Read Ninia Yali MAZMUR 73 Bible Online

MAZMUR 73 - Ninia Yali bible

MAZMUR 73

¹Asaf Asuni. Ap homi enendama en siagdoho wenggelduk eleg on, Allah en omaliki enobam fano ale neg debeseruk.

²Famen de, it siag neg duruk on etmano enambiangma fano ale neg aheg, it winik-wonog uruk on fano neg welaheg, deg ma esalug an nenda mundoho biren-baren uk ale nabeheg, nenda At fam demdoho boruk kahi on anyo longgo uk ale nabeheg, disi.

⁴Ite enebe fam ouk-bouk ha fug wereg, it enebere mundoho fano neg deg lit enomamne wereg.

⁵It enebe anggin-fanggin deg ale etma re hauk fug, ite ap amu on hauk hagdoho anggin on enobam aik waharuk fug.

⁶Aireg ma re it enobabut de mun winik-wonog uruk, ne iren de enobabut mun hape fam neg debeseruk.

⁷It enendaman de enolok on neg buleloho lahapuk, iren de siag ale[36] duhuk on ulug neg wene baloho lahapuk.

⁸Iren de ap homi enelitno enepuk kwit de enebug siagdoho baldil neg noruk, ne enawonog fam de hit anggin on henobam fohuk ulug enakolap kwelap enepuk.

⁹Allah boholma wereg on anyo fam de unuk siahapdoho feheg, ne ap homi kwenangma on fam de enele en yahiril laheg,

¹⁰duruk ai fam de it Allah omaliki ohore sombandoho it enekit[37] aik lauk, ne iren enele uruk on fam de demdoho uruk ulug boruk.

¹¹Iren uruk kwit de, “Allah re mun apeleg, At Mun Leho Wereg on aire fureberuk fug.” Uruk.

¹²It ap homi siag neg duruk on etma re diroho neg wereg, enebe re bok wereg lit enengge re mundoho hum atuk kwit neg wereg.

¹³An de nenda mun horeg welamag ulug nonggwareg en ohwale fahat-dauk kahi on etma re we alemeroho hag, an den siag ahaye dulug duruk kahi ale sure ambiangma atuk ale eke wereg en de fug.

¹⁴An de nukoho abirangge anggin on neg nobam aik waharuk, ne hubet hundig-hundig de nobam ouk on neg aik waharuk.

¹⁵An den nele fam airoho uruk kale man de, an den it hat homaliki on anyo enunuk siahap deberuk kale.

¹⁶Famen de an den furoho wenggel-hamin ulug duruk men de, wene ai on de an den furoho duk fug ale napuk.

¹⁷Ai famen de ambiangman an nebe TUHAN Obam wirigmu kwik lauk kahimu neg de, etman it ap siag neg duruk on anyo enambiangma amuhup ale fahet noluk atuk mu fureberuk kahi.

¹⁸It enebere Haren kobokwe boldog deg on fam feserihin, ne it enebere beikdoho wat-dalug eleg amag ulug obog esauihin.

¹⁹Il misig fam neg it anyo enebe mundoho welelenggendoho lauk, it enebe eleg aik lauk salim aire mun nik aleroho atuk.

²⁰Ena og-hauk men o hubet wenggel aik lauk fug on anyo hagdoho; Nakni TUHAN hebe inatuk li em de it enebe mundoho eleg aik lauk.

²¹An nendama wat-dalug, an nendama etma hein en doua napukmu hagdoho napuk li em de,

²²an den wam Hat holohotma wereg anyo hagdoho, an mun morueroho welahi.

²³Famen de an den mundoho-mundoho Hat hebe horogma neg welahi, Haren de an nenggik bekit fil sen nusug welahen.

²⁴Haren hanggomo ale fam de an melale nobaharuk kahen, ne Haren de fobik an nebe leho nobahalug og-nabuhun lit deg.

²⁵Bohol fam etma re ap sa eke an nangge on wereg ma, we Hat neg angge omano hwi? We Hat neg an nonggwareg nangge on wereg ma re o kwenangma suma amu on an nenda ebereg on eke wereg fug.

²⁶An nebe inim nenda inim mundoho nomamne eleg atuk kweleg famen de, Nakni Allah Hat neg de an nomamneap napuk on welahen. Li mundoho-mundoho etma fahet de, an nangge nonggwareg en on de Hat neg welahen.

²⁷Ap homi en Hat o fotog healug lahup on de enebe bule wat-dahup, ap homi Hat fam dipdoho duruk eleg on de Haren enebe elehapdoho feseruk kahen.

²⁸Famen de an neg de nebe Hat horogma wereg ale aire mun fano alereg ma hauk kahi, an den de Hat TUHAN en duruk ale anyo fag-duruk karuhuk en ulug de nakni TUHAN Allah aire an nebe nalong baloho fahat nusug on hobaharihik.