Read Ninia Yali MAZMUR 60 Bible Online

MAZMUR 60 - Ninia Yali bible

MAZMUR 60

¹Ap homi en suni wilibi folug enebe ambine urukmu melal-enepuk on fahet, suni unggul unuk: Bunga Bakung eneg angge, uruk on ai fene felaleg aleroho, At Daud en mamul-enepuk katfag asuni.

² Aren ap homi o Aram-Mesopotamia on mel, ap homi Aram-Zoba on mel enobam weim yabik lebagdeg, ne, at Yoab en de o Lembah Asin etman ap homi Edom on enebe 12.000 en enowatlug watfagma suni ebag on.

³Nakni Allah, Haren de nunggwelug nit hambol yig-nesehen,[31] ne nunggwelug nit nenalong elehapdoho nenobahaukwag ulug debesehen, Haren nit nenobam mundoho holok nenobahakenma, ketiare nit deg lahe ale su Haren hwaloho nenobahain.

⁴Haren de kwenang suno lang-fang esehenma mundoho hareldil laha; kwenang mundoho elek duruk en de halet deg on ai buhun din.

⁵Nit Hat homaliki anyo angging-fanggin mun anggolo on howag ulug nenobaharihin; airoho nenobaharihin mu re, ap ik siomo duruk on nalug dal-dal anggeril lauk hag nit dalik-dalog anggeril lauk kahe.

⁶It ap homi Hat hawene melaleg furebelug duruk on omano, it enebe lil amag ulug, Haren it enelukap debeserihin.

⁷ Hat homamne fam nit nenahap wendat nenebin, ne niren somban uruk kahe on ai nenele holoho onggo hweag-nesakin; it ap homi Haren henda hundig enepuk kahen on etma enahap wendat-enebukwag ulug enebin.

⁸At Allah ebe wereg ma mun eneg ma etmano en Aren uruk kwit de, “An mundoho nahemet hauk kwit kwenang o Sikhem kwenang anyo yohwan dikohon lahi; o Sukot Donggo aire enenggik wal hauk anyo hag wal hahuk.

⁹Gilead nim Manasye nim de an nonggwareg nangge on, Efraim de an nunggul topi baja fam hilinggigmu bug deg lahi on, ne Yehuda re An nebe raja unduhuk lit melal-enepuk kahimu etma nandomuk hagdoho.

¹⁰Famen de at Moab neg de An neyog horuruk kahimu, it Filistea on fam en An nalong atihik ai fam nawonog atuk kahi. Ne, at Edom fam de at ebe An nonggwareg nanggwe eneg deg welamag ulug, An den neyog sepatu obam hwik hahuk,” Ulug isi.

¹¹Ap sa en an og-naplug o Edom etma nobahaik lahu? Ap sa en o fak lehet mun omamneroho ohoma ai hondoko nobahaik lahu?

¹²Nenakni Allah, Hat de nit ninim lauk ale herim a? Hat de nit nenautsi tentara inim seberoho lauk ale herim a?

¹³Ap homi en let nenebuk alereg on aire we alemaroho hag deg ma re, it neneselei on etma fam en nit let nenebin.

¹⁴Nit Allah nininim halug de nenambong siseroho dehe ha alereg, ne Aren neg nit nenaselei on enalong elehapdoho feseruk.