Read Ninia Yali MAZMUR 99 Bible Online

MAZMUR 99 - Ninia Yali bible

MAZMUR 99

¹ TUHAN aire raja wereg; ap homi di enunggul unuk su enunggul unuk de enowag elek duruk. At ebere malaikat on enunggul unuk eke kerub [51] ai enemberimmu takhta fam hwerieg wereg, ne kwenang de mil duruk.

²At TUHAN ebere o Sion fam etma along wereg; ne At de it ap homi enunggul unuk-enunggul unuk mun sebeleg kweleg mun andung-dang leho lit wereg.

³Iren de At unuk mun seleg ombagbag wereg on ai neg mot-duruk kamag. At ebere siag on eleg angge eneg wereg!

⁴Hat de raja hukum henda hundig duruk kahen on deg lahenma re, Hat hobam neg halong on wereg; Haren neg demdoho wene anyo omamne deberuk kahen, ne Haren de it ap homi Israel on wereg ma etma katukdoho neg deberuk kwit, hukum anyo fam higitdoho neg duruk kahen.

⁵Nit nenakni TUHAN Allah ai neg leho foruk kamek, At ebe siag eleg angge eneg wereg ma re, At ebe takhta fam hwerieg wereg ma etma apma sebe uruk kamek.

⁶At omaliki imam de Musa, Harun mel, ne at Samuel de TUHAN fam somban uruk katfag on. It etan de At TUHAN fam enele hwirurukmu, Aren ele onggo hweag-esauk katfag.

⁷ Henanggulog fam en Aren it fam ele hweag-esauk katfag, iren de Aren wene melaleg uruk on anyo inim, diroho diyug suroho diyug ulug hweag-esauk on anyo inim holoho neg duruk katfag.

⁸Nenakni TUHAN Allah, Haren neg it homaliki fahet hele onggo hweag-esauk kahen; it enesiag duruk fam Haren it enobam unggum og-esauk katihin famen de, iren de Hat hobahet de Allah nenesiag apelehapdoho foruk on boruk.

⁹Nit nenakni TUHAN Allah aire siag eleg angge mun amu eneg wereg ma re, At anduk mun amu Eneg on[52] wereg ma etman at apne wakiek, nit nenakni TUHAN Allah ai neg leho feyek.