Read Ninia Yali MAZMUR 59 Bible Online

MAZMUR 59 - Ninia Yali bible

MAZMUR 59

¹ Ap homi en suni wilibi folug enebe ambine urukmu melal-enepuk on fahet, suni unggul unuk: Unggul waruk fug ulug felaleg on ai fene uruk on. At Daud Asuni, Saul en Daud ebe warikoho obam wirigmu kahaleg lamuk ulug ap miming-enepfagma wereg ma ebag asuni.

²Nakni Allah, it ap homi naselei on etma fam en an nahap wendat nabin, it ap homi an nowarukoho waharuk on fam en nalong bal nabin.

³It ap homi siag duruk on etma fam en an loloho wilibi nobahain, it ap watni etma enenggik fam en an lili nobahain.

⁴It ap aire an nowarukoho re di angge su angge fang dehesa angge esakin, ap mun enaharoro enap etmano mun seberehesareg an nowarukoho duruk. An den siag dirihik mu hagdoho duruk, TUHAN nakni, ite an den wene melaleg eke dahan debelug dirihik mu hagdoho duruk.

⁵It mundoho fik-fouk dehesareg buroho wamukoho duruk etma re, an den nasiag dirihik fam ulug oho fug.

⁶Nakni Allah Hebe Mun Leho welahen on en inatlug let nabin o, It ap homi Israel on enakni Allah nakni, Hat hamu en oho hil esakin. Ap homi hwenaroho duruk on etma re lohon henda mel esa fug, hebe holuk atlug de it ap enunggul unuk enunggul unuk etma unggum og-esakin.

⁷O hupmu atil lauk em de it etmano nikangge sombandoho watlug de, o kota kwe etmano maseril noruk kwit de mene en hagdoho ngoluril noruk.

⁸Iren de bale fouk fug angge hundig-handig bulip enebeheg, maben on hag debeseheg, duruk; iren enele uruk on etma re karog maho on olok hag deg, iren boruk kwit ap en eke fubi nenobaharuk fug boruk.

⁹Ai famen de TUHAN nakni, Haren de it unda yag-enepuk kahen, it enunggul unuk mundoho etma re Haren neg bulip-balap enepuk kahen.

¹⁰An nebe nomamne re Hat neg welahenma, an den Hat hobam neg nenda ebereg welahi, Nakni Allah Hat de an nebe o oko domog aik laukmu hag deg lahen.

¹¹An nakni Allah ai enda fano en atlug de, an nakit waharuk, ne Aren de it naselei on etmano enalong elehap deberukmu inil howag ulug nobaharuk.

¹²It ap homi an nunggul unuk on en enepeleg am no re, TUHAN nakni Haren mundoho enowaruk fug. Nakni TUHAN Haren nit nenalong bal-nenusug lahen on, it aire Hat halong fam it enalong elehapdoho feselug enebe deg bog esakin.

¹³It enembilik fam en de siag on neg uruk, ite enele seiale neg uruk kwit hururung enepukmu re it enewonog atuk on ai fam neg luhut atuk kamag.

¹⁴Nakni Allah Hat hahummu holok anyo fam it enebe elehapdoho fesein, it enebere mundoho elehap debeseiyug. Ai fam de At Allah en ap homi Israel on melal-enepuk kwit wereg ulug ap homi domog en enoluk amuhup, ne Aren melal-enepuk karuhu on aire o ap homi o kwenangma suma abirangge sahareg wereg on ai fahet.

¹⁵O hupmu atil lauk em de it etmano nikangge sambondoho watlug, o kota kwe etmano maseril noruk kwit de mene en hagdoho ngoluril lauk.

¹⁶It enebe re di kwe su kwe nauk hera re dag watil lalug, homo debeseruk eleg halug de kouwaruruk kwit wereg.

¹⁷Famen an neg de Hat homamne welahen ale anyo fahet suni uruk kahi; o hubet bul anggere Haren henda hundig napuk kahen ale fahet mel, ne dipdoho neg napuk kahen ale fahet mel, an den nele fano fam hundig-handig suni uruk kahi. Hat de an nobam anggin on atuk li nalong baloho fahat nusug lahen on deg ma re, An nebe o oko lauk hag de Hat hobam neg lauk kahi.

¹⁸Nakni Allah nenda hundig hapuk kahi on, Hat de an nalong bal-napuk on welahen; nakni Allah, an nomamne kwelap napuk kahen on welahen mare anden Hat hobahet suni motdeg suni neg yig-hapuk kahi.