Read Ninia Yali MAZMUR 97 Bible Online

MAZMUR 97 - Ninia Yali bible

MAZMUR 97

¹At TUHAN aire ebe raja deg ma re it ap homi kwenang fam wereg on en enahayeg deheg, it ik alo anggen kwe wereg on etmano en enahayeg deheg, duruk kamag.

²Anggulog inim, heik inim en de At ebe maseroho kwelabeg; At ebe leho on wereg lit melal-enepuk on ai fam en oboule indip wereg on de Aren wene katukdoho neg duruk on ai mel Awene melaleg wereg on ai mel.

³At olohotman de indok ambulbul fululungdoho lauk kwit de, it Aselei on At maseroho etmano mun han werag-enepuk.

⁴At aoeal ambogbag en de o kwenangma seleg duruk, At ebe halug de alukweman kwenang akol en owag kwel duruk.

⁵At TUHAN o kwenangma abirangge fahet along on wereg on anyo olohotma etman de dom-dom omano hendali hagdoho nunum-nunum eleg atuk.

⁶Bohol en de Aren katukdoho neg duruk ale anyo fahet fag-durukmu re, At Aseleg wereg ale anyo it ap homi kwenangma on en inil hauk.

⁷Ap homi mundoho en kembu apne wauk on etma re it enenggali ware fesehup, di angge su angge we indip eleg angge fahet anyo fam enenda dip-debelug duruk on etma oho enenggali amuhup; ne kembu dewa mundoho oho re[50] At TUHAN apma neg sebelug apne wauk kamuhup.

⁸At TUHAN en wene kongdoho uruk ale anyo it ap homi Sion fam wereg on en nim, it ap homi o Yehuda on wereg ma kota etma wereg on en nim, enesanggo hol hahupdeg de mun enahayeg hahup.

⁹Nenakni TUHAN Hat neg de o kwenangma suma halong wereg on welahen; Hat hebere handung-dang wereg lit it kembu dewa omano sebeleg kweleg Hat neg leho welahen.

¹⁰At TUHAN en de it ap homi At omaliki on etmano enalong baloho fahat enusug wereg, ne Aren de it ai ap homi wene melaleg sahaloho folug duruk on enenggikmen loloho wilibi feseruk; anggere hit ap homi TUHAN fam henenda hundig deg lahep on halug de siag on duruk ale fahet henalitno duruk kamek.

¹¹It ap homi enendaman demdoho neg duruk on fahet seleg lahabik waharuk karuhu, ne it ap homi bekitdoho neg duruk on fahet de enahayeg on neg ename feseruk karuhu.

¹²Yaho hit ap homi henendaman bekitdoho neg duruk kahep on, At TUHAN en duruk ale ai fahet henahayeg duruk kamek, ne At Allah mun eneg wereg on ai fam dang duruk kamek.