Read Ninia Yali MAZMUR 81 Bible Online

MAZMUR 81 - Ninia Yali bible

MAZMUR 81

¹Ap homi en suni wilibi folug enebe ambine urukmu melal-enepuk on fahet, suni unggul unuk: Gitit ai fene higitdoho. Asaf Asuni.

²At Allah nit nenomamne og-nesauk on ai obahet suni motdeg suni iek, At Yakub akni Allah ai fahet henahayeg duruk kwit henawonog diek.

³Suni wilibi folug binggong rebana deliek, binggong gambus inim rebana inim ele nguroho kong diek.

⁴ Nukoho lohon fam kabog-duruk kwit inim, bigalem keron enam daukmu soni pesta esetuk kwit inim, bigalem funureg ma esetuk kwit inim, bohweap trompet furiek.

⁵Airoho duruk ale aire nit ap homi Israel on wereg ma etman duruk kamag ulug melaleg wereg ale anggere, aire at Yakub akni Allah anyo en wene melaloho fesi on deg anggere.

⁶Aren it ap homi Mesir on inim weim yabikoho lauk kwit de, Aren it ap homi Israel on fahet wene melaleg eke unduhuk febag. An den de enele eke an oho lohon napeleg on nesanggo holdihik,

⁷“Hat handuhunmu anggin sahalireg on anyo An den leko wauihik, ne hat henggikmu sum yihig hareg latihin on anyo oko ferihik.

⁸ Hat hebe anggolo-fanggoloroho wereg lit hele hwiririhin mu, An den neg hahap wendat-hapihik. An den de nebe heraho lahimu ululu wereg ma etman onggo hweag-hitihik, An den de ik Meriba elerukmu etano en hat habut bal-heauihik.

⁹Israel henap, An den uruk kahi ale su holduk ale henendareg lit halug de, yaho hit An nomaliki on, An den henenda eberoho ulug hweag-hesauk kahi on su henesanggo holiek!

¹⁰ Hit henesahalimu etman allah hag debelug apne wauk on eke welaruhu hayog, allah hiren oho mun henapeleg on etma fam apne wauk kam fug.

¹¹Hit henebe o Mesir weregman og-heneplug wilibik waharihik on, henakni TUHAN Allah nebe An neg. Hit henasiburu obok deg li em de An den neg nauk on og-hesauk katihik.

¹²Famen de it An nomaliki omano en de An nele hol napuk ale enerim deg latswa, It ap homi Israel on en de An nobam nele holoho duruk ale mun enerim deg latsi.

¹³Ai fam de it enunggul owag omamne amag ulug An den o fotog-esauihik; we iroho enenda boruk ale etma domog duruk kamag ulug embeserihik.

¹⁴Nori aho, it nomaliki en An nele uruk on hol napuk kalepman, ne iren An nele holoho neg duruk kalepman de,

¹⁵An den folo-foloroho neg it enaselei on etmano al wendal eseheg, ne it ena weim on etmano abirangge enalong elehap debeseheg, dele.

¹⁶Ap homi An enerim napuk on de An den it sebeloho feselug, it enebe li mundoho-mundoho etma unggum enobam fesehuk.

¹⁷Famen de it An nomaliki on neg de An den gandum eneg on etmano nowag ulug og-eseheg, ne An den kin ahalue ohweimu on fam homorebeseheg, duhuk,” ulug ebag.