Read Ninia Yali MAZMUR 65 Bible Online

MAZMUR 65 - Ninia Yali bible

MAZMUR 65

¹Ap homi en suni wilibi folug enebe ambine urukmu melal-enepuk on fahet, Daud asuni. Suni.

²Nenakni Allah, niren o Sion fam etman de sukaleroho Hat mot-habehe ha alereg, ne niren abug hweag-hutuhuk on etmano dip-debehe ha alereg.

³We Haren neg niren somban uruk kahe on etmano onggo hweag-nesauk kahenma re; ap homi mundoho re siag neg dusama re we Hat hakit neg waharuk.

⁴An nasiag de mun anggin humon deg famen de, Haren neg hapelehapdoho nobaharihin.

⁵Ap Haren momaldihin deg Hat hobam etma welamag ulug wol dirihin on aire, ahayeg hauk kamag. Nit de Hat hobam, Hat hebe welahenma mun eneg horeg ma etman, Haren mun fano angge fam neg homo nenobaharuk karuhun.

⁶Haren nit nenalongap nenobaharuk kahen ai fam nit onggo hweag-nesauk kahen, Haren mun along wereg on neg duruk kwit nit nenahap wendat nenepuk kahen! Ap homi di enunggul unuk su enunggul unuk mundoho, ik laut yenggeleg on ambiangma yit-yatma etma wereg on et mundoho enenda ebereg anggere we Hat neg welahen.

⁷Hat homamne fam ne Hat halong humon welahen ale eneg amag ulug de dom-dom unduhuk ferihin.

⁸Ik laut ahum ele fururukmu inim, ne ahum funag-lenggag angge durukmu inim, Haren neg hambuge foruk kahen, ne di ap su ap enunggul-enunggul unuk wereg etmano enele neg saha-faha urukmu oho re Haren neg bokap debeseruk kahen.

⁹Haren mun fulu-bolan on etma duruk kahen ale inil halug de, di ap homi su ap homi o kwenangma suma wereg on anyo enakoldoho halong bolug leho hobaharuk. O kwenangma suma abirangge ambiang foman de onggombi foma fam etma mundoho, enawonog hauk kwit enahayeg dukwag ulug Haren debeseruk kahen.

¹⁰Kwenang aire Haren hwalduk kwit, Haren neg obam osit belabe feik waharuk kahen, ne Haren neg hesili foruk kahenma anggen hum-hamdoho yihiruk. Ik wirig atuk on etma Haren neg ik en hoporeberuk kahen, it fahet enasiburu Haren neg fouk debeseruk kahen, we airoho neg Haren fouk debeseruk kahen.

¹¹Yabuk habulig kwe etmano re Haren ik hwaloho wirihik feik lauk kahen, ne kwenang damulig eleg angge wereg on fam etma Haren neg ik oeap deberuk kahen. Haren de yabuk kwe anyo osit fam kwesal-esalug de, a yaho on anyo fanoroho wilibukwag ulug Haren neg fanoap deberuk kahen.

¹²Hat henda fano en di tahun su tahun anggen yihig balduk on fouk deberuk kahen, ne Hat hebe waharuk kahenma etma re di angge su angge dungdoho neg wereg.

¹³Leimu etma re kambing, domba inim en neg sahareg, duk-duk etma mundoho re enahayeg en duruk.

¹⁴Walma enggelangge wilibigmu etma re domba eneg sahareg ma re, enggelangge domba oruk en sebeleg hag deg, ne donggo kwe re gandum yaho on en mun sahareg wereg. Ap homi mundoho en de enawonog atuk kwit, suni enahayeg fam uruk.