Read Ninia Yali AMSAL 15 Bible Online

AMSAL 15 - Ninia Yali bible

AMSAL 15

¹Enele onggo sako fam uruk halug de enehummu het anyo eleg atuk famen enele onggo haperoho uruk halug de enolok eke nim laharuk.

²It ap enggat enap en enele uruk on ai ap homi en fureberuk kwit enahayeg hauk; famen ap morue on en enele matuk on etma sohou-sohou ale matuk.

³TUHAN de di kwe su kwe atuk ale etma mundoho il hauk kwit wereg; Aren de siag ale fano ale duruk on mundoho furebeseruk kwit wereg.

⁴Enele fano ale uruk halug ekenim enahayeg hum atuk; famen enele haperoho uruk fam de enenda ouk ap enepuk.

⁵Ap morue on en akni en komo ale anyo busilik apdoho embeseruk; famen ap enggat on en de komo ale anyo fanoap deberuk.

⁶Ap fano duruk on enobam de angge humdoho wereg; ap siag duruk on enggikmu angge mundoho elehapdoho fohu.

⁷Ap enenda enggat on enele etma re wene kahaleg ale humdoho wereg; famen de ap sohou on enenda airoho wenggelduk fug.

⁸TUHAN de ap fano duruk on en somban uruk on neg wauk; famen ap siag duruk on en obahet foruk anggere erim duruk.

⁹TUHAN en de ap siag duruk on en duruk alere erim deg; famen de ap At enda boruk ale higitdoho duruk on halug de enda enesug.

¹⁰Ap siag ale duruk on de ouk-bouk enobam fesehu; ap komo enepuk ale enerim boruk on etma fobik waramuhup

¹¹TUHAN de kwenangma ap waratlug laukmu etma deg ale mun biling balangdoho oluk deg ma; ap homi enenda wenggel duk alere At elegma re kereg ma heraho fouk alereg?

¹²Ap eke enelitno enepuk ale enda on de komo-duruk alere enerim boruk; at ap enenda enggat on wene komo hweag-nomag ulug enekit lauk fug.

¹³Enendama enahayeg wereg ma enorohole oho healeg; enenda hesilig lit enahayeg eleg atuk.

¹⁴Ap enggat on de noluk amag ulug hera duruk; ap sohu on aren sohou ale omano fahet neg asingsing ale duruk kwit wereg.

¹⁵Ap enenda hesiloho neg wereg on de di on su on enomamne fam hera dil lauk; famen ap enahayegdoho wereg on hundig unda nim-num uruk kwit neg wereg.

¹⁶Enangge dorangge wereg ma TUHAN fahet enakol boruk kwit wereg ai fano; famen enangge humdoho wereg ma enenda fituk kwit wereg ai neg anggin deg.

¹⁷Yerumingga neg nauk kwit famen enenda hundig wereg ale ai mun fano; ino unduk kain angge nauk kwit en famen enolok nim nauk siag.

¹⁸Ap folo folo suahal bet duruk halug yeik lahapuk ale enamatuk. Ap sakoroho nangno hauk fam de fano lioleg on waharuk.

¹⁹Ap ko on de hundig anggolo hauk kwit wereg; ap bekitdoho duruk on de anggolo ale eke hauk fug.

²⁰Omalik enggat on en akni ahummu healeg ale duruk; omalik morue on en ai isinga fahet along boruk fug.

²¹Moruwe ale aire ap sohou on en enahayeg ale; ap enggat on de kwe bekitdoho lauk.

²²Wene melaleg suhwi atuk ai furoho ilit heheg kumu heheg duruk fug fam; Wene melaleg higit atuk aire komo ale hweag-esauk on humdoho wereg ai fam.

²³Enele folo-folo etano li em uruk; fam enahayeg on waharuk.

²⁴Ap enggat on de kobokwe lahabeg eneluk enepuk on fam laharuk; kobokwe waratuk on fam belabeg wamburuk fug.

²⁵TUHAN en ap enda leho fahat-dauk on obam ai dalo esahu famen; hwe youwog on misig anggwenang de furoho hwalduk karuhu.

²⁶TUHAN en wene siag on melale foruk on etma erim enepuk; Famen de wene fano on etma endama ahayeg hauk.

²⁷Ap eke en angge eke nim dopno dahuk ulug heraruruk halug ai siag ale; obam olma ahain elekwe siahapdoho fahat dahu. Ne, ap en uang enenggik apmane og-esauk on anyo hwelauk fug halug at mun ahayegdoho neg welaruhu.

²⁸Ap fano duruk on en wene anyo furoho abut bal hauk; ap siag duruk on en wene enehummu het ale neg uruk.

²⁹TUHAN en de ap fano duruk on en somban uruk ale neg de esanggo holduk; famen ap siag on enelere at holduk fug.

³⁰Enorohole enahayeg wereg halug enenda oho enahayeg wereg; wene fano on holduk kwit enenda lombuk uruk.

³¹Ap komo ale holduk on halug de ap ai; enggat on wereg boruk.

³²Ap eke komo ale holduk ale erim boruk on halug de onggwareg ohwale fahat-dauk fug; ap komo ale ai wauk on de hebeleg on atuk.

³³TUHAN fahet enekol boruk ale aire indip mun fano atuk ale. Leho feseruk kamag ulug halug de atam sebele fahat dahup.