Read Ninia Yali AMSAL 11 Bible Online

AMSAL 11 - Ninia Yali bible

AMSAL 11

¹TUHAN en ap ilit angge hwenaroho ilit-hauk on ai erim boruk; famen ap bekitdoho ilit-hauk on neg de At ahayeg deg.

²Ap winik-wonog uruk on etma maben deg ulug uruk kamuhup; ap enenda sebeleg on etma enenda wenggeleg on wereg lamuhup.

³Ap fano on de, bekitdoho duruk on ai en melal-enepuk karuhu; famen ap seiale lal enepuk on ai sohou ale duruk on ai en elehap debehu.

⁴Waratuk on fil atuk kwit halug enangge mel hwelahup fug; angge di angge su angge etmano fano angge on eke am fug alereg; hat henda hat bekitdoho duruk karuhum ai fam neg de hahap wendareg laruhu.

⁵Kobokwe ap demdoho on en lauk kwe anyo re enamegdoho duruk anyo fam doaleg wereg; famen ap olok siag on lauk kwere onggwareg elehapdoho fahat dahu angge fahet lauk.

⁶Ap bekitdoho duruk on enda bekit deg ai fam ahap wendat aruhu; famen ap lal-enepuk on de enenda nauk anyo fam elehap debesehu.

⁷Ap olok on waratuk kwit de enda ebereg on inim wararuhu; enonggwareg enomamne fam neg dip-debelug wereg halug ai ambiangma welaruhu fug.

⁸Ap demdoho on de anggolo degman oho enahap wendat enebuhu; ap enolok on de anggin on hum ale enobam aruhu.

⁹Ap siag on enele matuk on ai re elehap enepuk on; ne ap enda enggat on en de enahap wendaruhu.

¹⁰Ap bekitdoho duruk on angge fano angge hwelauk halug ap homi o kota etma wereg on abug saha-faha hauk. Ap olok on waratuk halug ap homi enahayeg duhup.

¹¹Ap bekit on fano angge wasi on fam de kota melal-enepuk karuhu; famen de ap olok on ele fam de siahap atuk karuhu.

¹²Ap amu on eke en eke alitno duruk halug de ai mun morue on en duruk ale; famen ap endaman wenggele folug duruk on halug di ale su ale uk fug eleg bok wereg.

¹³Ap eke wene enele ulug walug on fahet fag-dil lauk on en de wene heraho ale ulug eke foroho fug; famen ap eke demdoho boruk halug heraho ale sebeloho foruk.

¹⁴Ap melal-enepuk on wereg fug halug ap homi enunggul unuk wereg siag am alereg; famen de it wene komoroho hweag-esauk on hum atuk halug ap homi enahap wendareg welamuhup.

¹⁵Ap amu on fam baleg angge onggo bal-huruhuk ulug sali balug halug de aire bolan ale aik waharukmu hauk ale fahet; fano liogdoho welamuhuk ulug de wene ai nim heta-beta uhup fug ai fano.

¹⁶Hwe enda wenggeleg fano on de ap homi en leho foruk welamag; ap olok fam-fam duruk on de angge dung amag ulug kabog-dauk.

¹⁷Ap enda fano on ai onggwareg fano ap dauk; ap olok on onggwareg alemat-dauk.

¹⁸Ap olok on ambiangma dopnoroho hwelauk angge aire alemaroho; ap fano on en ambiangma dopnoroho hwelauk angge neg de enenda wenggeleg angge hwelauk.

¹⁹Ap eke en ningdoho duruk kwit fano ale duruk halug ai oluk fanoroho welaruhu; ap eke olok en siag ale duruk halug de ap ai waratuk on fam lauk.

²⁰TUHAN en ap enenda olok on erim enepuk, famen aren ap enoluk siag ale eleg angge wereg on enda hundig enepuk;

²¹Ap enolok on aire demdoho unggum hwelahup; Famen ap fano on enehap wendat amuhup.

²²Hwe eke enda wenggeleg eleg on en ebene buhun-dauk on etma re enesanggoma angge emas on eke wam abiangma kwelabe foruk hag duruk.

²³Ap demdoho on en enenda boruk on ai fano ale ambiagma re atuk; famen ap siag on en ebereg alere we suahal neg ebereg.

²⁴Ap eke re og-esauk ale ahayeg deg lit og-esauk kwit neg wereg, famen enggik wereg atuk kwit neg wereg, famen it foman airoho duk fug angge bug hauk kwit neg wereg on de ebenaheg enenggik eleg ail kuruk.

²⁵Ap eke en humdoho og-esauk halug at angge ai bulel heg wamburuk kweleg hwelauk karuhu, ap eke en ap eke let esauk ale ahayeg boruk halug at oho let hahup.

²⁶Ap eke en angge kabog-dauk kwit neg wereg halug ap homi en hururung duhup; famen ap eke en onggo wauk halug ap homi en wel-duruk kamuhup.

²⁷Ap eke en abiroho fano duruk halug ap homi enehayeg obam foruk kamuhup; ap eke olok ale neg duruk on halug anggin on obam foruk kamuhup.

²⁸Ap eke en at angge enggikmu angge fam neg dip deg lit wereg halug enggela bug on loloho wamburuk hagdoho wambuhu; ap demdoho on de asimit keron wilipuk hagdoho sililim duhu.

²⁹Ap eke en obam homia elekwe siahap duruk halug de angge mundoho eleg aruhu; ap morue on en ap enggat on enobahet duruk karuhu.

³⁰Ap fano on de enoluk hwalegma neg wereg laruhu; ap enggat on de at ombolim lauk on hum amuhup.

³¹ O kwenangma suma ap fano on oho onggo hwelauk halug; demdoho it enolok siag on oho enesiag onggo hwelahup.