Read Ninia Yali MAZMUR 92 Bible Online

MAZMUR 92 - Ninia Yali bible

MAZMUR 92

¹Nukoho Sabat salim kabog-duruk kwit wilipuk suni fahet.

²TUHAN nenakni, Hat hobam niren dang-hapuk ale aire demdoho uk aleroho, ne Hat Allah Mun Leho welahen on mot-habuk ale aire mun fano ale;

³Haren henda hundig nenepuk kahen ale anyo fahet o hubetnam eneluge feheg, ne Haren dipdoho neg duruk kahen ale anyo fahet o hup angge enoluge feheg,

⁴gitar ahale numen hilinggig on anyo kong deheg, binggong gambus mel kecapi mel wareheg, durukmu uruk ale aire sukaleroho.

⁵Haren duruk kahen on ai fam de an nendama nahayehap nobaharukmu re, Haren di on su on waldoho neg foruk kahen ai fam nenda nahayegdoho suni uruk kahi.

⁶TUHAN nakni, Haren di ale su ale duruk kahen on etma re mun along deg, Hat hunggul oagma re mun yatdoho neg wenggelduk kahen!

⁷Ap homi morue on en de furebouk fug alereg, ap homi sohou on en de wenggel-ha fug alereg.

⁸It ap homi Allah ele holda-holda duruk on etmano enggelangge hagdoho hesiloho wilibeheg, ne ap homi enolok on etmano enenggik wereg on aheg, enengge dungdoho kabog deheg, duk alereg; famen ai deg kweleg Hat TUHAN de mundoho-mundoho halong welaruhunmu re,

⁹it ai enebe mundoho elehapdoho fesehup.

¹⁰TUHAN nenakni, it Hat haselei on aire mundoho enebe fun-fandoho fesehun ale mel, it ap homi enolok on mel de mun del-foldoho fesehun ale aire nit mundoho nenoluk deg.

¹¹Haren de an nebe no banteng il bolog on omamne deg hagdoho nobaharihin, ne an nebe fam nahayeg angge neg fanoap nobahakeg, dirihin.

¹²An den de it naselei on enalong eleg amuhup ale aire nil esauk kahi, it ap homi an nowarukoho duruk enap ai en duhuk ale ulug wene siag on neg uruk kwit nabug balswa ale aire mundoho nesanggo holdihik.

¹³At ap homi enobabut bekitdoho neg duruk on de e kurma ahanuk laharuk hag laharuk kamuhup, ne e sin o Libanon en mun hesiliho wilipuk hagdoho wilipuk kamuhup.

¹⁴It aire e TUHAN Obam wirigmu yaho foruk on hag, ne nit nenakni Allah anyo obam wirigmu etman log atuk on hagdoho deg lamuhup.

¹⁵E endam ahan famen anggen yihiruk kwit, enggela hesiloho oluk wereg anyo hag deg lamuhup.

¹⁶Ai fam de At TUHAN aire mun katukdoho neg duruk; ne At de an nili oko nibil atuk on wereg ma Aren hwenaroho eke duk fug alereg anyo eneg atuk karuhu.