Read Ninia Yali AMSAL 10 Bible Online

AMSAL 10 - Ninia Yali bible

AMSAL 10

¹Hun Salomo en wene komo ale ebag on de su: Omalik enda wenggelegdoho duruk on akni ahayeg hauk Famen omalik eke morueroho duruk halug de, isinga enda ouk atuk.

²Ap homi enangge lal heheg hwelalug enggik wereg on atuk on ai fam ambiangma fano on hwela fug alereg, famen de it bekitdoho duruk on neg de enahap wendat atuk.

³TUHAN en ap homi fano on obokdoho welamag ulug fotog-esauk fug; Famen de ap siag duruk on de iren di angge hwelaul boruk on ai duk no ulug Aren kwe bale feseruk.

⁴Ap ko on ai enggik eleg atuk kwit welaruhu; ne ap amururu on de enggik weregdoho neg welaruhu.

⁵Ap enenda wenggeleg neg duruk on de anggen dahanduk salim anyo andogdoho fahat-dauk, famen, ap ko on de anggen dahanduk salim noho neg nohorukmu, onggwareg enggali ap kwelap-dauk.

⁶Ap fano on ai angge fano ap deberuk angge humdoho hwelauk; famen ap siag on en enelok wereg alere enendama heraho lit wereg.

⁷Ap fano on enenuk fanoap enepukmu ebereg wereg famen ap siag on folo-folo enapeleg atuk.

⁸ap hebeleg on en de komo ale humdoho omano abirangge wauk; ne ap ele morueroho matuk on ai ambiangma nong-hong uhu.

⁹Ap bekitdoho duruk on de ebe akol eleg angge wereg; ap seiale duruk on de fobik fag atuk.

¹⁰Ap eke en demdoho wene herahoma foruk halug fobik anggolo hahu; ne ap eke en anamegman wene fagmiroho uruk halug de ai fanoroho wereg ale hera duruk karuhu.

¹¹Ap fano on enembilik men enele mag haukmu re eneluk enahayegdoho wereg ale fahet wilipuk; famen ap siag on enembilik mu en wene uruk on etma re enendama wene siag on heraholit wereg.

¹² Enerim enepuk ale ai fam de ap inim yeik suahal uruk ai; ne enenda hundig boruk kwit halug de, siag ale mundoho omano enapelehapdoho embeseruk.

¹³Ap eke wenggelduk ale mun siseroho deg halug ele oho wenggeleg on en ele neg matuk; ap morue on halug de fetnangge waruk men neg fano.

¹⁴Ap enda wenggeleg on en de wene oluk atuk on etmano kabog-dauk; ne ap morue on ai ele matuk fam onggwareg yoma-dauk.

¹⁵Ap angge humdoho wereg angge omano en ap dungon along baloho foroho lit wereg; enangge di angge su angge eleg ai fam de ap ko on atlug wereg.

¹⁶Ap fano duruk on halug de ambiangma oluk mun ahayeg fam wereg; ne ap siag duruk on halug de ambiangma re siag humale neg duruk.

¹⁷Ap eke en komo ale fano wauk karuhu on halug de oluk fano ahayegdoho welaruhu famen; ap eke en siag duruk ale omano fag-duruk ale erim on de anggin obam aik waruhu en horogma wereg.

¹⁸Ap eke en ahummu erim boruk ale endama heraho foruk halug ap ai seiale on; ap eke ele en seiale wene saharil lauk halug de ap ai mun morue on.

¹⁹Enele humdoho matuk halug de siag humdoho am alereg; Famen ap eke en ambilik anggen il wat-dauk halug de ap ai enda enggat on wereg.

²⁰Ap fano on en ele matuk ale aire perak ebe on hag; ap siag on en enenda wenggelduk ale etma we alemaroho neg.

²¹Ap fano on en enele matuk on etma re ap abirangge fanoe feseruk ale fahet uruk; ap morue on en sohou-sohou ale matuk on etma enonggwareg wat-dauk.

²²TUHAN fanoapdoho og-esauk angge fam neg de ap dung am alereg; yabuk humdoho enomamne fam duruk anyo fam enangge eke dopnoroho humap dobahat da fug alereg.

²³Ap morue on ai siag duruk ale neg enahayeg boruk; famen ap enggat on ende wenggeleg ale neg enahayeg fam hera duruk.

²⁴Ap endama mun fano deg on ai at ambono boruk angge ai hwelahu; ap olok on ai mun akol en amelmel duruk angge etmano hwelahu.

²⁵Ap olok siag on ai hol sielu furoho elahap debesehu: famen ap bekitdoho duruk on de hambukdoho uduhuk men neg mundoho-mundoho welaruhu.

²⁶Ap ko on mingming enebuhup men de henolok ap kwelabuhu anggere miming-duk fug; ap aireg on en unduk olok angge naukmu enaeg lil deheg, ne hobu en inil asig hute deheg, duruk hag hahup.

²⁷Hat TUHAN along bolug leho foruk karuhun halug umur yatdoho welaruhun; famen ap olok siag on de umur owan deg kweleg wararuhu.

²⁸Ap fano on enda ebereg anyo fam fano ahayeg aruhu; ap olok on enda ebereg aire we alemat aruhu mu eleg laruhu.

²⁹TUHAN de ap beliktdoho duruk on along baloho fahat-enesug, famen de ap siag olok ale duruk on aire elehap debeseruk.

³⁰Ap endama bekitdoho neg duruk on de fobik eneluk fano lombukdoho welamuhup: famen de ap enolok on de it enenggwenang finggi angge og-esasimu omano welamuhup fug.

³¹Ap enenda bekit on en enele enggatdoho matuk; famen it ap onolok on enelere enambilik anggen handohwal deg lit ag-fag hauk kamuhup.

³²Ap fano on enele etma enahummu heyalukwag ulug uruk; famen ap olok on ele ai enenda ouk amag ulug neg uruk.