Read Ninia Yali MAZMUR 83 Bible Online

MAZMUR 83 - Ninia Yali bible

MAZMUR 83

¹Suni misig eke At Asaf Asuni.

²Nakni Allah, Hat hape wong ulug welam fug, Hat henggik si ulug bok wereg eleg.

³It Haselei on etmano enele hun fag ale neg deheg, ap homi Hat enerim hapuk on en owag lahaleg ale deheg, duruk angge hil esakin.

⁴Iren de enamenggel fam it Hat homaliki etmano enowaruhuk ale ulug wene balduk; ne ap homi Hat hobam enalong baleg wereg on etmano enowaruhuk ulug enele misig matuk.

⁵Iren uruk kwit de, “It ap homi enunggul unuk Israel on au eke wereg ma enunuk uruk kamuhup aire fug anggere, it enunuk eleg amagdoho niren mundoho luluhun esakohon lahe,” ulug uruk.

⁶It ap homi enunggul unuk-enunggul unuk on etmano enebe misig atlug de, Hat hele lahaldul ulug neg duruk:

⁷it enunggul unuk Edom on mel Ismael on mel, ap homi Moab on mel Hagar on mel;

⁸It enunggul unuk Kebal on Amon on Amalek on mel, enunggul unuk Filistea on mel, ap homi Tirus on mel.

⁹It Asyur on oho re it inim seberusareg de, at Lot en ondohoma on etmano enenggik leko duruk on atswa.

¹⁰ It aire ap homi Midian on hagdoho debeseiyug, it hun Sisera mel Yabin mel Ik Kison ikman debeserihin mu,

¹¹o Endor etmano en enebe elehapdoho feseswa ma, enebe kwenang hesil angge hagdoho atswa.

¹² It enowesi melal-enepuk on aire, it Oreb mel Zeeb mel, etano hagdoho debeseiyug, ne it enowesi enalong wereg on etma re Zebah nim Salmuna nim hagdoho sebe feseiyug,

¹³it ai en uruk kwit de, “Nit de kwenang At Allah ebe wereg ma ai sebelik kukohon lahe,” ulug uswa anggere.

¹⁴Nenakni Allah, it aire ul ahe hagdoho Haren del fol esakin, ne amungmung angge holen fi esauk hagdoho fi esakin.

¹⁵Indok en ohwe harep nauk hagdoho, indok ambulbul en dom-dom han nauk hagdoho debesein.

¹⁶Haren de hasielu fam it mug-esakin, hol fam de Haren it youk wilibi fesein.

¹⁷TUHAN nakni, iren Hat neg demdoho halong welahen ukwag ulug, it enebe maben on amag.

¹⁸It aire mundoho-mundoho etma enenggaliap kwelabe fesehupmu re, enakol atlug wereg lit, it enebe maben on atlug waramuhup.

¹⁹It ai en de TUHAN Mun Leho Wereg on de we Hat neg wereg lit o kwenangma suma abirangge Hat hapma neg wereg ulug enoluk amag.