Read Ninia Yali MAZMUR 75 Bible Online

MAZMUR 75 - Ninia Yali bible

MAZMUR 75

¹Ap homi en suni wilibi folug enebe ambine urukmu melal-enepuk on fahet, suni unggul unuk: Mundoho unggul waruk fug, ulug uruk on ai fene felaleg on. Suni At Asaf Asuni.

²Nenakni Allah, niren de Hat neg hapne wauk kahe, Haren di angge su angge mun nowag elekdeg ale wal-deberihin on etma fahet fag-duruk kwit de, Hat dang hapuk kahe.

³At Allah en uruk kwit de, “Li an den ene ferihik on fam higitdoho re, an den katukdoho neg enawene baloho kong-duruk.

⁴Kwenang inim ap homi emberimu wereg on inim mundoho elek duhu famen de, hulug lahabeg on aire An den neg omamne deberuk karuhuk.” Isi.

⁵Ap homi enele en yahiruruk on fam de, eke nim enele en yahiril lauk kam no ulug An den nele uruk kahi ai.

⁶Ne, it ap siag duruk on halug de, iren enobabut fam enawonog atuk kwit duhup hayog. Enonggwareg en leho fahat daheg, enele enawonog fam eheg, duhup hayog.

⁷Ap homi enewene bilinggiho ayo wiroho en enepuk on aire timur fil en oho barat fil en oho waruhu fug, ite utara fil en oho selatan fil[39] oho waruhu fug mu deg anggere.

⁸Famen de At Allah amu en neg enawene bilinggi ayo wiroho en enebuhu, Aren de it eke on sebele feseheg, it eke on leho feseheg, duhu.

⁹TUHAN olok aire waruk hag angge At enggikmu wereg, ne waruk ai fam de anggur ahalue asig anggolo on hwenanggeg. At Allah en de ahalue anyo hilil haukmu re, ap homi enolok on mundoho o kwenangma suma wereg on etmano mundoho nahup.

¹⁰Famen an neg de At Yakub akni Allah anyo fahet ale neg fag-duruk karuhuk, ne At obahet suni motdeg suni yig-enepuk karuhuk.

¹¹It ap enolok wereg on en enomamne deg on aire Aren neg elehapdoho fesehu, famen de ap homi fano duruk on neg de eke nim enomamne atuk kamuhup.