Read Ninia Yali MAZMUR 95 Bible Online

MAZMUR 95 - Ninia Yali bible

MAZMUR 95

¹Yaho, niren At TUHAN obahet suni ukohon, nit nenahap wendat nenepuk on ai obahet henawonog en diek!

²Niren At olohotma suni dang duruk suni il akit lakohon, suni At mot-duruk suni uruk kwit henawonog diek.

³At TUHAN aire Allah mun andung-dang wereg on deg ma anggere, At ebere it dewa etmano sebeleg kweleg raja mun leho on wereg ma anggere.

⁴Aren de kwenang ilonggoma mik-mag erahamu en yat deg kwe mundoho oluk deg, dom-dom funureg on etma oho re Aren on neg.

⁵Ik laut yenggeleg on ohore Aren neg waldoho feseimu re Aren neg sebeleg wereg, ne kwenang ambuema kwenang wereg on etma ohore At enggik en neg wal-debag.

⁶Niren At TUHAN wal-nenepfag on anyo alukwema, nenelenggen dimirebelug apne wakohon manik.

⁷ We At neg nit nenakni TUHAN Allah wereg, nit de At omaliki Aren hwal-nenepuk on welahe, At ebe gembala hagdoho wereg lit nit At an domba hwal-nenepuk on hagdoho welahe. Henombasi en o Meriba mel, o Masa leimu mel, wereg lit,

⁸ enobam haro atlug, Allah wene nenerim ulug Allah olokapdoho hundig-hundig abut baleheg neg hweag-itil lebag hag, yoho re Allah en wene hweag-hesaukmu holdil lauk kwit: “Nenerim ulug henobam haro am fug.

⁹An den di ale su ale etmano durukmu inil neauk katswareg en, etman An nabut baleheg neg duruk katswa.

¹⁰Tahun 40 en hoporoho An den it fahet me naperoho kumu-esauk katihik; airoho kumu esauihik deg, An den uruk kwit de: Dik-demdoho ap homi enunggul unuk su enap de dipdoho duruk eleg! An den diroho diyug-suroho diyug ulug hweag-esauk kahi on anyo sahale folug neg duruk.

¹¹ Ai fam de An kel wat-dauk kahimu, hit ninim kel wat-da kuhup fug ulug, nolok en yeng baloho hweag-esauihik,” ulug ebag.