Read Ninia Yali MAZMUR 61 Bible Online

MAZMUR 61 - Ninia Yali bible

MAZMUR 61

¹Ap homi en suni wilibi folug binggong kecapi watuk kwit enebe ambine urukmu melal-enepuk on fahet, At Daud asuni.

²Nakni Allah an den nele hwi hapuk kahi on su hesanggo holin, an den somban uruk kahi on ai fubi nobahain.

³An nenda mundoho siag aha ma nobam welahimu en nim nebe yatdoho wereg lit, nele hwi hapuk kahi. Haren neg an hondog naplug obale youk eleg deg ma, obale mun lehoma an den mel lahaki fug ha alereg ma etma oko nobahaik lahun.

⁴An nebe nalong baleg angge re Hat neg welahen, ne it naselei on en nowarukoho durukmu nenda hambuk angge re Hat neg welahen.

⁵Nakni Allah, an den nele sali hweag-hitihik on anyo Hat hesanggo holdihin deg, ap wene melaleg furebelug duruk on enengge enabinggi angge anyo Haren og-nitihin mu re,

⁶Hat hahwerabul en hag an sebe nusugmu nakol eleg angge bik-bok welaruhuk en de, an nebe noluk welaruhuk huli etma Hat Hobam sabo wirigmu etma bok aik kulug welaruhuk boruk kahi.

⁷At raja ebe umur yatdoho wereg ma, at ebe oluk lahaik-wambuk etma welamag.

⁸Nakni Allah, raja ai Haren neg momaloho ferihin on deg ma, Hat henda hundig nenebeheg, dipdoho neg deheg, duruk kahen on anyo fam along baloho foroho lamin, Airoho wereg ma li mundoho-mundoho etma aren neg melal-enepuk kwit welaruhu.

⁹Ai fam de nukoho eke salim-eke salim waharuk kweleg an den nele sali hweag-hitihik on anyo dip-debeheg, ne Hat hobahet suni motdeg suni eheg, duruk karuhuk.