Read Ninia Yali AMSAL 12 Bible Online

AMSAL 12 - Ninia Yali bible

AMSAL 12

¹Ap eke noluk humon alep ulug ahayeg boruk on en halug de komo duruk on ai ahayeg boruk; famen de ap komo duruk ale erim boruk on halug de ai sohou ahun on welaruhu.

²Ap fano on fahet de TUHAN ahayeg duruk; famen ap siak olok ale duhuk on ulug abug uruk halug de siag onggo hwelahup.

³Ap misig siag duruk de asiag fam neg unuk bogdeg weregman welam fug alereg; famen ap demdoho on de dalo duk fug angge bik-bok unduhuk.

⁴Ap ohwe fano on aire ahun endama nohorukmu hemetdoho ahayeg duruk hag; famen ohwe en ahun enggali atuk ale duruk halug de ai ouk enowagma kwil lauk kwit yendetil kuruk hag ahun airoho deberuk.

⁵Ap bekitdoho duruk on en de wene fano ale fahet wenggeloho foruk; famen ap olok ahun ai en de wene seiale on neg wenggeloho foruk kwit wereg.

⁶Ap bekitdoho duruk on enele uruk on de enahap wendaratuk; it ap siagdoho duruk on enele anyo re mun sebeloho neg foruk.

⁷Ap siag on ai bule humon enobale eleg angge wambuhup famen; ap demdoho on hundig-hundig bik-bok unduhuk welamuhup.

⁸Ap eke at duruk aleroho mot duruk; famen ap eke enelitno duruk kamuhup ai at oho duruk aleroho neg.

⁹Ap we hesangge on wereg lit eneyabuk wit-dauk kamuhup aire fano; ap humon unduhuk lahe saleg wereg famen enasiburu nauk on eleg kweleg duruk kamuhup ai neg de anggin deg.

¹⁰Ap fano on en at owam furoho kumu hauk karuhu; famen ap siag on en de siahap enepuk karuhu.

¹¹Yabuk akni enap yabuk enomamneroho wit-dauk ai en siburu nauk angge hum atuk. Famen ap wene ebe eleg ale fahet nukoho alematuk on etma re ap sohou on wereg.

¹²It ap siag on en it ap TUHAN ele sahale folug duruk on enengge hwelela ahi ulug boruk; famen ap fano on en halug de e angge yihiruk ahan hag wereg.

¹³Ap siag on etma enele siag on uruk ale fam enonggwareg yep-dauk; famen ap fano on de anggin degman oho loloho wilip atuk.

¹⁴Ap enebe hundomog it duruk ale uruk ale muko neg ambiangma hwelauk; hundomog onggo higitdoho neg og-esahu.

¹⁵Ap sohou on en an siag duruk kahi bahat-dauk fug; famen ap enggat on de komo ale hundig holduk kale boruk.

¹⁶Ap morue on en ap enele obam urukmu ahummu olok atlug halug de etano li em neg at ahummu ahe laharuk on anyo wilibi feik waharuk; famen de it enggat on en de ap siahap biahap enepuk kweleg ohore wong debeselug wereg.

¹⁷Ap enele demdoho on neg uruk fam de dipdoho neg duruk ale anyo omamne deberuk; ne seiale uruk fam de dipdoho duruk ale anyo elehap deberuk.

¹⁸Ap enele we hesangge uruk on fam de fili en samle yuhulduk hag ap homi enendama ware feseruk; enele enggatdoho matuk on fam de obat ouk deg ma hilingguruk hag wereg.

¹⁹Seiale uruk on de we il misig fam neg enam atuk; famen demdoho wenere mundoho-mundoho fam wereg laruhu.

²⁰Ap dipdoho duruk ale enerim on en de siag ale duhuk ulug wene melaloho fohup fug; ap fano ale dele ulug wal hauk on halug fobik ahayeg hauk karuhu.

²¹Ap fano on anggin eke obam aruhu fug; Ap olok on ai hundig at obam siag ale neg kete uruk karuhu.

²²TUHAN en de ap seiale on alitno enepuk; famen de ap bekitdoho duruk on de At ahayeg enepuk.

²³Ap enda wenggeleg on en at oluk deg ale anyo heraho foruk; ap morue on anyo en at onggwareg morue deg ale anyo unuhil lauk.

²⁴Yabuk omamneroho duruk fam ap enalong wereg on atuk; ko ale duruk halug ap amingming on atuk.

²⁵Enenda fituk kwit de enahayeg wereg on elehapdoho fahat-dauk; famen de enele sako-sako uruk fam de enenda lohapdoho leho feseruk.

²⁶Ap fano duruk on de o aluluk kwe on en fano ap deberuk; ap olok ale duruk on de onggwareg olok elekwe re bule wamburuk ai.

²⁷Enenggik ko-ko ale duruk on fam de endama duhuk ulug wenggelduk ale anyo ebe am fug alereg; ap yabuk enomamneroho duruk ambiangma re ap enangge humdoho hwelauk.

²⁸ap kobokwe demdoho oluk enepuk on fam mutlug lauk halug de oluk ahayegdoho welaruhu; kobokwe siag on mutlug lauk karuhu halug de waratuk mu lauk karuhu.