Read Ninia Yali MAZMUR 91 Bible Online

MAZMUR 91 - Ninia Yali bible

MAZMUR 91

¹It ap homi At Mun Leho wereg on fam enalong baleg wereg on inim, ne At Mun Omamne wereg on en sebel-enusugmu wereg on inim en,

²TUHAN fam uruk kwit de, “An nakni Allah nibil atlug nili weheg, nalong bal nabeheg, duruk kahen on de we Hat neg, an den we Hat fam neg nenda demdoho boruk kahi,” ulug uruk kamuhup fano.

³Aren de ap en ling-long angge henowatul ulug duruk men inim, ne ouk henebe nal am on henobam aik waharuk men inim, loloho henobaharuk karuhu.

⁴At ahwerabul en hagdoho hit henobam sambun henusugmu re, At apma hit henakol eleg angge welamuhup; ne dog beiyalni en mapnu henusug lam hag de Aren dipdoho neg henepuk ai fam mapnu-henusug laruhu.

⁵Hiren o hup anggo wene nenobam aik watmisi ulug henakol duk fug, ite o nukoho angge fetagdoho nenowarik wamlusa ulug bouk fug;

⁶ne o mesag, ik fu hag angge o hup deg kweleg wam no ulug oho, ite o nukoho andundureg kweleg hit henebe siahap henepuk on wam no ulug oho, henakol bouk fug.

⁷Hat haluluk en ap enebe 1.000 en waraheg, ne henggik bekit fil etman it enebe 10.000 en on waraheg, duruk kweleg famen de hat hamu neg de hebe fam eke di on su on aik wam fug angge welaruhun.

⁸Ne, haren halulukwe etmano hil fu esahunmu re, ap enolok enap etmano fam onggo ambiangma enobam feserukmu esahun.

⁹Haren de At TUHAN anyo en neg nili og-napuk kamag ulug debeheg, ne At Mun Leho wereg on anyo neg nalong baloho fahat nusug lamag ulug deheg, duruk karuhun ai fam de airoho atuk mu hauk karuhun.

¹⁰Ai fam de hat hebe fam wene di on su on hobam atuk karuhu fug, ne hat hobam wirig on fam oho anggin deg ale eke aik waharuk karuhu fug.

¹¹ Hat hebe di kwe su kwe laukmu halong baloho noruk kamag ulug, Allah en malaikat mon-enebik waharukmu hat kahal husug lit welamuhup.

¹² Hat heyog helep fam dung duk no ulug de, iren enenggik endangenma earoho og-haplug lauk kamuhup.

¹³ Haren de kisu nim, no singa inim sohwan-isil lauk karuhun, ne heyog en de kisu aeg olok on mel singa ket sauwe on mel sobit isil lauk karuhun.

¹⁴At TUHAN en uruk kwit de, “Ap homi An fam enenda hundig napuk on de An den enahap wendare-feseruk karuhuk, ne it ap homi ‘At TUHAN ebe demdoho’ ulug fag-duruk on de An den enalong baloho fahat-enusug laruhuk.

¹⁵Aren an nobam ele hwi napuk halug de, An den oho nele onggo fag utuk karuhuk, Aren nangginik ulug anggolo en duruk li em de, An den at let duruk karuhuk; at ebe An den deloho wilibi folug de at ebe leho foruk karuhuk.

¹⁶At ebe oluk yatdoho welamag ulug homorebeheg, ne ahap wendare feheg, duruk karuhuk,” ulug isi.