atuk anyo hagdoho aheg, dog angge ambiang mundoho oum disi on hagdoho aheg dukwag.

⁹It aire no sohop anggen owerulug ililue hag atuk on anyo hagdoho amag, omalik ket endag-atuk on o seleg il ha fug angge waratuk anyo hagdoho amag.

¹⁰Alog angge owan enggela hesiloho wilipuk kwit log am fug angge weregman, hol en enggelangge iringgig on hagdoho firoho hwik-esauk anyo hagdoho amag, it enebe owan fubi debouk fugmen de enebe mundoho eleg amag.

¹¹Ap siag on unggum enobam forukmu re ap homi bekitdoho neg duruk on de enahayeg hauk, ne ap homi wene melaleg sahaloho folug duruk on enamep fam de it ai eneyog omatuk.

¹²Ap homi en uruk kwit de, “Sukhag ap fano on onggo hwelauk, demdoho At Allah o kwenangma suma siag duruk on enawene bilonggoho ayo wituk on wereg.” Uruk kamuhup.