Read Ninia Yali MAZMUR 74 Bible Online

MAZMUR 74 - Ninia Yali bible

MAZMUR 74

¹At Asaf en mamul-enepuk katfag asuni. Nakni Allah, Haren de li mundoho fahet nit de lin nesauihin a? Nit de Hat honggwareg homaliki on famen de nunggwelug holok nenobam foruk kwit neg welatmihin?

²Hat homaliki Haren o endam en momal-dauihin ale anyo wenggel-hakin, it enunggul unuk su on Hat honggwareg hangge amag ulug Haren fiselaroho wilibi feserihin on anyo. Duk Sion fam Hat hebe wereg ma fahet deberihin ale anyo henda wenggel-hakin.

³Obale mundoho moluluk-malalakdoho deg ma etma heyog belabe feil lakin; it neneselei on omano en Hat hobam wirig anyo mundoho lilibugdoho fousa.

⁴It Haselei on etmano en Hat hobam wirigmu omano en enele amit-amit duruk, ne iren de nit nenalong ahereg ulug de enap lahapuk.

⁵Ite ap e mutil lauk on en ohweimu e murik laul ulug, eneyaha enggat hebeloho murik lauk.

⁶Iren de o hwesesengge oho on etmano, yaha fam inim louk fam inim welelenggen esauk.

⁷Iren de Hat hobam anyo han yalswa ma re mundoho al obale neg atsi; ne iren de o Hat hapne waukmu anyo mundoho emere fousa.

⁸Iren de nit mundoho sebeloho nenobahalug de, o kwenang suma fam o wene kabog-duruk kwe etmano mundoho han yalukoho lit duruk.

⁹Nabi mel, eneg ale along on duruk ale omano mel, ketia lohon enameg fug, ne o suma deta huli airoho neg deg lit welaruhu ulug de ap misig en oho eke oluk deg fug.

¹⁰Nenakni Allah, ke huli it Haselei on en Hat enalitno hapuk kwit neg welamlusa? Iren Hat hunuk sebeloho foruk on aire airoho neg duruk kwit welamuhup a?

¹¹Haren nunggwelug nit[38] let-nenepuk kahen fug? Nit let-nenepuk ale anyo embeserihin deg etma nunggwelug henggik oko hwelauihindeg welahen?

¹²Nakni Allah, o keramen anggere an nowe raja Hat neg welahen, Haren neg nit nenahap wendat nenepihin.

¹³ Hat homamne mun ousa bolan ai fam ik laut anyo bul kwe biare feheg, ne kisu menawe hag on etmano enunggul owag erapdoho feseil, lauihin.

¹⁴ Haren de Lewiatan unggul owag anyo sebeloho ferihin mu re, it lei kwe enoluk wereg angge etmano en nauk kamag ulug debeserihin.

¹⁵Haren de ik eleruk wilibi feheg, ik wirig atuk on hwale feheg, ik wirig atuk on ebe humdeg kweleg Haren firitog debeheg, dirihin.

¹⁶Haren neg nukoho inim hup inim wal-debeheg, mo obale welaruhu mu ulug inim bigalem obale ulug inim ene ferihin.

¹⁷Haren neg kwenang huli-huli ferihin, o hobi inim sanim inim ferihin.

¹⁸TUHAN nakni, it haselei on en Hat hunuk sebeloho feruk ale ai wenggel-hakin, it ap homi enunggul unuk enap Hat enapeleg on en Hunuk siahapdoho feheg, duruk.

¹⁹It homaliki enamu en da fug alereg on etma it ap eneselei on mun eneharoro enap ai enenggik fotog-esa fug, it Homaliki enebe mundoho nong-hong uswareg wereg on ai enebe amuhup ale fahet mundoho-mundoho hapeleg am fug.

²⁰o suma obale mun heik deg kwe etmano re ap homi en siag on enolok hasimeg ale neg duruk en de, Haren nit ninim sali watuhuk ale anyo henda ebet hakiyug.

²¹It ap homi ap en sebel enusugmu wereg on etma enenggaliap debesouk fug, it ap homi anggin-fanggin hauk kwit wereg on nim, enengge eleg on inim etman Hat neg mot-hapuk kamag.

²²It ap homi Hat hobam enenda demdoho boruk eleg on en Hat hunuk siahap-biahapdoho neg foruk en de, Nakni Allah, Hebe feiyaloho inatlug de, Hat hawene ai fahet ili hwelakin!

²³It Haselei on en amit-mit duruk on ai hapeleg am fug, it Ha weim on en enele ngaikngog uruk on de mun omamne atuk ai!