Read Ninia Yali MAZMUR 62 Bible Online

MAZMUR 62 - Ninia Yali bible

MAZMUR 62

¹Ap homi en suni wilibi folug enebe ambine urukmu melal-enepuk on fahet, suni unggul unuk Yedutun ai fene, Daud asuni.

²An nebe nenda mun bik-bokdoho wereg lit Allah nangno hauk kahi, At fam en neg an nahap wendareg wereg.

³Aren neg an nalong baloho fahat nusug laheg, nahap wendare nobahakeg, duruk; At de an nibil atuk on deg ma an nebe elek-felek ihi ha fug alereg.

⁴Ap misig eke o obahat youruruk on hag deg kweleg, ne elehet mun hwayoruruk on hag atuk kweleg, hit abirangge en de ke huli ebe watul ulug duruk kamluhup?

⁵Hiren de at ebe yabuk leho on wereg ai fam en sebeloho belabe foul ulug duruk kahep. Hit de seiale uruk ale neg henembono; Hit henembilik fam en de ap homi fanoap debeseruk kahep famen de henendama en de hururung enepuk kahep.

⁶Nebe nenda mun bik-bok wereg lit At Allah nangno hauk kahi, At fam en neg an nahap wendareg wereg.

⁷Aren neg an nalong baloho fahat nusug laheg, nahap wendare nobahakeg, duruk; At de an nibil atuk on deg ma re an nebe elek-felek ihi ha fug alereg.

⁸At aire Allah an nahap wendare nobahakeg, leho nobahakeg, duruk on anyo, Mun omamneroho an nalong bale nobahakeg, an nibil aheg, duruk on de we At neg.

⁹Yaho, hit an nunggul unuk on suma, nukoho hundig-handig At Allah ai fam neg henenda obam ebereg welamek; At fam neg nit nenalong baleg welahema re, hit henendama boruk kahep ale etma apma buleloho lahabe foruk kamek.

¹⁰Ap homi re sat misiham leg hauk on hag welahe, hweap lohon et doron et de we higitdoho neg deg lahe. Ne, enebe enanggin wal-esaman de mun ahut hereg lam alereg, san misiham leg hauk on de anggin wereg hag famen de it enebe re mun fi-fareg angge deg lam alereg.

¹¹Hit henenggik omamne fam ap homi sebel-unusug lit enangge hwelauk kahep on etma fam henenda ebereg welam fug, ne ap homi enengge del-dauk kahep on etma fam henenda dipdeg lam fug. Ne, henengge di on su on henenggik wereg atuk halug famen oho re hit henenda ai fam neg hetdoho kwelabeg lam fug.

¹²Birenam-henahanam hagdoho At Allah en urukmu nesanggo holdihik alere, ap homi enalong on wereg ale aire we At fam en neg,

¹³ ne Aren de hundig-handig enda hundig enepuk kwit neg wereg. TUHAN nakni, Haren de ap homi enobabut duruk ale higitdoho, onggo ambiangma debeseruk kahen.