Read Ninia Yali MAZMUR 94 Bible Online

MAZMUR 94 - Ninia Yali bible

MAZMUR 94

¹TUHAN Allah nenakni, Haren de ap homi en duruk onggo dipdoho neg debeseruk kahen, Haren onggo higitdoho neg debeseruk kahen ale unug nesakin nakni TUHAN.

²Hat hebe inatlug ap homi mundoho o kwenangma wereg on suman, it enawonog atlug duruk on ai iren duruk ale higitdoho ambiangma unggum enobam fesein.

³TUHAN nakni, ap homi enolok on etma re ke huli enahayeg hauk kwit neg welamuhup? TUHAN nakni, ke hulien abi?

⁴Iren de enele mun hape on neg wilibik waheg, ne iren siag ale duruk on anyo fahet enawonog aheg, neg duruk.

⁵TUHAN nakni, iren de it ap homi Hat homaliki etmano enomamne fam sebel-enusug laheg, ne ap Haren momaloho unduhuk ferihin on anyo sobit-sabat eseheg, duruk.

⁶Iren de homi sohwe on mel, omalik wetien-soareg on mel, binggi enowareheg, ne ap bohon o kwenang su fam wereg on etmano enowareheg, neg duruk.

⁷Iren uruk kwit de, “TUHAN en de il nesauk fug, At Yakub akni Allah anyo en de fubi nenobaharuk fug,” Ulug uruk kwit duruk.

⁸Yaho hit ap homi an nunggul unuk on en de mun morue aireg ale aire duk fug, henunggul owag fam wenggel-halug neg duruk ale fahet mamul dakiek!

⁹At Allah en neg nenesanggo wal-debesimu re, At esanggo holduk fug a? Holduk neg. Aren neg ninil wal-debesimu re, At il nenesauk fug a? Nenesauk neg.

¹⁰Aren neg di enunggul unuk su enunggul unuk mamul-enepukmu re, Aren unggum og-esa fug alereg a? Og-esa alereg. Ap homi mundoho fahet At ebe guru wereg ma re, At fam wenggelduk on wereg fug a? Wereg neg.

¹¹ Nit ap homi mundoho en wenggelduk kahere At TUHAN en mundoho nenesaukmu re, Mun abirangge re we alemaroho hagdoho neg deg.

¹²TUHAN nakni, ap homi Haren mamul-enepuk kahen on etma nim, Haren hawene melaleg anyo mamul-enepuk kahen on etma nim, enahayeg hauk kamag.

¹³Anggin on obam aik waharuk li em, ap siag duruk on senetul en ulug kwenang bohwe habuloho duruk huli en etma Haren at endama hambuk deberuk kahen.

¹⁴At TUHAN en de At omaliki lin-esalug lahu fug lit deg, ne Aren de onggwareg angge on deg ma wong debehureg duruk karuhu fug lit deg.

¹⁵Ai fam de wene melaleg anyo o wene katukdoho baldukmu etmano en eke nim omamne deberukmu, it ap homi enobabut bekitdoho duruk on en de ele leheruk kamuhup.

¹⁶It ap homi Allah ele dahandoho duruk on etma fam en de ap sa en an nili og-nabuk alereg? it ap siag ale duruk on fam en ap sa en an nibil am alereg?

¹⁷At TUHAN en an let-napuk kalep fugmen de, an nebe ap homi waratlug laukmu etmano aik lele lit deg.

¹⁸An den nendama wenggel-hauk kwit an nebe waroho ying-atmin boruk li em de, Hat TUHAN en henda hundig napuk kahen anyo fam an nebe hambukdoho unduhuk welahi.

¹⁹An nenda firatlug nape nong-hongdoho wereg li em de, Haren neg onggon nabeheg, nahayehap kwelabe nobahakeg, duruk kahen.

²⁰Hat de it ap Hakim enolok enap etma inim mang-mangno duruk kahen fug, it ap wene melaleg fam wereg ale higitdoho ulug siag ale on fahet duhuk ale ulug wene melalduk on nim seberuruk kahen fug.

²¹Iren de enele misig seberoho maho folug ap bekit duruk on anyo inim inil duruk, ne iren de ap siag duruk eleg we obahare on anyo binggi watuk.

²²Famen de an nili oko nibil atuk on de At TUHAN neg wereg, ne an nalong bal-napuk on de we Allah neg wereg.

²³Aren de ap siag duruk on it enesiag duruk ale higitdoho unggum og-esauk, ne it enesiag ai fam de Aren neg it enambilik lare foruk. Nit nenakni TUHAN Allah ai en neg it enambilik lare foruk karuhu.