Read Ninia Yali MAZMUR 80 Bible Online

MAZMUR 80 - Ninia Yali bible

MAZMUR 80

¹Ap homi en suni wilibi folug enebe ambine urukmu melal-enepuk on fahet, suni unggul unuk: Bunga Bakung fene felaleg ale higitdoho. Suni at Asaf en fag duruk on.

² Nenakni Hat ap homi Israel on enobahet gembala welahen on anyo hesanggo holin, Haren neg it Yusuf en ondohoma on etmano domba hagdoho melal-eneplug waharihin. Hat hebe it malaikat on en enunggul unuk kerub [44] ai emberimu hwerieg welahen on anyo, it Efraim on nim, Benyamin on nim, Manasye on nim enolohotma etma,

³haseleg fam enam aik ma. Hat hebe homamne welahen ale anyo nit fam unug-nesakin, ne Hat de hebe watlug de nit nenahap wendat-nenebik ma.

⁴Nenakni Allah, Haren nit nenebe fam buhundoho nenobahain, Hat henda fano fam nit hil nesakin, ai fam de nit nenahap wendareg welaruhu.

⁵Nenakni TUHAN Allah Mun Leho welahen on, It homaliki en de siag neg duruk kweleg famen de, Haren li ke huli holok nenobam folug neg welaruhun?

⁶Haren de nit nenoba yag dauk kahe on anyo nenasiburu atukmu noag ulug og-nesauk kahen, ne nit ninilue anyo re mun sigdoho nenahaik atukmu noag ulug og-nesauk kahen.

⁷Haren de it ap homi enunggul unuk enap nit horog kwe wereg on etmano en, nit nenanggwenang anyo fahet enele amusun ale ukwag ulug embeseruk kahenma nit nenaselei on etmano enahayeg en unda yatuk.

⁸Nenakni Allah, Homamne humon, Haren nit nenebe deg lahe ale ai hwaloho nenobahain; nit nenahap wendareg welamuhuk en de hat henda fano fam hil fu nesakin.

⁹It Hat homaliki aire e anggur hagdoho, Haren o Mesir en oko feseik waharihin. It ap homi enunggul unuk amu on etmano re Haren muko wilibi feserihin deg de, e anggur anyo Haren it enanggwenang fam etmano yaho ferihin.

¹⁰Haren neg kwenang foukdoho ferihinmu; at anyo omanggen mun yatdoho belapuk kwit ebe doaloho o kwenang ai fam mundoho saharik lasi.

¹¹E anyo en de duk-duk etmano mundoho saleheg, ne enggik doalduk kwit de e aras mun yit-yaron etmano fam saleheg, disi.

¹²Enggik doaldil de ik laut bulmu yenggeleg on anyo huli aik lasi, ne onggombi re Ik Efrat huli aik lasi.

¹³Nakni Allah elehet oho on aire nunggwelug Haren meiyal esauihinmu, ap homi lag-wag uruk on en de e anyo anggen bal-dalug neg lauk abi?

¹⁴Wam maro on en de mundoho saluk-maluk nauk, ne di angge su angge amu on o lei kwe wereg on etmano en nauk.

¹⁵Nenakni Allah Mun Homamne welahen on, Hat hebe boholman nit homaliki fam hil belap-nesa watlug fu nesa ma.

¹⁶Haren it homaliki e anggur hagdoho honggwareg en yatihin on, ne ahanuk laharukmu Haren omamne deberihin on hag degma nenahap wendat-nenebik ma.

¹⁷It Haselei on en de mundoho mutswareg han yalswa; it aire enebe Hat holok fam elehap enebiuk.

¹⁸Ap Haren momaldihin on ai mel, ne ap homi enamloho Hat honggwareg fahet omamne deberihin ai mel along baloho foroho lamin.

¹⁹Ai fam de niren Hat fam en hwareroho eke lahuk fug; Haren nit nenebe nenoluk welahe on au hwal-nenepukmu, ai fam niren Hat neg mot-hapuk kamuhuk.

²⁰Nenakni TUHAN Allah, Mun Homamne welahen on, nit nenebe fam deg lahe ale ai hwale-nenobahain, nit nenahap wendareg welamag ulug Hat henda fano fam hil fu nesakin.