Read Ninia Yali MAZMUR 79 Bible Online

MAZMUR 79 - Ninia Yali bible

MAZMUR 79

¹ Asaf Asuni. Nenakni Allah, it ap homi enunggul unuk enap Hat enapeleg on etmano kwenang Hat honggwareg en on anyo fam sebelik kwik wahesa. Iren de Hat hobam wirig on anyo emere feheg, o Yerusalem anyo ap en moluluk-malalak debeswa on hag debeheg, duruk.

²It ap homi Hat hamingming angge enebe wareg etmano re mun lin-esausa ma, suwe kolokwe daruruk on etmano en nauk angge on atswa. It ap homi Hat henda hundig enepuk kahen on enebe wareg etmano re iren embeseswa ma, di on su on maro en nauk angge on atswa.

³O Yerusalem etma abirangge fam de it enemep de ik hagdoho wamburuk katsi ne enebere ap en oho eke sal-enepswa fug.

⁴Nit de it ap homi enunggul unuk fomane nit horog kwe wereg on oman enalitno nenepuk on atuhuk, iren de nit unda yag-nenebeheg, enerim nenebeheg, duruk.

⁵Nenakni Allah, Haren de li mundoho-mundoho etma fahet holok nenobam ferihin deg, hahum kwe heren hendama ahe laharuk ale aire indok hobu hagdoho laharukmu welahen ai a?

⁶Iren de Hat homaliki etmano mundoho elehapdoho feseheg, it enebe wereg ma mun luluhun-lalahandoho feheg, dusama re,

⁷Hat holok aire it ap homi enunggul unuk Hat enapeleg on fam, hilil-esa lakin. It ap homi kerajaan fam etma wereg on Hat hobam wene kabog-duruk eleg on etma enobam belabe feseik lakin.

⁸It nenombasi en siag duruk katfag on ai fam nit unggum og-nesa fug. Nit de nenenda mundoho nong-hong urukmu welahereg de, Haren henda hundig nenebin.

⁹Nenakni Allah Hat nenahap wendat nenepuk on welahenma re nit lit nenebin, Hat honggwareg halong wereg lit leho welahen ale airoho nit nenesiag hapelehapdoho nenobahalug nenebe loloho nenobahain.

¹⁰It ap homi enunggul unuk amu on en nit fahet uruk kwit, “It enakni Allah ai ebe kema wereg?” ulug hein og-ale uhup hayog. Ite nit oho it ap enunggul unuk enap etman Hat hamingming angge etmano enowatswa on etma, enunggulmu debeserukmu hahuk lamag.

¹¹It ap homi sabu hetdoho kwelap-enusugmu wereg lit nenek duruk on enele ai hesanggo holin; it ap homi enebe waramuhup on ulug eneko fousa on etma Hat homamne anyo fam enoluk lili fesehup lamag.

¹²TUHAN nenakni, it ap homi enunggul unuk amu on etman Hat mabenapdoho hobaharuk ai fam, Haren oho onggo it enobam henggik sabiren neg de fug ite deng obukdoho wenahauk fug aleroho debesein.

¹³Ai fam de nit Hat homaliki Haren hwal-nenepuk kahen on howam domba en, li mundoho-mundoho etma fam Hat neg dang-hapuk kaheg, ne li lahaik-wambuk etma Hat neg mot-hapuk kaheg, duruk kamuhuk.