Read Ninia Yali MAZMUR 96 Bible Online

MAZMUR 96 - Ninia Yali bible

MAZMUR 96

¹TUHAN obahet suni keron wiliplug iek! Hit ap homi mundoho kwenangma welahep on abirangge etman TUHAN obahet suni wilibiek!

²At TUHAN obahet suni wiliplug uruk kwit At neg mot-diek; Aren nit nenahap wendat-nenepsi ulug nukoho hundig-hundig wene enahayeg on ai saharuruk kamek.

³It enunggul unuk-enunggul unuk on etma fam At ebe andung-dang wereg ale anyo fahet dindilduk kamek, Aren ap homi enobam fulu-bolan ale duruk on anyo fahet lisuruk kamek.

⁴At TUHAN ebere humon wereg ma, mun motdeg neg wereg, dewa omano sebeleg hag deg kweleg At neg de alongdoho henakol boruk kamuhup.

⁵It ap homi enunggul unuk amu on en dewa mot-duruk on etma re kembu ahut aeg, famen de At TUHAN aire bohol wang deg on etlendi wal-debag on.

⁶At obam de along wereg ma mun buhun-bahan deg, At ebere andung-dang wereg ma seleg ombagbag obam sahalireg.

⁷ Yaho hit ap homi mundoho en At TUHAN neg mot-diek, At omamne wereg ale fahet nim, andundang wereg ale fahet nim mot-diek!

⁸At unuk mun eneg wereg on ai neg mot-diek, At obahet di angge su angge og-utuk angge walug At obam wirigmu kwik manik.

⁹Hit mundoho en TUHAN apma henelenggen dimi-debelug henasum TUHAN obahet[49] duruk kwit wan-duruk on lahaboho At apne wakiek! Hit ap homi o kwenangma sum welahep on At olohotman henowag elek duruk kamek!

¹⁰Hiren ap homi enunggul unuk amu on fam hweag-esauk kwit de, “TUHAN aire ebe raja wereg! kwenang de mun hambukdoho unduhukmu re elek-felek uk fug alereg; Aren ap homi kwenangma wereg on katukdoho neg enawene bilonggoho ayo wit-enepuk,” ulug uruk kamek.

¹¹Bohol inim kwenang inim henahayeg diek! ik laut inim ik ahummu wereg angge inim en henamit-mit diek!

¹²Lei inim enggelangge leimu wilibig on inim en henahayeg diek! E enggelama wilibig on en enawonog atuk kamuhup.

¹³At TUHAN ebe o kwenangma melal-enebikoho waharukmu re, Aren de ap homi kwenangma wereg on katukdoho neg enda bekit fam enawene bilinggi folug ayo wit-enepuk karuhu.