Read Ninia Yali MAZMUR 68 Bible Online

MAZMUR 68 - Ninia Yali bible

MAZMUR 68

¹Ap homi en suni wilibi folug enebe ambine urukmu melal-enepuk on fahet, At Daud asuni.

²At Allah feiyalug inatuk kwit de At aselei on del-fol esauk, it ap homi At fam enerim boruk on de At olohotman heye wilipuk.

³Hobu ahe en furoho baloho eleg atuk anyo hag, At Allah en it enebe muko monde-feseruk. Ne, hendali yale forukmu indok en nunum-nunum eleg atuk anyo hag, ap homi siag neg duruk on oho At Allah olohotman airoho eleg atuk.

⁴Famen de ap homi wene melaleg fam furebelug duruk on de enahayeg en nim-num uruk kwit enahayeg duruk kamuhup, ite Allah il hanim etma enahayeg en enawonog atuk.

⁵At Allah obahet suni iek, At unuk mot-diek, At ebe anggulog emberimmu waharuk on ai fahet kobokwe healoho yariek. At unuk de TUHAN ai — At olohotma etman henahayegdoho neg duruk kamek!

⁶At Allah ebe obam mun eneg on fam wereg on aire, it omalik wetien-soareg on enakni, ne it homi sohwe inibil atuk on anyo.

⁷At Allah en de ap homi enemu inilmu siagdoho wereg on enebe wereg ma fahet og-esauk; Aren de ap homi sabu hetdoho feseruk on etmano loloho wilibi feserukmu it enahayeg hauk. Famen de ap homi At TUHAN ele sahale folug duruk on de, kwenang lei birim-birim urukmu etma welamuhup.

⁸Nenakni Allah, Haren homaliki melal-eneplug lei mun iringgig kwe lauk li em etano re,

⁹ Hat Allah it ap homi Israel on enakni, Allah andom Sinai[32] fam enam atihin on anyo waharukmu atlug de, Hat holohotman kwenang mundoho mil deheg, osit liloho belabik waheg duruk katsi.

¹⁰Haren osit hum hamdoho belabik waharukmu re; Hat hanggwenang mun kelog deg on etmano osit fam obalma buhun-debesi.

¹¹Airoho deberihin mu re Hat homaliki enebe etma kwik laswareg welatswa; Nakni Allah Haren fano ale neg nenepuk kahen anyo fam, Haren ap homi enenggik eleg on hwal-enepuk kwit welahen.

¹²At TUHAN en ele melaloho wilibi feserukmu re, it homi en wene walug lauk kwit:

¹³“Raja mel, ap sehen foroho on esan lohwaleg on mel de mundoho heye lahesa,” ulug walug lauk. Ite suwe merpati en darulug lauk hag lahesa. Ne, it homi olma wereg on etmano en de, it anyo heye lauk kwit enengge embeselug lauk angge, emas, perak mel etmano yohwan-dauk. It enebe humdoho en dog yabik lahesa fug famen de, Allah omaliki omano fil enalong atuk.

¹⁵It Mun Omamne wereg on anyo en it raja etma wereg on omano nit nenenggikmu atuk li em de, lumbiag Dom Salmon fam etmano en wambik waharuk.

¹⁶Dom Basan aire nik andom, duk funureg on humdoho deg andom.

¹⁷Hat hebe duk funureg on humdeg lahenma etman, hil olokdoho Duk Sion[33] At Allah ebe wereg ma ulug momaloho fesimu etma nunggwelug fu hauk kahen? At TUHAN de li mundoho-mundoho etma welaruhu lit deg.

¹⁸At Allah re angge kereta omamne on ebe mun hum-hamdoho fam, andung-dang weregdoho it enesahalimu enam aik waharuk.

¹⁹ Ne, At TUHAN ebe lendima mun lehoma lahaik lauk kwit de; it aselei on sabu hetdeg wereg anyo og-eneplug lahalik lasireg, ap homi enesahalimu etmano en nim, ne it ap homi wene melaleg sahale folug duruk on en inim At TUHAN Allah inim etma welamag ulug, At obahet fousa angge humdoho hwelasi;

²⁰At Allah aire nit nenahap wendat nenepuk on deg ma re, TUHAN ai neg mitdeg motdeg welamag; nukoho di salim su salim nit nenobam anggin on wereg anyo haruruk kwit neg wereg.

²¹Nit nenakni Allah aire, TUHAN nenahap wendat nenepuk on wereg, Aren neg nit waram on famen liloho wilibi nenobaharuk.

²²At Allah en de At aselei on enunggul owag mel, it ap homi siag neg duruk kwit siag anggelegma wereg on mel, demdoho sahal esahu lit deg.

²³At TUHAN en uruk kwit de, “Yaho, hit An nomaliki on, An den hit henaselei on o Basan en og-eneplug wahi, ik laut ahum apma erahamu en sombandoho An den og-eneplug wahi.

²⁴It enemep fam hit heneyog horeheg, ne hit henamene en enamep etma enahum mun homoroho meldang heheg nenggeg, dukwag ulug og-eneplug waharihik.” Isi.

²⁵Nakni Allah, Hat hebe mundoho halong atihindeg walug walinggurukmu ai mundoho inil heausa, an nakni Allah, Raja an melal-napuk on anyo At ebe wereg ma etma feik lauk kwit ulukdoho walug lauk katswa.

²⁶Airoho walug lauk kwit olohotma re it suni uruk on lauk katswa, ne it enembolim de it binggong kecapi watuk on lauk katswa; bul de it hwelani no rebana delduk on lauk katswa; airoho lauk kwit de iren suni ebe diroho uruk katswa:

²⁷“Ap homi Allah omaliki enebe kabogdeg enesahalimu etma Allah motdeg welamag, yaho hit, Yakub ambiangma on etmano mundoho en At TUHAN neg mot-diek!” Ulug il lauk katswa.

²⁸It enunggul unuk Benyamin on aire enebe we dorangge deg ma, it oroholeam lauk katswa, ai en it Yehuda on enowesi kaindeg uluk-mealoho laukmu, it enembolim de it Zebulon on mel it Naftali on mel, enowesi kaindeg lauk katswa.

²⁹At Allah en hit henomamne wereg on fahet henobam heng uruk; Nenakni Allah, Haren nit nenobahet ale dirihin on ai eke nim omamne debein.

³⁰It raja en de Hat hobahet di angge su angge og-humukoho, Hobam wirigmu o Yerusalem walug og-hirik waharuk.

³¹At Mesir no wabime kolom-kolom sahalimu wereg lit olok leiyareg on ai fam hele bererag din. It ap homi enunggul unuk-enunggul unuk angge enomamne hum deg lit, enomaliki nim en no perak hwelaul ulug sobit-sabat esauk on ai bet-enebin. It ap homi enunggul unuk-enunggul unuk wereg on en weim yapuk ale fahet neg enahayeg hauk on etma re, At Allah en buhuloho yin-hun esauk.

³²It Mesir enap enowesi log-log enap anyo re no tembaga walug waharuk; ne it Sudan en de folo-folo Allah akit onggo feik waharuk.

³³Yaho, hit kerajaan etma welahep on mundoho en TUHAN obahet suni iek, TUHAN obahet motdeg suni iek.

³⁴At o indik-endam etma bohol baloho lahasi on ai obahet iek, Holiek! TUHAN ele uruk anggere, ele re mun fulu-bolan aleroho ipuk-delelang duruk.

³⁵At Allah Omamne wereg lit it ap homi Israel on enobahet along wereg on yanderiek, At omamne re bohol huli etma wereg.

³⁶At ebe weregman wilibik waharukmu re, nit nenakni Allah aire mun along-balongdoho deg. Ap homi Israel on enakni Allah ai en de At omaliki fam enomamne og-eseheg, enalongap debeseheg, duruk.