Read Ninia Yali MAZMUR 71 Bible Online

MAZMUR 71 - Ninia Yali bible

MAZMUR 71

¹TUHAN nakni, an de Hat hobam neg nalong balegma welahimu re, an nenggali amag ulug fotog nea fug.

²Haren de mun katukdoho neg duruk kahenma re an fiselaroho nobahain, an nele hesanggo hole folug nahap wendat nabin.

³Hat hebe re dom aeg an nebe wereg ma, an den seroho aluluk lalug welahi ha ma hagdoho on amin. Haren de an nahap wendat-nabuhuk ulug irihin mu re, Hat hebe re an nebe nalong baloho wereg lit hapma mapnuroho fahat-nusug lahen.

⁴Nakni Allah, it ap homi enolok on enenggikmen inim, it ap homi enaharoro on mel, ap homi enenda esa fug angge duruk on mel, enolok leiyereg on mel, fam etman ohwale nobahain.

⁵TUHAN nakni, Hat neg de an nenda ebereg angge welahenma re, an nebe sauweman angge TUHAN Hat hobam neg nenda demdoho boruk kahi.

⁶An nebe endag-atihik hulien anggere Haren neg an nalong baloho[34] fahat nusug lahen, an nebe noluk wereg laruhuk li em en anggere Hat fam neg merareg laruhuk ai fam de Hat neg hundig mot-hapuk kahi.

⁷An nalong bal-nusug wereg on de Hat homamne on welahen ai fam de, an noluk wereg lit it ap homi humdoho en an nobabut wal-heheg dukwag ulug welahi.

⁸An den de hindik-hundig Hat neg mot-hapuk kahi, ne nukoho hunduko re Hat hebe hanggiluk welahen ale anyo fag-duruk kahi.

⁹It naselei on en de an nabug neg balduk, ne it ap homi an nowarukoho duruk on en de enele misig seberoho matuk mu re,

¹⁰An nebe mun sobal deg lire Haren hwik neafug, ne nomamne mundoho eleg aik lahu li em de an nebe lin neafug.

¹¹Iren uruk kwit de, “At ebere Allah en lin heheikma wereg anggere; ap amu on en eke at ahap wendarukohoreg fug anggere niren mutlug lauldeg senerik lakohon manik,” ulug uruk.

¹²Nakni Allah Hat hebere an weregman yatdoho la fug, nakni Allah Haren folo-foloroho neg let nabik manu.

¹³It ap an nowarukoho dik waharuk on etma, enenggaliap debeselug enebe eleho feseiyug. It ap homi an nebe alema re nobahaukoho dik waharuk on etma, enenda nong-hong debesehunmu it enenggali amag.

¹⁴Famen de an neg de Hat hobam nenda ebereg wereg lit de, hum-hamdoho Hat neg mot-hapuk kahi.

¹⁵Nukoho hunduko etma Haren mun katukdeg ale neg duruk kahen ale fahet mel, Haren mun wenahauk fug aleroho nenahap wendare-nenobaharuk kahen ale ai fahet mel, dindil-dandalduk karuhuk.

¹⁶TUHAN Allah nakni, Haren duruk kahen ale etma re mun fulu-bolan ale neg duruk kahen ai fam de Hat neg mot-hapuk kahi; ne Haren katukdoho duruk kahen on ai, katukdoho duruk kahen on ai neg leho foruk kahi.

¹⁷Nakni Allah, an de nebe sauwereg lien angge Haren neg mamul-napuk kahen, ketia hulien anggere Haren di on su on waldoho ferihin mu mun fulu-bolan deg ale ai fahet hundig dindil-dindil neg uruk kahi.

¹⁸Nakni Allah, Haren an lin nealug neg lauk men, an nebe sobal atlug simbuk uhuk hayog. Ite an den it fobik endag-amuhup on fam, Hat homamne deg lahen ale fahet inim, Hat hanggiluk welahen ale fahet inim fag-duruk karuhuk.

¹⁹Nakni Allah, Haren katukdoho neg duruk kahen ale aire bohol mundoho leho wereg ai hagdoho deg; ne Haren duruk kahen ale aire mun humdeg ma re, ap sa en Hat hebe deg lahen ale fahet mundoho fu-hobahauk alereg ma? Mun eleg.

²⁰Haren de an nobam ouk-bouk humdoho nobaharuk kahen, famen de Haren neg an nebe fano hilinggi nobahakun, ne an nebe ap wareg on sal-enepukmu en noluk unduhuk nobahakun lit deg.

²¹Haren de an nebe nalong bolug leho nobaharuk kamag ulug nobahakeg, ne an nebe onggonoho nahayehap nobahakeg, duhun.

²²Nakni Allah, Hat de dipdoho neg duruk kwit welahen ai fam de, an den suni binggong gambus fam watuk kwit mot-hapuk kahi. Ap homi Israel on enakni Allah mun eneg welahen on nakni, an den de Hat hobahet suni motdeg suni no kecapi kong-duruk kwit mot-hapuk karuhuk.

²³An den suni motdeg suni Hat hobahet uruk kwit de, an mun nahayeg humon fam nawonog hauk karuhuk. Haren an mundoho nahap wendat-napihin mu re, an nebe nenda inim mun anggilukdoho suni wilipuk kahi.

²⁴Ap homi an alema re nobahaukoho duruk on etmano mundoho enalong eleg atswareg mun enenggali atsi mu re, nukoho hunduko Haren katukdoho neg duruk kahen ale ai fahet fag-duruk karuhuk.