Read Ninia Yali MAZMUR 86 Bible Online

MAZMUR 86 - Ninia Yali bible

MAZMUR 86

¹Daud en somban ebag on. TUHAN nakni, an de nenggik eleg deg lit nomamne elegdoho deg lahimu re, an den somban uruk kahi on su hesanggo hol naplug, onggo hweag-nimin.

²Haren an henda hundig nusug lit neg welahenma re, an nebe hwal-napuk kwit welamin, an hamingming angge Hat hobam neg nenda demdoho boruk kwit duruk kahi on su nahap wendat nabin.

³TUHAN nakni, an nakni Allah Hat neg welahenma re, an den nukoho hunduko somban Hat hobam uruk kahi on su henda hundig neakin.

⁴TUHAN, An nenda re Hat wereg fil neg hwale ferihikdeg welahimu re, an Hamingming angge nendama nahayehap kwelabe nobahain.

⁵TUHAN nakni, Hat de mun fanoreg lit ap homi enesiag hapelehapdoho foruk ale fahet hambono, it ap homi Hat hobam somban uruk on de, Haren henda hundig hum aleroho fam henda hundig enepuk kwit neg welahen.

⁶TUHAN nakni, an den somban uruk kahi on su fubi nobahalug, let nabin ulug nele hobam hwi hapuk kahi on su hesanggo holin.

⁷Haren de an onggo hweag-nutuk kahen ai fam de, an nebe anggolo-fanggoloroho wereg lit de Hat hobam neg somban uruk kahi.

⁸TUHAN nakni, allah hag ulug amun on wereg on etma Hat welahen higitdeg eke wereg fug, ne Haren duruk kahen etma hagdoho it amu on en eke duk fug alereg.

⁹ TUHAN nakni, ap homi di enunggul unuk su enunggul unuk Haren waldoho feserihin on etmano, Hat handung-dang welahen ale ai fahet mot-habeheg, Hapne weheg, duruk kamuhup en waharuk kamuhup.

¹⁰We Hat Hamu neg Allah welahen, ne Hat de Allah hebe along on wereg lit de, Haren duk fug on etmano neg duruk kahen.

¹¹TUHAN nakni, Hat henda hahayeg boruk kahen ale etma an den dipdoho neg duruk karuhuk en de, Haren mamul nabin, ne an den nenda abirangge en Hat hawene melaleg anyo furebelug neg duruk kamag ulug nobahain.

¹²Nakni TUHAN Allah, an de nenda mundoho abirangge fam Hat dang hapuk kahi, ne Hat hebe halong on welahen ale ai fahet mundoho-mundoho mot-hapuk kwit neg welaruhuk.

¹³Haren de henda hundig mun humon fam henda hundig napuk kwit neg welahenma atlug de, an noluk anyo waratuk on ambilik fam en ohwale nobaharihin.

¹⁴Nakni Allah, ap homi winik-wonog uruk on wilipuk kwit an nowarukoho neg duruk, ap enolok wereg enap enebe esan lohwaleg angge eke en de Hat anyo mel enenda wenggel hea fug anggere, an nebe binggi nowarukoho lit duruk.

¹⁵Famen de, nakni TUHAN Allah Hat de henda hundig nenebeheg, nenelaheg en henda neseheg, hobam lele en fetagdoho duk fug angge welaheg, mun hoporoho henda hundig nenebeheg, dipdoho nenebeheg, neg duruk kahen.

¹⁶An de at nisinga en Hat hobahet neg duruk katsi higitdoho, an den oho Hat hobahet neg duruk kahimu re, An nebe fubi nobahalug henda hundig nabin, nomamneap nobahalug nahap wendat nabin.

¹⁷It ap homi an enerim napuk on etman an Haren let napukmu inil nealug, enenggali amagdoho re, nakni TUHAN Haren eneg angge og-nimin.