Read Ninia Yali MAZMUR 7 Bible Online

MAZMUR 7 - Ninia Yali bible

MAZMUR 7

¹Hun Kus unggul unuk Benyamin ahun ai fahet at Daud en oba yag-enepuk kwit TUHAN fam suni ebag on anyo.

²TUHAN Allah nakni, an de Hat hobam neg nalong baloho nobahaukwag ulug duruk kahimu re; It ap homi an mug naplug neg waharuk on etma fam en, Haren loloho nobahakeg, nahap wendat nabeheg, din.

³No singa en di angge su angge ambilik en houmdoho naroho lisulug laukmu let duk fug alereg anyo hagdoho, it ap homi en an airoho nabukwag ulug embesouk fug.

⁴Nakni TUHAN Allah, an den lahe nahaben salin ale deheg, it nori on fam siag ale debeseheg, it naselei on etmano wene indip eleg kweleg[5] obahatman siaho feseheg, dirihik halug de,

⁶we it naselei on etmano en muko sen-nabik lalug, nebe nowaroho kwenang fam etma nobahaukwag.

⁷TUHAN nakni, Hat holok hangdoho inatlug, it naselei on en log dik-wag waharuk kwit neg wereg on ai hinim abiek. Nakni Haren de katukdoho duruk ale on ai neg delep ulug Henda boruk kahenma, Hebe inatlug an let nabin.

⁸Ap homi di enunggul unuk su enunggul unuk Hat haluluk kwe maseroho wereg on etma misigmu kabog-debeselug de, Hat hebe hwerieg welahenma boholma takhta fam etma hwerieg wereg[6] lit it Hat hapma fahat-enusug lamin.

⁹We Haren neg ap homi enawene ayo wiroho biling enepuk kahenma re; TUHAN nakni, an de siag dirihik fug mu re we Haren neg katukdoho nobahain.

¹⁰ Hat hebere Allah mun katukdoho duruk on wereg lit, ap homi enendama deg ale nim, enunggul owagma wenggelduk ale nim esauk kahenma re, it ap homi Hat hele holda-holda on etman duruk ale ai bokap debeselug de, it ap homi fano neg duruk on ai enenda wirikap debesein.

¹¹Ap homi enenda mun bekit deg on enahap wendat-enepuk on aire, At Allah an nalong bal-napuk on ai neg.

¹²At Allah aire di salim su salim ap homi siag duruk on enobam unggum og-esauk kwit, enawene ayo wiroho bilinggi folug katukdoho neg kong-duruk on wereg.

¹³It ap homi etma enobabut aham duk fug angge nikale neg deg halug de, Aren de sehen ap watuk on fam binggi enowatmin ulug fik-fouk deg wereg. Aren de enggarog lebe-lebe maho feheg, asehen enggela ousale feheg, debelug de, andog indok hag on leheik lamin ulug fouk deg wereg.

¹⁵Hakiek, ap siag duruk on en de siag on dul ale ulug neg wene melalduk anggere; Airoho siag on neg melale folug de enebe fam en seiale on neg duruk.

¹⁶Aren de ap amu on fahet ulug yoma-deberuk famen de, at onggwareg at yomareg ma anyo ilag ik lauk.

¹⁷Aireg ma re ap aire at onggwareg en siag duruk fam de unggum og-ereheg, aren olok ale duruk fam de at ebe fam anggin-fanggin feheg, duruk.

¹⁸At TUHAN aire mun bekitdoho neg duruk on deg ma an den At neg dang duruk kahi; an den At TUHAN Mun Leho wereg on anyo obahet suni motdeg suni neg uruk kahi.