Read Ninia Yali MAZMUR 85 Bible Online

MAZMUR 85 - Ninia Yali bible

MAZMUR 85

¹Ap homi en suni wilibi folug enebe ambine urukmu melal-enepuk on fahet. It enunggul unuk Korah on enesuni.

²TUHAN nenakni, Hat de hanggwenang anyo fam hahayeg hauk kahen, ne it ap homi Israel on fam deg latswa ale anyo Haren mundoho buhun-debeserihin.

³It Homaliki en enesiag duswa on etmano re Haren mundoho hapelehapdoho ferihin; iren kwasikdoho dil lauk katswa on etmano re Haren mundoho eleho ferihin.

⁴Haren it enobam holok hang deg lit welatihin on anyo re mun owag oko wauihin mu re; Haren it enobam holok eke foruk kahen fug.

⁵Nenakni Allah, nit nenahap wendat nenepuk kahen on welahenma, Hat holok eke nim nenobahauk fug, nit nenebe fam deg lahe ale ai buhundoho nenobahain.

⁶Haren de mundoho-mundoho fahet holok nenobam ferihin deg, airoho neg holok nenepuk kwit welaruhun a?

⁷Haren nit let-nenepuk kahen ai fam nit Homaliki nenahayeg hauk kamuhuk en de, Haren nit nikangge nenomamne nenobahain.

⁸TUHAN nenakni, Haren henda hundig nenepuk kwit neg welahen ale unug nesakin, Hat fam en nenahap wendare nenobaharuk kahen on ai fam nenahap wendare nenobahain.

⁹Niren sombandoho nikangge siag dik lauk fug halug de hit henenda seroho welamuhup en henobahakuk ulug Aren nit omaliki fam sali wat-nesasimu deg ma re; an de At nenakni TUHAN Allah en ele uruk on ai neg nesanggo holduk katmin.

¹⁰Aren de ap homi wene melaleg furebelug duruk on de demdoho enahap wendat-enebuk alereg, At Allah mun andung-dang wereg on aire nit nenobam suma wereg laruhu.

¹¹Enenda hundig duruk on nim dipdoho neg duruk nim de misigmu ambi atuk kamuhup, ne katukdoho duruk on nim enambong seroho fano wereg on nim de ap en duruk hagdoho mako bug-bug atuk kamuhup.

¹²O kwenangma en ap homi en dipdoho neg duruk ale anyo di angge su angge wilipuk hag laharukmu re, At Allah en katukdoho neg duruk on anyo re bohol fam en belap ha waharuk karuhu.

¹³At TUHAN en de we onggoleg fano on neg nenobaharuk halug de, ai fam nit nenanggwenang fam en anggen yihig fano on og-nesahu.

¹⁴At TUHAN alukwema re katukdoho duruk on ai dam lauk kwit de, kobokwe At fahet hwale feil lauk karuhu.