Read Ninia Yali MAZMUR 88 Bible Online

MAZMUR 88 - Ninia Yali bible

MAZMUR 88

¹Suni it enunggul unuk Korah on enesuni. It ap homi suni wiliplug urukmu melal-enepuk on fahet, suni unggul unuk: Mahalat Leanot ai feneroho. Hun Heman obam Ezrahi on ai en mamul-enepuk katfag asuni.

²Nakni TUHAN, Allah an nahap wendare nobaharuk kahen on deg lahenma re, o nukohoreg li em de an den Hat hobam nele whi-hwi uruk kwit welahi, ne o hup anggore an den Hat hobam waharuk kahi.

³An den somban uruk kahi on aire Hat hesanggoma aik waharuk lamag, an den hwi hapuk kahi on ai hesanggo hol nabin.

⁴An nebe fam di on su on mun anggolo on etmano neg aik waharukmu welahi; ne waratuk on anyo mun horog sokolma hagdoho aik waharukmu welahi.

⁵An de ap homi enebe waratlug sal-enepukmu wambik lahup on, enomamne eleg atlug[46] wereg on anyo hag deg lahi.

⁶Ap enebe binggi enowatuk mu wareg on sal-enepukmu etmano feserukmu wereg hag, ne ap Haren let esa fug angge, mun wong debeselug hapeleg atuk on hag deberukmu wereg on hag, an ap homi wareg on enesahalimu etmano lin neauihin mu welahi.

⁷An nebe Haren koru ele yaron elma hwik neauihin, ne bohwe ele kwenang habuligmu mun heik deg ma etma hwik neauihin.

⁸Hat holok anyo anggin en an sebe neauk kahen, Hat hobam haro en de an anyo siag atlug wambo ihi.

⁹Haren de an nori-nerekwi ninim balireg on etmano yarap-debeserihin, ne iren de an nebe me enaperoho kumu neauk kamag ulug Haren debeserihin. An de mun maseroho kwelabeg lahimu re wilip aik lahi fug alereg,

¹⁰naouk hauk kahi on au fam de nil mundoho ouk hauk kahi. Nakni TUHAN, hundig-hundig de an de nenggik earoho lahabeg lit, Hat hobam somban eheg, hwi habeheg, duruk kahi.

¹¹Haren de ap homi waratuk on fahet along duruk kahen a? It enoluk inatlug de Hat mot-habuk alereg a?

¹²Haren henda hundig enepuk kahen ale etma fahet ap en it wareg on enebe salegma etma hweag-esa la alereg a? Ne Haren dipdoho neg duruk kahen ale etma fahet ap mundoho enebe eleg aik laukmu etma saharik la alereg a?

¹³O mundoho heik anggoloreg ma etman de ap san eke Haren along on duruk kahen ale etma fahet oluk deg? ite o ap homi en enapeleg atlug laukmu etmano Haren fano ale neg debeseruk kahen on etma furebouk alereg? Mun eleg.

¹⁴Famen de TUHAN nakni, an de Haren let neowag ulug heng-hapuk kahi, nukoho hundig o hubet deg kweleg an den Hat hobam somban uruk kahi.

¹⁵TUHAN nakni, nunggwelug Haren an fotog neauk kahen? nunggwelug horohole an fam en enden atuk kahen?

¹⁶An de nebe dotman angge anggin anggoloroho hauk kweleg waratuk on anyo en hundig ben napuk kwit wereg ma hauk kahi, Haren unggum an nobam ferihin on aire an den wa ale mun anggin[47] anggolo napukmu welahi.

¹⁷Hat holok mun anggolo on ai fam de an nebe luluhundoho nobaharihin, ne Haren mun kahale fouk fug aleroho nobahaik waharuk kahen ai fam de an nebe elehapdoho nobaharuk kahen.

¹⁸Nukoho hundig etma Hat holok anyo re ik fu waharuk on hagdoho an maseroho kwelap-nusug, nalukwe nambol fil, nombandu foma-foma en mundoho walinggoho kwelap-nusug.

¹⁹Nori ninim mun horog deg on etmano re Haren an ninim yarap debeserihin mu re, o heik anyo neg an nasisiroho wereg.