Read Ninia Yali MAZMUR 84 Bible Online

MAZMUR 84 - Ninia Yali bible

MAZMUR 84

¹Ap homi en suni wilibi folug enebe ambine urukmu melal-enepuk on fahet, suni unggul unuk: Gitit ai fene felaleg on. It enunggul unuk Korah enap enasuni.

²Nenakni Allah Halong Humon welahen on! Hat hebe welahenma etma re mundoho nenda hambuk deg ma welahen.

³Hat hobam etma fahet an nenda mun fururukmu welahi, ne nendaman inim nebe fam en nim de At Allah mun oluk wereg on ai fahet nawonog hauk kahi.

⁴TUHAN nakni Hebe Halong humon welahen on, Hat hebe raja unduhuk wereg lit an nakni Allah Hat neg welahenma re, suwe ulue famen oho, ne suwe beim famen oho re, Hat hobahet waroho yalduk angge wereg ma mezbah aluluk etma enomalik fahat daukmu fahet ena wiroho enobale hilinggig.

⁵Ne, ap homi Hat hobam olma wereg lit, hundig-hundig Hat hobahet suni motdeg suni neg uruk on etma re mundoho enahayeg wereg.

⁶It ap homi Hat famen neg enomamne kwelap-dauk on etma nim, ne Dom Sion fam etma inil ha laul ulug enendama boruk on nim, etma re mun enahayeg.

⁷It anyo enebe o munmu etma lauk li em de, it laukmu aireg kwe anyo re ahamdoho ik eleruk wilipuk kwe on atuk, ne osit keram belabik waharuk on aire fano angge on neg hoporoho belabik waharuk.

⁸It enebe o Sion At Allah di on su on en leho foruk on anyo ebe enam aik waharukmu etma lauk li em de, it enomamne eke nim dopno uruk.

⁹Nakni TUHAN Allah Homamne Humon welahen on, an den somban uruk kahi on su hesanggo hol nabin, Allah at Yakub akni en hesanggo hol nabin.

¹⁰Nenakni Allah, nit nenowe raja ai fam Haren fanoap debein, ap Haren momaloho unduhuk ferihin on ai Haren along baloho foroho lamin.

¹¹Nukoho 1.000 en fam o amumu wereg ale aire mun maben deg, famen de nukoho misiham Hat hobam olma wereg ale ai neg de mun along. An de ap homi siag duruk on enobam wereg ale aire nerim en ulug de, Hat hobam wirigmu etma sokolma kahaleg lit unduhuk laruhuk ulug momal-dauihik.

¹²Nit nenakni TUHAN Allah aire ebe raja mun andung-dang wereg on deg ma nit nenalong baloho fahat nenusug wereg lit, nit nenobam enda fano en neg enda hundig nenebeheg, leho nenobahakeg, duruk on wereg ma re, ap homi enobabut fam kwasikdoho eke duk eleg angge wereg on fam de, Aren fano ale enobam debeseruk ale fahet erim en ulug embesouk fug alereg.

¹³TUHAN nakni Hat mun Halong welahen on, it ap homi Hat hobam enenda demdoho boruk on etma neg de enahayeg hauk kamag.