Read Ninia Yali AMSAL 14 Bible Online

AMSAL 14 - Ninia Yali bible

AMSAL 14

¹Hwe enda wenggeleg on en obam olekwe hwale foruk karuhu; famen de enda sohou on ende moluluk debesehu.

²Ap bekitdoho duruk on en halug de TUHAN Allah fahet enekol boruk kwit leho foruk; ap ebe bekitdoho wereg fug on en de At maben deg boruk.

³Ap enggat on de enonggwareg enele en ahoroho fahat enesug; famen ap moruwe on de enonggwareg enawonog fam de leho fahat dauk.

⁴Wam lembu omamne anyo elegmare yabuk yahoma anggen baloho lauk fug famen lembu omamne fam yabuk wutuk fam neg de anggen dahaneg balu kabog laharuk.

⁵Ap inil en furoho halug de enele demdoho neg uruk; furebouk fug angge en enele hesangge uruk on aire seiale atuk.

⁶Ap winik-wonog uruk on de fobik enggat am fug ale deg, famen ap hebeleg on etma eke nim seroho fu dereruk.

⁷Ap sohou on nim seberuk waruk fug; aren eke hit hweag-hesahu ale wereg fug.

⁸Ap enggat on en etma keroho dihi halereg ulug oluk deg; famen ap sohou on onggwareg sohou ai en lal dauk.

⁹Ap moruwe on nasiag ke on elegap napsi a eleg a ulug oluk deg fug. Famen ap enggat on de nasiag elegap nabukwag ulug ahayeg boruk.

¹⁰Enehumu healeg ale et hesilig ale et enenda ilonggoma heraholit weregma; ap amu on it hauk ai hag ha fug ale deg.

¹¹O ap fano duruk on en on de omamneroho wereg laruhu; famen o ap moruwe en on de daloroho lilibug duhu.

¹² Kobokwe eke bekit degma fu hauk on wereg famen; kobokwe ai lauk katlug ambiangma waratukmu fil lauk.

¹³Unda yatuk on ahamdohore oba yatuk; enahayeg doho neg hauk etma ambiangma enenda hesilduk.

¹⁴Ap enolok on en anggen olok on dahanduk; ap fano on en anggen fano duruk on dahanduk.

¹⁵Ap sohou on en wene abirale omano fahet dip deberuk; famen ap enggat on en de dohwen fureberuk.

¹⁶Ap enggat on de hundig ohwale fahat dauk kwit siag on embeseruk; famen ap sohou on en de ninim wene ale ilauk kwit fano bolug het enepuk ale ai fano boruk.

¹⁷Ap eke suahal bet enepuk ale neg ambonoreg halug at moruweroho duruk; ap enggat on abut de dohwen nangno hauk.

¹⁸Ap humdoho olukdeg fug on de fobik moruwe aruhu; ap enggat on de humdoho dopnoroho eneluk aruhu.

¹⁹Ap olok ale duruk on en de ap enda bekitdoho wereg on fam olok foruk; enda dukwag ulug heng enepuk.

²⁰Ap enggik eleg on de ori en oho enahayeg duruk fug; famen ap dung ahun halug de ori humdoho wereg.

²¹Ap eke en ap amu on erim enepuk halug de ai siag duruk; ap eke endaman ap enggik eleg on fam enda fano atuk halug at ahayeg doho welamag.

²²Ap eke en fano duhuk ulug wal hauk halug ap en leho foruk kwit fano uruk kamuhup; Ap eke siag ale duhuk ulug wenggeloho foroho halug kwe longgo uruk on fam wereg.

²³Di angge su angge enebiroho duruk on de dopno angge humdoho hwelauk kamuhup; enele hesangge matil noruk kamuhup on etma enenggik eleg amuhup.

²⁴Ap enggat on mot-duruk kamuhup aire at enggat deg ai fam; ap moruwe on ulug eneluk deg laruhu aire ebe moruwe deg ai fam.

²⁵Ap eke il hauk ale uruk on en demdoho uruk halug de ap ai en are oluk ili wauk; famen aren seiale uruk halug de are ai siahap debeikoho duruk.

²⁶Ap TUHAN fam dipdoho wereg on de fano il waroho wereg laruhu; ahain elekwe on de enalong balduk weregdoho welamuhup.

²⁷TUHAN fam dipdeg on aire enahayeg doho wereg ale indip de ai; kobokwe waratuk on fam anyo ohwale fahat dauk.

²⁸Raja angge di angge su angge wereg ale aire aren sebeloho fahat enesugmu etma ap homi enebe wereg ale fam deg; ap homi elegman de at raja atlug along on welam fug alereg.

²⁹Ap enda enggat on en de folo-folo suahal bet enepuk fug; ap moruwe on en de enda sebel hauk fug.

³⁰Enenda lombukdoho weregma enebe oho lombukdoho wereg enori deg ale fahet enenda enolok duruk on de ouk en enowatuk hag.

³¹Ap eke en ap enggik eleg on fano ap deberuk halug de akni Allah leho foruk; ap eke en enggik eleg siahap deberuk halug de Wal-debag maben ap deberuk.

³²Ap olok on elehap debehu aire asiag ai fam; ap fano duruk on ili oko welaruhu ai at fano duruk on ai fam.

³³Enggat alere ap hebeleg on endama wereg; famen de ap siag on endama re mun sebeleg wereg.

³⁴Demdoho deheg dipdoho deheg duruk on fam ap homi enunuk leho feseruk; famen siag duruk on fam de ap enenggul unuk misig on anyo enenggali atuk

³⁵Raja re autsi pegawai enggat on ai fam ahayeg wereg; famen it wene melaleg omano yabuk higitdoho dil lauk eleg on de bet enepuk.