Read Ninia Yali MAZMUR 66 Bible Online

MAZMUR 66 - Ninia Yali bible

MAZMUR 66

¹Ap homi en suni wilibi folug enebe ambine urukmu melal-enepuk on fahet, suni misig felaleg on. Yaho ap homi o kwenangma suma welahep on abirangge en At Allah obahet henawonog diek!

²Suni uruk kwit At unuk neg anggiluk debeyek, suni fam mot-duruk kwit At neg leho feiyek.

³Hiren Allah fam uruk kwit de, “Haren duruk kahen ale etma re mun hanggiluk wereg ale neg duruk kahen! Hat homamne re mun humdeg lahenma, It Haselei on de enakol en Hat hapma sebe uruk.

⁴Ap homi o kwenangma suma wereg on mundoho re Hat hapma sebe ik watlug, iren suni uruk kwit Hat hunuk neg mot-hapuk,” ulug iyug.

⁵Hit henebe watlug At Allah en duruk ale etma hinil fu ha manik, ap homi enesahalimu Aren di angge su angge waldoho febag on etma re mun nowag elek deg ale debebag.

⁶ Ik laut yenggeleg latfag mu anyo ahamdoho re kwenang iringgig on hag debebagma re, nit nenombasi eneyog sobit-sobit baloho nindig-atfag. Aren airoho debag ai fam de nit nenahayeg duruk kahe.

⁷At ebe re andung-dang wereg lit li mundoho-mundoho etma melal-enepuk karuhu, Ap wene owag lahalduk enap etma At olohotman eke winik-wonok uk no ulug de, Aren ap homi enunggul unuk-enunggul unuk etmano kahal-enusug wereg.

⁸Yaho, hit ap homi di ap su ap welahep on etman nit nenakni Allah ai neg mot-diek, At obam de motdeg ale neg iek!

⁹Aren de nit nenowag dahan-fahan wat-dowag ulug obog nesebag fug, ite nit abirangge nenoluk welamag ulug kahal-nenusug latfag.

¹⁰Nakni Allah, ap en no perak ebe wirik on wakoho indokman aling wambukwag ulug weratuk anyo hag, we Haren neg nit nenobabut mundoho wal-nesauihin.

¹¹Ap homi en kwenang habuligmu nit kobogdoho wambukwag obog nesauihin, ne Haren de nit nenobam anggin humon nenobaharihin.

¹²It neneselei on en nit sobit-sabat nesowag ulug fotog nesauihin; ne nit de ik fu waharuk kweleg mel, indok nauk kweleg mel, baloho lauk katuhuk. Famen de ketia Haren nit og-neneplug, di angge su angge mun hoporoho wereg ma suma nenobahaik waharihin.

¹³An den de Hat hobahet ferihik on anyo Hat hobam etma yal angge yal hirik waharuk karuhuk, ne an den abug hweag-hitihik on,

¹⁴an nebe fam anggindoho wereg lit abug wat-hitihik on anyo re mundoho dipdoho neg deberuk.

¹⁵Hat hobahet de an den wam waroho yalduk on ulug eneko wereg owam anyo mel, kambing, domba mel, sapi yohombuk on mel, og-huruhukmu re hobu re bekit bohol fam mon-mon lahaku.

¹⁶Yaho, hit ap homi wene melaleg furebelug duruk kahep on watlug henesanggo holik manik, At Allah en an nobahet disi ale an den dindil hesaroho lahi.

¹⁷An de Aren let-neowag ulug obam nele irihik deg; ketiare At obahet suni motdeg suni neg yig-enepuk kahi.

¹⁸An den siag on duruk ale neg nahayeg hauk nendama wenggelduk kaleman de, dik-demdoho At TUHAN en esanggo hol-naplep fug lit deg.

¹⁹Famen de an den nele heng irihik on anyo At Allah en esanggo holsireg, An nebe fam fubi nobahasi.

²⁰Aren de an den somban irihik on anyo owag oko embesesouk fug angge esanggo hol nabeheg, ne an enda hundig napuk ale bale fouk fug angge deheg, duruk ai fam de an den Allah mot-duruk kahi.