Read Ninia Yali MAZMUR 9 Bible Online

MAZMUR 9 - Ninia Yali bible

MAZMUR 9

¹Ap homi en suni wilibi folug enebe seberoho uruk kwit at Mut-Laben asuni fene uruk katfag on at Daud en ebag asuni anyo.

²TUHAN nakni, an den nenda mundoho en Hat hobam dang-hapuk katmin, ne Haren fulu laleg aleroho waldoho ferihin ale etma fahet de fag-dil noruk katmin.

³Nakni Hat de TUHAN Mun Leho on welahenma re an den hunuk mot-hapuk kahi, ne Hat hobahet de an den nahayeg neg hapuk kam ale duruk.

⁴Hat holohotman de it ap homi haselei on de sombandoho bupa uruk kwit, eneyog unggul dungdoho wat-daukmu waratuk.

⁵Nakni Hat de ap nawene ayo wiroho bilinggi folug katukdoho neg deberuk kahen on deg ma re; ai fam an nawene hobam walug waharukmu an nibil atlug nalong bal-napuk kahen.

⁶Haren de it ap homi di enunggul unuk su enunggul unuk etmano unggum og-eseheg, it ap homi siag duruk on etmano elehap debeseheg, dirihin mu re, ap homi it enebe mundoho-mundoho fahet enapeleg atswa.

⁷Nit neneselei on de mundoho enebe fun heheg lausa, it enobam wirig de mun moluluk-malalakdoho fousama re, ap homi en oho eke it fahet wenggel esa fug alereg.

⁸At TUHAN en leho on wereg lit li mundoho-mundoho fahet melal-enepuk; Aren ap homi kwenangma on suma enawene bilinggoho ayo wiri folug kong-durukmu fahet obale hwerieg wereg ma takhta anyo wiri fesi.

⁹Aren de it ap homi di enunggul unuk su enunggul unuk etma katukdoho neg melal-enepuk; ne it enebe re enawene ayo wiroho bilinggi folug mun bekitdoho neg kong-duruk.

¹⁰At TUHAN aire it ap homi enobam anggin-fanggin feserukmu wereg on fahet enalong baleg wereg ma hag deg. It enendama duk fug aleroho atuk mu halug At apma lahap aik laukmu hagdoho wereg.

¹¹Nakni TUHAN, ap homi hat enoluk deg on de Hat hobam neg enenda ebet husug lit neg wereg, ne it ap homi Hat hapne wauk on de Haren o fotog-esalug lauk kahen fug.

¹²At TUHAN o Sion fam en melal-enepuk kwit wereg on ai neg motdeg welamag! Aren de it ap homi enaouk wereg on fam ebet-enusug,

¹³ne iren nenek duruk kwit wereg ale aire Aren lohon apeleg atuk fug; it ap homi enolok hasimeg duruk on etma re Aren unggum enobam feserukmu re, Aren duruk ale etma fahet de it ap homi di enunggul unuk su enunggul unuk wereg kwe etma mundoho saharik lakiek!

¹⁴TUHAN nakni o! it ap homi naselei on en ouk-bouk ale nobam foruk ale hil neakin; we an henda nealug waratuk on fam etman seneko wilibi nobahaik ma.

¹⁵Ai fam de an den it ap homi Yerusalem on inil hanim Hat mot-hapuk karuhuk en. Haren an nahap wendat-napuk karuhun fam de, an mundoho nahayeg en nawonog atuk karuhuk.

¹⁶It ap homi enunggul unuk enap Hat enapeleg on de, it enonggwareg en kwenang habuli fahat daukmu etmano obuk uruk; ne it enonggwareg en yep deberukmu etmano yohwat-dauk.

¹⁷At TUHAN ebe enamegma enam atuk kwit, Aren de wene mun katukdoho neg kong-durukmu, it ap homi siag duruk on de it enonggwareg en duruk fam ilag uruk.

¹⁸Waratuk on aire it ap homi siag duruk on mel, it ap homi di enunggul unuk su enungguk mel, Allah en uruk on anyo hol-hol neg duruk on mel, enebe mundoho korog aik laukmu.

¹⁹It ap homi enenggik eleg on aire li mundoho-mundoho etma airoho neg welamag ulug enepelehapdoho feseruk fug; ne it ap anggilik-anggoloroho wereg on aire we airoho neg it enenda ebereg eleg angge welamuhup en wereg fug.

²⁰TUHAN nakni, hebe inatlug ap homi enunggul unuk-enunggul on etma enawene ayo wiroho biling enebin, it ap homi enonggwareg en leho fahat dowag ulug embesouk fug.

²¹TUHAN nakni, we it enebe mundoho enakol atlug, nit de ap homi on deg lahe omano re ulug enenda enggat amag.