Read Ninia Yali MAZMUR 72 Bible Online

MAZMUR 72 - Ninia Yali bible

MAZMUR 72

¹At Salomo en ebag on. Nakni Allah, Hat hawene melaleg melaleg ai at raja fam mamul-utuk kamin, Haren katukdoho neg duruk kahen ale ai at raja amloho ai fam og-utuk kamin.

²Aren it ap homi Hat homaliki etma enawene bilinggoho ayo wutuk kwit de wene melaleg higitdoho duruk karuhu, ne it ap homi sebel esaukmu wereg on ohore katukdoho neg debeseruk karuhu.

³Nit nenobam nenanggwenangma suma nenengge di angge su angge sigdoho wereg ma nenakol eleg angge nenenda seroho neg welamuhuk lamag, ne nit nenunggul unuk on fam mundoho etma katukdoho duruk ale neg deg lamag.

⁴At raja en de it ap homi kunggu on enengge on fahet ili og-enepuk kamag, ne aren it ap homi enenggik eleg on let enebeheg, ne it ap homi sebeloho feselug duruk on etmano mundoho eleho feseheg, duruk kamag.

⁵Mo inim bigalem inim il wereg li em eta, at ebe obalma amu on eke inam fug angge mundoho-mundoho unduhuk welamag.

⁶At ai ebere osit o leimu wamburuk hag, ite osit humon yabuk wirig on fene wambik lauk hag deg lamag.

⁷At ebe unduhuk wereg li em etare katukdoho neg duruk on ai saha il lauk kamag, ne bigalem yatuk li em etare di angge su angge sigdoho neg atuk mu welamag.

⁸ At raja unduhuk lit melal-enepuk karuhu kwe kerajaan de laut eke fam en eke huli deg laruhu, timur huli en de barat huli deg laruhu.

⁹It ap homi o lei kwe wereg on de at apma sebe uruk kamuhup, ne it aselei on de at eyog indipmu enelenggin dimirik waharuk kamuhup.

¹⁰Raja o Tarsis[35] fam wereg on en inim ne it ik aloanggenma pulau fene wereg on en inim, at obahet di angge su angge og-umukoho walug waharuk kamuhup. Raja o Arab on nim Etiopia on inim de, onggo walug feik waharuk kamuhup.

¹¹It raja mundoho re at apma neg sebe enelenggen dimiruruk kamuhup, di enunggul unuk su enunggul unuk mundoho at amingming angge neg amuhup.

¹²Aren de ap homi en anggin fanggin enobam feserukmu enemu da fug alereg on etmano loloho feseheg, ap homi enengge eleg lit at obam enele hweag-utuk on etmano lole feseheg, duhu.

¹³Aren de ap homi enenggik eleg on mel kunggu on mel enda hundig enebeheg, ap homi inil moleg on mel enahap wendar-enebeheg, duhu.

¹⁴It enebe re aren mun along angge borukmu re, Aren de ap homi en anggin-fanggin enobam feseheg, enolok en debeseheg, duruk on etma fam en loloho feseheg, duhu.

¹⁵At nowe raja holuk! At akit de emas o Arab on etma walug og-irik waharuk kamag At ebere nukoho hundig-hundig obahet somban yig-enepuk kamag, ne ap homi li hundig etma fanoap deberuk kwit neg welamag.

¹⁶Gandum de o nit nenobam nenanggwenangma etma saha uruk kamag, ne duk-duk etma nenanggwenang fam en anggen yihig hum atuk kamag. Kwenang de o Libanon kwenang hesilig eta hag deg lamag, ap homi o kota wereg on etma re o leimi enggelangge humdoho wilibig ai hagdoho atuk kamag.

¹⁷At raja unuk aire ap homi en oho li mundoho-mundoho etma wenggel-hauk kwit neg welamuhup, ne mo yatuk wereg li em etare at unuk de mundoho bogdeg-bogdeg welaruhu. It enunggul unuk amu enap en ohore at hagdoho fanoap nenobahaukwag ulug heng uruk kamuhup, it ap homi mundoho en de at fahet de ahayeg hauk kamag, uruk kamuhup.

¹⁸TUHAN it ap homi Israel on enakni Allah ai neg motdeg motdeg welamag! We Aren neg di ale su ale mun fulu-bolan deg ale neg duruk.

¹⁹At unuk mun along wereg on ai neg mundoho-mundoho motdeg motdeg welamag; ne, o kwenangma suma mundoho At ombagbag en neg hoporeg welamag!

²⁰Hun Isai amloho Daud anyo en de somban airoho ai huli ebag.