Read Ninia Yali AMSAL 13 Bible Online

AMSAL 13 - Ninia Yali bible

AMSAL 13

¹Omalik ape hebeleg on en de akni ele komo ale uruk on anyo furoho holduk; famen ap winik-wonog uruk on en de komo ale omano erim boruk kwit wauk fug.

²Ap fano duruk on ele fam de fano ale atuk famen ap bekitdoho duruk eleg on de enolok ale neg wenggelduk.

³Ap eke en ele matuk kwit enda wenggel-halug uruk halug oluk fano ahap wendareg welaruhu; ap eke ele hesangge matil lauk fam onggwareg elehapdoho fahat-dauk.

⁴Ap ko on en humdoho enda duruk famen misig ulug oho eke higit aik lauk fug; ne ap yabuk omamneroho duruk halu de at enda boruk angge anyo higitdoho hwelauk.

⁵Ap bekitdoho duruk on en enapeen ale uruk on etma enerim boruk; ap enebut siag ale duruk on en enenggaliapdoho siahap-dauk.

⁶Dipdoho duruk on ai en ap eneluk bekitdoho wereg on hwal-enepuk; enolok ale etman ap siag duruk on omano wororog enepuk.

⁷Ap eke abut fam dungon hag deg famen de angge humdoho wereg fug; ap eke abut de enggik eleg deg hag famen angge humdoho wereg kweleg famen deg.

⁸Ap dungon en uang wilibi folug enoluk fano ili og dalug wereg famen; ap ilmoleg on de di ale su ale fahet akol eleg angge we hesa wereg.

⁹Ap demdoho duruk on seleg enobam wereg; ap enolok on esahe lampu nahuligmu hag wereg.

¹⁰Enewonog atuk fam minggituk on enam atuk; ap enggat on halug de hweag-esauk ale anyo furoho wauk.

¹¹Enenggikmu angge folo-folo seroho hwelalug dung amuhup famen folo-folo eleg atuk; dohwen-dohwen andog duruk halug neg de balu-balu hum atuk.

¹²Enenda ebereg ale anyo hihiloho feik lauk halug de enenda enekol atuk; enambono boruk ale higit atuk halug enenda enahayeg atuk.

¹³Ap eke TUHAN en hweag-nesauk ale seramap deberuk halug de onggwareg ebe namelmel deg; ap eke Allah wene melaleg furoho duruk halug onggo hwelahu.

¹⁴Ap engat on en hweag-esauk on aire indip enahayegdoho wereg ale; it enolok duruk on ai wene hweag-esauk on ai en enahap wendat enebuk no ulug duruk.

¹⁵Ap enenda wenggeleg on de fobik fano angge hwelahup; ap demdoho dip-deberuk eleg on de enoluk anggoloroho welamuhup.

¹⁶Ap enenda wereg on en de duk fug angge en enenda dag wenggelduk; ap morue on halug sohou imon en fetagdoho duruk.

¹⁷Ap siag duruk on en mon enepuk on halug de namelmel ale enekit waharuk; famen enendaman ap su fano boruk kwit mon enepuk on ai ambiangma anggen yihiku.

¹⁸Ap eke komo ale erim boruk on de ilmoleg enalbelesim watuk kamuhup; ap komo ale holduk ale enenda deg halug enalong boruk kamuhup.

¹⁹It enenda boruk angge ai hwelahup aire fano famen; ap sohou on ai siag durukmu etman hebeloho wam alere erim boruk.

²⁰Ap eke enggat on nim kilik duruk halug fobik enggat amuhup; ap morue on nim kilik duruk halug de enelaheg.

²¹Ap siag duruk on de siahap enepuk angge anyo en mug eneplug duruk; ne ap fano duruk on de fano angge neg hundig hwelauk kwit wereg.

²²Ap enenda wenggeleg enap en enangge etma enombasi en enebinggi angge hwelahup famen; it ap sohou on enengge etma ap enda bekitdoho wereg on fahet kabog-duruk.

²³Kwenang koloreg wereg kwe en de ap enenggik eleg on fahet nauk on humdoho foruk; famen de katukdoho duruk eleg fam de kwenang anyo yabuk wuruk eleg angge wereg.

²⁴Omalik yeik watuk eleg halug de ai erim deglit; endareg lit halug de omalik yeik hambong seroho wariyug.

²⁵Ap fano on de enangge higitdoho wereg; famen ap siag ale duruk on de anggolo hauk.