Read Ninia Yali MAZMUR 69 Bible Online

MAZMUR 69 - Ninia Yali bible

MAZMUR 69

¹Ap homi en suni wilibi folug enebe ambine urukmu melal-enepuk on fahet, suni unggul unuk: Bunga Bakung, fene ulug uruk katswa on. At Daud Asuni.

²Nakni Allah, ik mundoho hetag-hetag nanggolobag ma lahaik waha ma, nahap wendat nabin.

³An nebe beiroho sabelep yum duruk ilonggoma yatma erahamu wambik lahimu re, neyog sobi folug inama eke wereg fug. An den ik yenggeleg on ahum mun yaron fam obuk ihimu re, ik ahum funag-lenggag anggeril waharuk kwit sebe neauk.

⁴Airoho deg lit nele hwi-hwi neg uruk men de nebe serabi ko ihi, ne nanggolobag mundoho iring aha. Allah en let nabik wamag ulug nil youreg lit neg weregman de nil mundoho ouk duruk.

⁵ Wene indip eleg kweleg ap homi iren an enerim napuk on de, an noruk nunggulmu wereg hagdoho enebe hum-ham deg. It ap homi enomamne enap en de an nebe elehap nobahaukoho duruk. Iren de enele en dopno neauk kwit dik waharuk. An den di angge su angge del-dihik fug on famen, iren enomamne fam nikangge owag oko feikma ulug hweag-nutuk.

⁶Nakni Allah, an den kwasikdoho dirihik on Hat mundoho holuk deg Hat hilmu re an nasiag eke heraho on wereg fug.

⁷Nakni TUHAN Allah Homamne Humon, an de it ap homi Hat hobam enenda ebereg lit wereg on anyo, enenggaliap kwelap-enebukwag ulug nobahauk fug. Ap homi Israel on enakni Allah nakni, an den it ap homi Hat hobam hapne wauk on omano, siagap kwelap-enebukwag ulug nobahauk fug.

⁸We Hat hobahet neg an mabendeg hag boruk, Hat hobahet at an siahap-biahapdoho nobaharuk.

⁹It nori namepsi omano nim de, an de ap bohon hag atuk kahi, ne it nowesi nautsi mel fam de an de ap dagma on hag atuk kahi.

¹⁰ Hat Hobam wirigmu fahet nenda hundig boruk kwit de nendama mundoho milik-molok urukmu welahi, ne ap homi enele Hat hobam siahap-biahapdoho foruk on etma re an nobam neg aik waharuk.

¹¹An de noba yag-dauk kwit nambilik hweang hagdoho welahi, famen de iren an sebele nobaharuk.

¹²An nebe fong watuk kwit sum belahi sum lahabe folug welahi, famen de iren enalitno napuk.

¹³Ap homi enebe yenggelegma etmano en an nobahet dindil-dindil neg uruk; ne it siomorulug suni uruk on etma oho re an nebe neg lahap napuk.

¹⁴Airoho duruk famen de, nakni Allah, an den de Hat hobam neg somban uruk kahi, nakni Allah, Hat hendama hahayeg boruk salim Haren onggo hweag-nimin. Haren henda hundig napuk kahen on ai fam inim, ne dipdoho neg duruk kahen on ai fam nim, an let nabin.

¹⁵An sabelep yum-yum angge durukmu etma obuk ukwag ulug hil fouk fug, it ap homi an enerim napuk on fam inim, in ik ahummun yaron fam en nim an nahap wendat nabin.

¹⁶An ik ahum funag-lenggag angge duruk on en sebel nabeheg, ne ik laut ahum apma erahamu obuk ik wambeheg, ite ap homi en koru elma sal nabeheg, dukwag ulug embesouk fug.

¹⁷TUHAN nakni, Hat de hebe fanoreg lit henda hundig neg napuk kahenma re, Haren onggo hweag-nimin. Haren henda hundig neg nenepuk kahen on ai fam, Henda fano en horohole endenoho fu neakin.

¹⁸An de nebe sug-sagdoho wereg lahimu re folo-foloroho neg let nabik manu, an hamingming angge su nealug Hat hebe herag-am fug.

¹⁹It naselei on wereg ma etman an loloho nobahalug, nahap wendat nabik ma.

²⁰An nobam siaho nobahakeg, sebele nobahakeg, nenggaliap kwelabe nobahakeg, duruk ale ai Haren oho mun holuk deg, it naselei on mundoho aire Haren oho hil esauk kahen.

²¹Iren an sebele nobaharuk on ai fam de an nenda wat-dauk kwit, nebe fam mun hunuroho welahi. Enenda hundig enobam foruk on ai kema wereg ulug hera hauk kahi famen de, we alemaroho herareberuk kahi, nendama nahayehap kwelap nabukwag ulug hera hauk kahi famen de lohon hweaharuk kahi fug.

²² Nauk on an nowag ulug de asig angge og-nutuk; ne an nahaik obok napukmu re ik nowag ulug asig ahaik wenang nutuk.

²³ It enalukwema di angge su angge osoko wereg on ai fam de it enebe nal atuk kamag, ne iren enambog yonggo feseruk on etma fam de sabu yepdeg hag atuk kamag.

²⁴It inil de mun sihilig on atuk kamag, ne it enahabire hundig omamne elegdoho neg atuk kamag.

²⁵Hat holok mun kulung duruk on ai it enobam aik wamagdoho ulug, Hat Holok ai it enemberimmu etma hilil esakin.

²⁶ It enobam sabo salegma etma mun obale neg amag, ne it enobam sabo wirig kwe ai mun foluk neg amag.

²⁷Iren de ap Haren unggum obam ferihin on anyo fam anggin-fanggin ale neg deberuk, ne ap Haren obam anggin ferihin on anyo fahet de iren uruk-wauk kwit neg wereg ma re,

²⁸It ai enebe demdoho on ulug debesouk fug, it enesiag neg hum atuk kamag ulug embeseiyug.

²⁹ It enunuk de it ap homi enoluk mundoho welamuhup ulug, buku fam baleg wereg on anyo fam en ho-esowag, ne ap bekitdoho neg duruk on fahet enunuk baleg wereg on ai fam de baleg welaruhu hayog.

³⁰Famen de an den nobam sebeloho wereg ma nebe ouk hauk kahimu re, nakni Allah Haren an leho nobahalug nahap wendat nabin.

³¹Ai fam de an den Hat Allah suni fam mot-habeheg, Ne, At ai suni dang duruk suni fam dang deheg, duruk karuhuk.

³²Wam sapi mel, sapi yohombuk humon mel, waroho TUHAN obahet foruk on aire horog maben hag famen de, suni fam at dang duruk on ai neg At endama mun ahayeg ale deberuk.

³³Airoho durukmu inil halug de ap homi enobam anggin-fanggin debeserukmu wereg on de enahayeg atuk, ne it ap homi Allah apne wauk on de enenda log-bog uruk.

³⁴Ap homi enenggik eleg on de At TUHAN en enele hol-enepuk; It omaliki sabu hetdoho kwelabe feserukmu wereg on etmano Aren maben deg ulug embeseruk fug.

³⁵Bohol inim kwenang inim, ik laut inim, ne ik laut ahummu enoluk wereg angge etma inim en At Allah neg mot-diek.

³⁶Aren de o Yerusalem nikangge ahap wendare folug de, o Yehuda en kota wereg on etmano obale kwe nikangge wiruhu. Ne, kwenang aire it TUHAN omaliki enengge aruhu mu, enebe etma lalug welamuhup.

³⁷It enomaliki inim enombasi inim de it enaknisi enabinggi angge ai foroho welamuhup; it ap homi TUHAN fam enenda hundig boruk on de o etma yugdoho welamuhup.