Read Ninia Yali MAZMUR 90 Bible Online

MAZMUR 90 - Ninia Yali bible

MAZMUR 90

¹Allah amingming angge Musa anyo en somban ebag on. Nenakni Tuhan, nenombasi endag-ail watfag man angge ketia huli etma fahet nit nenebe nenalong bal aik laukmu re Hat hebe welahen.

²Haren dom-dom owan wal-duk eleg kweleg, Haren kwenang inim di angge su angge kwenangma wereg angge inim laloho fouk eleg kweleg, etma Hat de Allah heitog heme hindip mel honggombi mel eleg angge welatihin.

³Haren de, ‘Ap homi omano hinindipmu lakiek,’ ulug, atam deg latfag hagdoho kwenang ahe on amag ulug debeseruk kahen.

⁴ Nit nenebe 1.000 tahun welahe on aire Haren nenenggik misig salim nohoruk kahe on hag boruk kahen; o sono welatuhuk on aire ap en hup anggo il misiham kahaleg wereg on hagdoho deg lahen.

⁵Nit ap homi re nena og-hauk men eleg atuk hag Haren hohohuk nesauk kahen, ne enggela angge ahanuk laharuk on,

⁶o hubet wiliplug enggela wirilduk, famen de o hupmu aik lauk li em halo uruk hag nenobaharuk kahen.

⁷Hat holok en de nit nenebe youk lauk kahe, ne Hat hahummu het fam de nit nenebe mundoho eleg aik lauk kahe.

⁸Niren kwasikdoho duruk kahe on anyo re Haren holohotma foroho welahen, nit nenesiag mun heraho lahe on oho re Hat hilmu mun enameg wereg.

⁹Hat holok en de nit nenoluk we horogdoho neg welahe, tahun nit nenoluk welahe on etmano re enele ahe fu haukmu hagdoho atuk.

¹⁰Nit nenoluk anyo re we 70 tahun huli neg welahe, ne nit nenomamne wereg halug de 80 tahun huli aik lauk. Famen de we anggin on nim ouk-bouk ale on nim neg hauk kahe, nenebe nenoluk il misig hag eta welatlug nit anyo nenebe mun dereng aik lauk kahe.

¹¹Hat holok mun anggolo on aire ap san eke oluk deg? Ite Haren hahummu het-nenepuk fam de ambiangma diroho atuk ulug san enggatdoho wereg? Mun eleg.

¹²Nit ap homi nenenda wenggeleg on atlug welamuhuk en; nenoluk su we horogdoho neg welahe ale ai fahet enggare nenobahain.

¹³Hat hebe watlug nit hamingming angge suma sombandoho nenelaheg nenebik ma. TUHAN nenakni, Hat holok nenobam foruk kwit nunggwenam welaruhun?

¹⁴Nit nenahayeg hauk kwit nenoluk welamuhuk huli etma suni neg uruk kamuhuk en de, hubet hundig Haren henda hundig nenepuk kahen on anyo hilil-halaldoho og-nesakin.

¹⁵Nit nenoluk wereg lit ouk-bouk hauk kwit neg welahe ale eta ilitdoho, Haren nit nenahayegdoho wereg on og-nesakin.

¹⁶Nit hamingming angge su fam Haren di ale su ale alongdoho dirihin on anyo unug nesakin, ne nit nenambiangma endag-amuhup on fam de Hat Homamne Mun fulu-bolan on anyo unug esakin.

¹⁷Nit neneyabuk duruk kahe on etma ambiangma anggen yihig fano on neg hauk kamuhuk en de, Nenakni TUHAN Allah, Haren nit nenebe fanoap nenobahain.