Read Ninia Yali AMSAL 1 Bible Online

AMSAL 1 - Ninia Yali bible

AMSAL 1

¹ Ap homi Israel on enowe Raja Daud anyo amloho Salomo anyo en wene di ale su ale fahet diroho duruk kamuhup ulug komo ale ebag on de su.

²Wene ebe re diroho fahet ebag: Enenda enggatdeg wereg ale mel, eneluk wereg lit fano duruk ale mel, wene amu angge fene hwena wak lalug uruk on ai ebe mel diroho ulug, eneluk amuhup bebagdeg hweag-esebag.

³Wene komo enepfag on aire, it ap demdoho neg duruk on mel, enenda wenggeleg on mel, bekitdoho duruk on mel, demdoho duruk on mel etma fano eneluk amag bebagdeg komo enepfag.

⁴Airoho hweag-esaukmu re it ap eke enenda kahaleg eleg on etman furebeheg, ne ap homi sauwe on airoho hweag-esaukmu enoluk atlug ap enenda wirik on en wenggelduk hag amag ulug ebag.

⁵Komo ale etma fam de enenda wenggeleg on eke nim eneluk aheg, it di wene su wene mamulswa on de eke nim melal-enebeheg duhup.

⁶Ai duruk fam de it en wene wereg ale mel, heraho wereg ale omano ebe su ale fahet wereg ulug eneluk aheg, enenda enggat enap en uruk ale mel eneluk aheg duruk kamuhup ulug ebag.

⁷ Eneluk enggat on amuhuk boruk kwit, halug de, atam-dam de TUHAN along boruk kwit, At fam neg enakol boruk kamuhup. It ap morue on en de, enggat ale anyo hweag-esauk ale enerim boruk.

⁸Hat hakni hisinga en hat hobam uruk ale etma furoho holiyug, namloho.

⁹Iren de wenggeleg ale hat hweag-hutuk ale etma re, halili angge hag helaha ma bug deheg, siong hag hamigmu wan-deheg, dakiyug.

¹⁰Ap siag duruk on en namloho hat hendama kwelap hapuk halug de, iren hendama kwelapuk ale etma haren duruk kam fug.

¹¹Ne, iren lahe uruk kwit de diroho uruk kamuhup lit deg, “Nit ap homi herarik lauldeg de ebe yeik irik-erapdoho watul. Ne, niren we men-men angge lakohon ma. Nit we elalin lauldeg ap ai siag duruk eleg on famen, dilip-dalapdoho watul.

¹²Ketia it de enahayegdoho enebe ouk eleg angge fano wereg famen de it fobik de ap ouk en waram ale duruk on hag duruk kamuhup.

¹³Niren it enangge onggo along angge etma del dahukmu re, nit nenobam etma di angge su angge huhul hwelahuk on etman hoporeg laruhu.

¹⁴Aireg ma re nit nim seberoho laul deg enangge herahakuk on aire nenebe ilitdoho yohwan duhuk anggere lakohon ma!” Uruk kamuhup.

¹⁵Anggere namloho! Ap airoho uruk on nim de lauk kam fug. Ne, hat hebe re it nim horogma wereg lam fug.

¹⁶It de siag ale duk fug anggere enebe yamukdoho wereg fug. Iren de folo-folo enowatla boruk.

¹⁷Suwe famen ohore enameg it enolohotma yepdeg halug de sabu fam kuruk fug aire enamegma yep deg ma atlug de

¹⁸Ai famen de it siag duruk on etman de enonggwareg fahet sabu yep-dauk mu yoma enesug lit wereg ai.

¹⁹Demdoho ap enangge heradauk kwit, enolok en hape fam heraril noruk on de enonggwareg enebe fam onggo baluhup.

²⁰ Yaho, enda wereg en kwebene hwi henebil lauk on mel bumbuk elman hwiruruk on mel etma holduk kamek!

²¹Aren sokole kwe etman nim, ap homi humdoho kabog-duruk kwe etma nim en hwiruruk ai:

²²“Yaho hit ap sohou on yei, kea huli hit de airoho neg duruk kamuhup? Hit bok amuhup salim de ke li em waruhu? Eneluk enggat atuk ale omano seramap deheg, hweag-hesauk on etmano henerim en embeseheg, duruk kahep ale etma re nanggig li em bale fohup?

²³An den bet henepuk halug de holduk kamek, airoho holduk halug de an nendama heraho lahi ale ebename feheg, noluk deg lahi ale hweag-heseheg, duhuk.

²⁴Hit de an den mundoho wol-henepuk kahi famen hit holduk ale henerim deg ma, domako embeselug henape wong deberuk kahep.

²⁵An den komo henepihik on abirangge furoho wauhup fug, ne, bet henepihik on de hit en domako embeseruhup.

²⁶Aireg ma hit henebe alemat atuk mu re an de unda yag henepuk karuhuk. Ne, hit henakol en duruk li em de an den oho hit bilip henepuk karuhuk.

²⁷Yu, hit henobam hol sielu en henowarik waharukmu hag ouk-bouk henobam aik waharukmu henobam si ulug ouk en nenek duruk li etma an den bilip henepuk karuhuk.

²⁸Airoho duruk li eta hiren an wol-nabuhup famen, an nele onggo hweag-hesahuk fug. Hiren an hera nabil di kwe su kwe lahup famen, hiren an hweag-nabuhup fug.

²⁹Hit de ap homi enoluk ale hwelauk ale enerim on mel, ne TUHAN ele holoho neg duruk ale ko on mel en duruk ale hag duruk kahep.

³⁰Hit de an den kimi-komo henepuk kahi ale etma re wauk kahep fug, ne an den bet-henepuk kahi on etma fureberuk kahep fug.

³¹Ai fam de, hiren wene siag ale duhuk on ulug wenggeloho feheg, ne hiren duruk kahep ale etma mel fam ambiangma hinil hahup lit deg.

³²It ap duruk ale eneluk deg fug on etma re an den uruk kahi on anyo embeselug duruk ai fam waramuhup, ne ap sohou on de an nobam enape wong debelug duruk etma fam mun siag amuhup.

³³Famen de ap eke en an nele hole folug furoho hwal-dauk halug de ap ai oluk welaruhu. Ne, at de ebe enda yamukdoho akol eleg angge welaruhu,” ulug uruk ebag.