Read Ninia Yali MAZMUR 77 Bible Online

MAZMUR 77 - Ninia Yali bible

MAZMUR 77

¹Ap homi en suni wilibi folug enebe ambine urukmu melal-enepuk on fahet. Yedutun asuni fene. Asaf Asuni.

²Allah fam nele omamneroho hwiruruk kahi; nele omamneroho At hwirurukmu re Aren an nele hol-napuk.

³An nobam nong-hongdoho wereg lit At TUHAN fam somban uruk kahi; nenggik eleruk fug angge hup hundig nenggik At obam lahabeg lit neg welahi, famen de nendama onggone nobaharuk fug.

⁴An den At Allah ebe fahet nendama wenggel-halug de nebe nenek- yobaruruk kahi, an den meneni yatdoho wenggeldil lalug de nebe fam mundoho lilipna napuk.

⁵At TUHAN en de an hup nohouk fug aleroho nobaharukmu re, an nenda fituk men neg de nele uk fug ale napuk.

⁶An den de nukoho atam welatihik on etmano wenggelduk kahi, tahun atam nambol fil asti on etmano fahet ebereheg, meneni wenggeleheg, neg duruk kahi.

⁷O hup anggore nendama wenggel-halug de, nendama heng oho ale neg ebetuk kahi,

⁸“At TUHAN en de li mundoho etma fahet fotog-neasireg, an fam enda ahayeg neauk fug a?

⁹Aren nit enda hundig nenepuk ale anyo bale fesi a? Aren wene sali wat-nesasi on etmano dip-debehu fug en duruk a?

¹⁰Nit enda hundig nesauk ale fahet de apeleg atsi ane? Ite olok atsireg nit fam enda nenepuk ale embesesi a?” ulug ebetuk kahi.

¹¹Airoho ebetlug de an den uruk kwit de, “An nenda ouk hauk kahi on de, At Mun Leho wereg on anyo along wereg lit[40] unduhuk wereg fug,” ulug boruk kwit uruk kahi.

¹²TUHAN nakni, an den de Haren di ale su ale dirihin on etmano wenggel-hauk kahi, Haren o indik-endam etma along on duruk kobag ale etmano wenggel-hauk.

¹³An den de Haren di on su on dirihin ale nim, ne Haren mun bolan ale wal-dirihin ale etmano nim, ebet hauk katmin.

¹⁴Nakni Allah, Haren duruk kahen ale etma re mun eneg horeg ale neg duruk kahen, nit nenakni Allah humon ai hag de ap sa eke wereg?

¹⁵Allah Haren de along ale neg duruk kahen on, Hat homamne welahen ale anyo re ap homi enunggul unuk enap wereg on enesahalimu etmano ename ferihin.

¹⁶Hat homamne fam de it Homaliki at Yakub ambiangma on mel Yusuf ambiangma on mel, etmano fiselaroho wilibi feseik waharihin.

¹⁷Nenakni Allah, ik Hat il healug de mundoho owag elek duruk katsi, laut ahaum apma erahamu nim mundoho kwel-kwel angge duruk katsi.

¹⁸Ululu sipuk hil lauk em de anggulog fam en osit belabik waharuk; oweal de unggut-unggut etano higitdoho dahan-dahan atuk.

¹⁹Ululu kululuk durukmu, oweal senggengeg balduk mu, kwenang de elek duruk kwit youk duruk.

²⁰Hat hebere ik ahum funag-lenggag angge duruk on emberim fene lauk kahen, laut ahum emberim kwe lauk kahen famen de Hat heyog sobutuk kahen on obale enameg fug.

²¹Ap gembala en enowam domba hwal-enepuk kwit wereg hagdoho Haren it Musa nim Harun inim fene en Homaliki og-eneplug wilibik waharihin.