Read Ninia Yali MAZMUR 78 Bible Online

MAZMUR 78 - Ninia Yali bible

MAZMUR 78

¹At Asaf en mamul-enepuk katfag asuni. Yaho hit ap homi nit nenunggul unuk on suma, an den hweag-hesauk kahi on su henesanggo holiek, an nele uruk kahi on su fubi debeyek.

² An den de wene hwenareg wene nim, wene suwit nim eheg, ne o indik-endam etman hwenaroho wene hagdoho uruk katfag on ebe diroho ulug hweag-hesamin,

³it nenambu-nenombasi en urukmu, niren nenesanggo hole folug wauhuk wene.

⁴At TUHAN omamne fam duruk katfag ale nim, Aren di on su on wal-debag ale nim, Aren along on fam duruk katfag ale nim etma, niren nenomaliki fam heraho foruk ale embeselug ite it fobik endag-atlug welamuhup on fam fag-duruk kamul.

⁵It enunggul unuk Israel on fam de Aren Awene melaleg anyo og-esebag, ne it Yakub ambiangma on fam de wene diroho diyug suroho diyug anyo og-esebag. Aren it nenambu-nenombasi fam hweag-esauk kwit de, hit henomaliki etma hweag-esauk kamuk, ulug hweag-esebag.

⁶It ai enomalik etman oho At ai ebe enoluk deg lamagdoho, ne iren de it enomaliki endag-enebuhup on fam fohup anggere.

⁷Ai fam de iren oho, At Allah fam enenda ebereg welamuhup, ne Aren di ale su ale debag on etma iren enapeleg amuhup fug, famen de Aren diroho diyug-suroho diyug ulug hweag-esebag on anyo fam holoho neg duruk kamuhup.

⁸It aire it enambu-enombasi en TUHAN awene melaleg sahaloho folug enerim en duruk katfag hagdoho duruk kam no, It aire enebe enendama demdoho boruk on anyo omamnereg eleg angge youk-fouk uruk katfag enap, iren Allah fam dipdoho duk fug angge welatfag enap ai en duruk katfag hagdoho duruk kam no.

⁹It enunggul unuk Efraim on enesehen mel, enandog mel, fangdoho welatfag enap anyo re, weim apuk li em heye wilipfag.

¹⁰Ite At Allah nim it inim sali watfag on anyo dahandoho duswa, ne At Awene melaleg wereg on anyo fam holoho dul ulug debag fug.

¹¹Iren de At Allah en di ale su ale duruk katfag on anyo mel, ne Aren di on su on along duruk kwit it enobam ename foruk katfag on etmano mel, iren enapeleg atfag.

¹² It enambusi inil hanim o Mesir en Zoan donggoma etman, de Allah en along on duruk katfag.

¹³ Aren de ik laut kahale febagdeg de it selmako nindihip enepfag; ik anyore helahe baloho forukmu hagdoho unduhuk febag.

¹⁴ Aren de o nukoho angge anggulog fam og-eneplug waharuk katfag, ne hup hundig de indok ambogbag fam og-eneplug waharuk katfag.

¹⁵ O leimu etman Aren helep dom fam etman kahale febagdeg, mun nik aleroho it enahaik nowag ulug og-esebag.

¹⁶Helep unggul anyo fam en ik wilibik wamag ulug mingming debagma re, ik ebe ik lohon wirig atuk hagdoho wilibik watfag.

¹⁷Famen de deg kweleg iren hundig-hundig Allah fam siag neg duruk katfag, o leimu etman de iren At Mun Leho Wereg on fam owag lahalduk katfag.

¹⁸ Iren enapenendoho Allah abut baldul ulug de, nauk angge it enambono angge omano heng uruk katfag.

¹⁹Iren At ele sahaloho duruk kwit en iren uruk kwit de, “O leimu suman At Allah en nauk on higitdoho og-nesauk kam alereg a?

²⁰Aren helep unggul wirik on ware febagma, ik il omamneroho houwalik wilibik watfag ale aire demdoho. Famen de it omaliki fahet Aren roti mel, ino mel, foukdoho folug og-nesa alereg a?” ulug uruk katfag.

²¹Airoho urukmu At Allah esanggo holug de Aren olok enobam febagdeg de it omaliki anyo indok enobam febag; iren At Allah ebe fam inim, At omamne fam enahap wendat-enebuk alereg on anyo fam inim,

²²enenda dip-debouk fug angge duruk katfag ai fam de At olok enobam febag on anyo re lohon bale foruk katfag fug.

²³Airoho duruk kwit en famen de Aren bohol sok healukwag ulug, mingming-duruk katfag.

²⁴ Aren de no gandum bohol fam en belabik waharuk katsi, ne manna [41] re it nauk on fahet belabik waharuk katfag.

²⁵Aren de it nauk on hum-hamdoho og-esauk katfag ite roti malaikat en nauk on nauk katfag.

²⁶Aren de hol mo bekit fil en firik lowag ulug mingming debag, At Omamne fam de hol selatan fil en warik watfag.

²⁷Aren it omaliki enobahet suwe belap-esa waharuk katfag mu re, ebere mun wenahauk fug aleroho ik inggi deg etma hagdoho og-esauk katfag.

²⁸Suwe etma re it enobam sabo salegma etmano nim, it enebe wereg latfag kwe en maseroho etmano belap-esa waharuk katfag.

²⁹At Allah en de it enenda enembono hauk katfag ale higitdoho og-esauk katfag mu re, it anyo hwelalug naukmu enebe homo debeseruk katfag.

³⁰Famen de it nauk on anyo owan enembilikmu sahaleg liren de, eiya mundoho wereg ulug boruk katfag fug mu re,

³¹At Allah mundoho olok en it enobam olok fesebag deg de; it ap homi Israel on anyo en enebe sauwe on ilil mulil dahan deg on etmano Aren mundoho enowatfag.

³²Airoho enepuk katfag famen de At omaliki etmano en siag neg duruk katfag, Aren along duruk katfag on etma fam iren enenda demdoho boruk katfag fug.

³³Ai fam de At Allah en it enebe enoluk wereg on anyo horehe fesebag, tahun eta fam it enoluk welatfag on etanore mundoho enakoldoho neg weregman eleg aik lauk katfag.

³⁴It enesahalimu etmano en At Allah en it foma enowatuk mu re, it fomano etmano enenda wat-dalug de At akit sombandoho waharuk katfag.

³⁵Iren de At Allah aire it enalong bal-enepuk on, ne At Mundoho Leho wereg on aire it enahap wendat-enepuk on ulug wenggel-hauk katfag.

³⁶Famen de iren At fam hwenaroho neg duruk katfag, it enele uruk on etmano re mundoho seiale wene neg uruk katfag.

³⁷ Iren de At obam dipdoho duruk katfag fug, ne At inim sali watfag on anyo enendama ebereg welatfag fug.

³⁸Famen de At Allah en de omaliki enda hundig enepuk kwit de it enesiag apelehapdoho feseruk kwit, it enebe mundoho elehapdoho fesebag fug. Li humdoho fam At olok laharuk kweleg hambuk hauk katfag, ne ahamu het anyo it enobam folo-folo wilibi feik waharuk katfag fug.

³⁹Aren wenggel-hauk kwit de it aire waratuk on, we hol firulug lauk on nikangge sombandoho wam fug alereg anyo hag deg ulug wenggel-hauk katfag.

⁴⁰O leimu etman iren At enda oukap kwelabe feheg, ne at obam owag lahaleg ale neg deheg duruk katfag.

⁴¹Iren hundig-hundig Allah abut balduk kwit hag ale neg duruk katfag, ne iren Allah it ap homi Israel on enakni anyo enda hesilig ale hagdoho neg deberuk katfag.

⁴²O Mesir en Aren along on deheg, ne o Zoan leimu en duk fug on deheg, duruk li em,

⁴³Iren de At omamne deg ale anyo mel, it enaselei on weregman Aren fiselaroho wilibi feseik watfag salim anyo mel, fahet ebet hauk katfag fug.

⁴⁴ It enahaik wirig atuk on etmano Aren il ahamdoho mep deberukmu, iren na fug ale neg atuk katfag.

⁴⁵ Aren de sobon hum-hamdoho fam enobam anggin-fanggin feseruk katfag, ne it enanggwenang de yahaye en siahap deboukwag ulug embeseruk katfag.

⁴⁶ It eneyabukmu anggen yihig baluhuk ulug deg on mel, anggen baleg on mel, elehap dukwag ulug, Aren hwerenangge mel, bulue mel, mondorik waharuk katfag.

⁴⁷ It enahan anggur yaho on etmano re Aren osit helep anggen on fam unggul wareheg, ne it enahan ara yaho on etmano osit henangginggi olom deg on fam unggul ware feheg, debag.

⁴⁸Iren enowam endag-dauk on etmano osit lumbiag[42] en enowarukwag ulug debesebag, ne iren endag-dauk on etmano ouk amben siag on en sebel-enebukwag ulug debesebag.

⁴⁹At olok ahummu ahe laharukmu welatfag anyo it enobam foukmu it enenda mundoho siag amag ulug, malaikat ap watuk on esan misig mondorik watfag.

⁵⁰Aren de it enebe enda esebag fug, ne At olok anyo sebe hebag fug, famen de Aren ouk yebil angge oko la fug on fam elehap enepfag.

⁵¹ Aren de it ap homi Mesir on enahain elekwe domog omano, enomaliki ap angge wandeba on neg enowatil lebag.

⁵² Airoho debeselug de, Aren it omaliki anyo domba uluk-bembeal deg hagdoho melal-eneplug de, o lei kwe en og-eneplug lebag.

⁵³ ne it eneselei on etmano re ik laut ahummu obuk uruk kweleg de, Aren hwal-enepil lauk li em etare it enobam selegdoho enakol eleg angge lauk katfag.

⁵⁴ Airoho og-eneplug lebagdeg de At omaliki anyo Aren anggwenang mun enegma, dom-dom alukwema At onggwareg en delfagma etmano og-eneplug lasi.

⁵⁵ It omaliki etmano enolohotman de it ap homi o etma welatfagma on etmano muko wilip-enepuk kwit de, At omaliki ap homi enunggul unuk Israel on anyo mundoho fam Aren kwenang anyo mundoho yohwan isil lebagma re, it anyo it eneselei on enobam sabo saleg kwe etmano kwil lebag.

⁵⁶ Famen de iren Allah fam owag lahaleg hag ale neg duruk kwit de At Mun Leho wereg on anyo abut baldul ulug neg duruk katfag, Aren awene melaleg diroho diyug suroho diyug ulug hweag-esebag on etmano iren furoho holoho duruk katfag fug.

⁵⁷Ite it enombasi en Allah enapelehapdoho embeselug duruk katfag hagdoho neg duruk kwit de, enobabut sehen owag kwasik on hag deg lit, iren duruk ale etma ebe ale eke duruk ulug mel bouk fug ale etmano deg latfag.

⁵⁸Iren de kembu apne waukmu obale wutuk kwit de Allah ele owag sahaloho foruk katfag, ne iren e hwesesengge oho angge ahut hilinggig omano wutuk fam de At Allah olokap kwelabe foruk katfag.

⁵⁹Iren airoho durukmu At Allah en il esalug de, At olok atlug, it enebe Aren wirik-bisangdoho fotog-esauk katfag.

⁶⁰ Aren de Obam Sabo o Silo[43] fam wirig on anyo embesebag, ne it ap homi enesahalimu At wereg ale anyo mel embesebag.

⁶¹ Aren de Peti wene abug wareg yohwareg angge ap en walug lowag ulug embesebag; At ebe ombagbag on wereg ale anyo ahutdoho ulug welatsi angge anyo it aselei on en hwelalug lowag ulug embesebag.

⁶² Aren de it omaliki At onggwareg angge on fam olok enepfagdeg de, it enebe karog en enowarukwag ulug fotog-esebag.

⁶³It enomaliki sauwe on etmano re indok fam han nebag, it enahwelani duhum de ap en eke og-enepfag fug.

⁶⁴It enowesi imam etmano re karog fam mundoho enowatfag ma re, iren enohwesi sohwe etmano en oba yag-enebuk fug alereg latfag.

⁶⁵Ai fam de At TUHAN ebe ap nohoruk angge enoluk inatuk anyo hag inatfag, ne ap ik anggur ahaik hwenanggeg nalug enomamne atuk em duruk hagdoho debag.

⁶⁶Aren de it aselei on etmano waroho mon-esebag, ne li mundoho-mundoho etma fahet it enalong elehapdoho fesebag.

⁶⁷Famen de it at Yusuf en ondohoma on de erim en fotog-esebag, ne it enunggul unuk Efraim on eke momal-enepfag fug.

⁶⁸Aren momalsi on de unggul unuk Yehuda on mel, ne Duk Sion Aren ambono hauk on ai mel neg momalfag.

⁶⁹Aren de obam ebe boholma wereg ma etmano hagdoho obam witfag, ne kwenang mundoho-mundoho omamne wereg anyo hagdoho debebag.

⁷⁰ Aren de amingming angge Daud anyo momalfagdeg de, at ebe owam hwalduk kwit wereg on etmano enesahalimu en webag,

⁷¹At TUHAN omaliki Israel on etmano hwal-enepuk kamag ulug at ebe domba isinga etmano hwalduk men webag.

⁷²At Daud en de enda mun finik-fano fam hwal-enepuk katfag, ne ape enggat deg lit melal-enepuk katfag.