Read Ninia Yali MAZMUR 89 Bible Online

MAZMUR 89 - Ninia Yali bible

MAZMUR 89

¹ Hun Etan obam Ezrahi on ai en melal-enepuk katfag asuni.

²Hat TUHAN en henda hundig neg nenepuk kahen ale ai fahet, an den suni neg uruk-wauk kwit welaruhuk, Haren dipdoho neg nenepuk kahen ale ai fahet li mundoho lahaik-wambuk etma fag-duruk kwit neg welaruhuk.

³An noluk deg de Haren henda hundig nenepuk kahen on aire mundoho-mundoho welaruhu on, ne Haren dipdoho neg nenepuk kahen on aire bohol hagdoho omamnereg welaruhu.

⁴Haren uruk kwit de, “Ap An den momaleg lahi on nim, wene sali watihik, An den de An namingming angge Daud anyo fam hombuk baloho irihik, ne An den uruk kwit de:

⁵ ‘Hat hebe hwerieg laruhunmu aire li mundoho-mundoho etma fahet An den omamneroho seneg laruhuk, ne li lahaik-wambuk etma re hat homaliki hombawi en seneg lamuhup.’ Ulug hweag-itihik,” irihin anyo.

⁶Ai fam de it boholma kabogdeg on etmano en Haren along on dirihin ale ai fahet Hat mot-hapuk, ne Hat TUHAN dipdoho neg duruk kahen ale ai fahet suni yig-hapuk.

⁷Nenakni TUHAN bohol fam etma Hat higit on eke wereg fug; ne it bohol fam etma enoluk wereg on oho Hat hinim ilit duk on eke wereg fug.

⁸Hat de it enebe mundoho horeg eneg wereg on etmano enesahalimu en halong bolug leho hobaharuk, ne it Hat hebe walinggoho houwaham kwe wereg on etmano en mun alongdoho enakol hapuk.

⁹Nenakni TUHAN Allah Mun Homamne Humon, ap sa en Hat homamne welahen ai hagdoho wereg? TUHAN nakni, Hat de di ale su ale fam de mundoho katukdoho neg duruk on welahen.

¹⁰Haren neg ik laut ahum lahaik wambuk angge duruk on sebeleg welahen, ne ik ahum nik-nak aleroho funag-lenggag angge duruk on anyo belabe feheg, duruk kahen.

¹¹Haren de at Rahab[48] olok on ik laut ahummu wereg on anyo unggul bereloho foruk kahen, ne Henggik omamne fam de it Haselei on etmano enalong elehapdoho foruk kahen.

¹²Bohol inim kwenang inim aire Hat honggwareg en on, kwenang suma inim di angge su angge wereg angge ai oho re Haren neg waldoho ferihin mu wereg.

¹³Haren neg il emberim fil utara wal debeheg, il apma fil selatan wal debeheg, dirihin, Dom Tabor inim Hermon inim de Hat hobahet enahayeg en enawonog atuk.

¹⁴Hat hanye welahen on aire mun along deg, ne Hat homamne aire mun yin-hun alereg.

¹⁵Hat hebe raja unduhuk lit melal-enepuk kahenma en indip oboule anyo re Haren hawene melaleg inim, ne Haren dipdoho neg duruk kahen on nim ai. Henda hundig nenepuk kahen ale nim, dipdoho neg nenepuk kahen ale nim aire Hat hobabut duruk fam enamegma hauk kahe.

¹⁶It ap homi enunggul unuk eke, TUHAN Hat hebe haseleg hombagbag anyo fam wereg lit, enahayegdoho Hat hobahet wene kabog-duruk on aire enahayeg hauk kamag.

¹⁷Haren fano ale neg debeseruk kahen ai fam, iren nukoho hunduko etma enahayeg duruk kwit hambuk doho wereg.

¹⁸Haren de nik-nak aleroho nit nenalong ap nenobaharuk kahen, Hat henda fano en nenobaharuk kahen ai fam de nit nenalong atuk kahe.

¹⁹Nit nenalong baloho fahat nenusug on aire Hat TUHAN en momaleg on nakni, ne nit nenowe raja re it ap homi Israel on enakni Allah mun eneg on anyo onggwareg en on ai.

²⁰O indik-endam etma a og-hauk hagdoho fam, Haren hamimingangge mun dipdoho neg duruk on anyo fam uruk kwit, “It ap homi An den lin-esauihik mu etmano en an den ap misig eke momale ferihik, ap misig sehen along on let dirihik.

²¹ An den de at Daud An namingming angge hweaho ferihik deg de, ahalue unggulmu hililoho An den unduhuk ferihik.

²²An nomamne anyo en along baloho welaruhu, An nanye anyo en de at ebe omamneap deberuk karuhu.

²³At de it aselei on en along elehapdoho foruk kamuhup fug, ne it ap homi enolok on en sebeloho foruk kamuhup fug.

²⁴At aselei on etma re An den mundoho elehapdoho fesehuk, it ap homi en at fam enolok foruk on etma An den neg mundoho enowaruhuk.

²⁵An den at fam nenda hundigdoho neg wereg lit obam dipdoho neg deberuk karuhuk, ne at ebere ekenim anyeroho along welamag ulug deberuk karuhuk.

²⁶At ebe raja unduhuk wereg lit melal-enepuk karuhu mu etma re, An den wiriloho re ik Laut Tengah yenggeleg on anyo fam en de Ik Efrat wirig atuk on ai huli debehuk.

²⁷Aren An nobam uruk kwit de, An nakni re we Hat neg, an nalong baloho nobahakeg, nahap wendare nobahakeg, duruk kahen on nakni Allah re Hat neg. Uruk karuhu.

²⁸ It ap raja wereg on etmano maben hag deg kweleg at neg mun leho on debehuk, ne at ebere An namloho wandeba on debehuk.

²⁹An den de li mundoho-mundoho fahet nenda hundig deg lit welaruhuk, ne An den at fam sali wat-itihik on aire mun omamne deg lit welaruhu.

³⁰Bohol au kwenang emberim fil wereg li em etare at ebe raja unduhuk lit neg welamag ulug An den ningdoho seneg laruhuk, li lahaik-wambuk etma at omaliki, inim ombasi nim en neg unduhuk lit welamuhup.

³¹Famen de aren ondohoma on en An nawene welaleg anyo sahale folug, An den diroho diyug suroho diyug ulug hweag-esauihik ale anyo duk ele angge wereg halug nim,

³²An den wene unduhuk ferihik on anyo hole fouk fug angge deheg, ne nawene melaleg anyo embeselug dil laheg, duruk neg halug de,

³³iren wene dahan deberuk ai fam An den unggum enobam feselug yeik enowaruhuk, ne it enesiag ai fam de An den anggin-fanggin humdoho enobam fesehuk.

³⁴Famen de at Daud neg de An den mundoho nenda hundig deg lit neg welaruhuk, An den at fam dipdoho neg deberuk kahi on aire eke dahan debehuk fug.

³⁵An den at ninim sali watuhuk on aire eleho fohuk fug, ne An den at fam sali wat-itihik on etman misig eke nele owag oko wahuk fug.

³⁶An nonggwareg nunuk mun eneg on fahet deg ma re, nele misiham su hombuk balduk kahi on aire li mundoho-mundoho fahet bale foruk kahi, An den de at Daud fam nele laloho eke hweag-uruhuk fug.

³⁷Mo ai wereg li re at ebe raja unduhuk lit neg welaruhu, li lahaik-wambuk etma it at omaliki nim ombasi nim en unduhuk lit neg welamuhup.

³⁸Aren melal-enepuk karuhu mu kerajaan aire bigalem eitog wereg ai hagdoho welaruhu, ne at airoho wereg ma il kumureg laruhu on de anggulog fam etma dipdoho duruk on eke wereg,” ulug irihin.

³⁹Famen de ketia Haren at raja fam holok ferihin deg, ap Haren momaldihin on anyo embesehen deg lin-esehen.

⁴⁰Haren at Hamingming angge nim sali watuhup on anyo eleho ferihin, at unuk leho wereg on anyo Haren sabelepma wendal esehen.

⁴¹At obam kota elehet fak oho on anyo Haren moluluk esehen, hembirangge omamneroho wereg on anyo Haren luluhun esauihin mu wereg.

⁴²It ap homi kwe etmane lauk kwit de angge deloho hwelauk, it ap homi at alulukwe wereg on etman de at ebe fahet bulip-duruk.

⁴³Haren de it aselei on etmano fam enelongge feseruk kahen, ne it a weim etmano enahayeg en neg duruk.

⁴⁴At asehen anyo famen oho re Haren we hesangge angge hag deberihin, Haren de at ebe weim apuk li em let duruk kahen fug.

⁴⁵At along wereg on anyo Haren mundoho ahaebog debeik lauihin, at ebe leho on wereg lit hwerieg wereg on anyo Haren sunukdoho kwenangma belabe ferihin.

⁴⁶Haren de at ebe sauwe wereg ale horohe ferihin deg de, at enggali fam mapnu deberihin.

⁴⁷Nenakni TUHAN, Hat hebe re ke huli heraho lit neg welatmihin? ne Hat holok indok ambulbul hagdoho kulung duruk kwit neg wereg on aure ke huli airoho duruk kwit neg welaruhu?

⁴⁸An nebe noluk welahi on sure mun horogdeg ma welahi ale anyo Haren oho wenggel-hakin, nit ap homi anyo re Haren de we elamna on fahet hwaloho nenobaharihin.

⁴⁹Ap sa en ebe waram fug angge oluk neg welam alereg? ap sa hag angge kwenang sal enepukmu etman lil atlug la alereg?

⁵⁰Nenakni TUHAN Haren kerma Henda hundig nenepuk katihin on anyo eneg angge re ke, Haren at Daud fam Hat hebe dipdoho neg duruk kahen ale ai fahet ulug sali wat-itihin on anyo re?

⁵¹Nakni TUHAN an hamingming angge su ap homi siahap-biahapdoho nobaharuk ale su fahet henda ebet neakin, an de ap homi enunggul unuk-enunggul unuk etmano en sebele nobaharukmu, airoho hauk kwit neg welahi.

⁵²Nakni TUHAN, it Haselei on etmano en de ap raja Haren momaloho ferihin on anyo unuk sebeloho foruk, at ebe di kwe su kwe laukmu re iren enalitno neg duruk kwit wereg.

⁵³At TUHAN ebe mundoho-mundoho etma motdeg neg welamag, airoho neg amag! Amin!