Read Ninia Yali AMSAL 16 Bible Online

AMSAL 16 - Ninia Yali bible

AMSAL 16

¹Ap homi en de duhuk ale ulug wene melaloho folug duk alereg famen de dukwag ulug Allah en neg kongdoho og-esauk.

²Ap enemu hundomog duruk ale anyo enonggwareg en kumu hauk kwit an fano duruk kahi boruk; famen de TUHAN en de enenda boruk ale etano furebeseruk.

³Wene melaleg lahen ale etma fahet de TUHAN en neg dukwag ulug henda dip deg lit duhun halug hat duhun ale ambiangma fano aruhu.

⁴Di ale su ale TUHAN en buhun disi aire at oho enda besi ale wereg en; ne, ap siag duruk on en enenda boruk alere elehap debeseruk ale neg wenggelduk.

⁵Ap abirangge en winik wonog uruk on de TUHAN en alitno enepuk; it unggum enobam weregman inili oko fesehu fug.

⁶Ap Allah fam neg ebereg on halug de enesiag elehapdoho embesehu; ap enenda TUHAN fam dipdeg wereg on siag on anggelegman enahap wendaroho wilibuhup.

⁷Haren TUHAN endama ahayeg howag ulug duruk kahen halug it haselei deg lahep on omano hori atuk amuhup.

⁸Bekitdoho duruk fam ambiangma dot angge welaruhu ai fano; dipdoho duruk eleg angge en ambiangma angge humdoho wereg laruhu aire siag.

⁹Ap homi en de wene airoho duhuk ulug wenggeloho folug duruk famen Allah en eneluk wereg ale fahet kongdoho uruk.

¹⁰Raja re omamne Allah fam en wauk; mu re aren wene kong-duruk kwit de siagdoho kong-duruk fug.

¹¹TUHAN en de ap enenggikmu angge onggo wauk kwit bekitdoho ilit angge ilit halug duruk kalep boruk.

¹²Ap enalong wereg on en de siag ale duruk on ai olok ale duruk boruk; at en ap homi melal-enepuk mu omamneroho unduhuk aire dipdoho duruk ai en atlug.

¹³Wene demdoho fagdoho uruk on ai fam de raja ahayeg boruk; aren ap bekitdoho ele matuk on ai enda duruk.

¹⁴Raja en bet enepuk on aire waratuk on unggum og-esauk ale fahet; ap enggat on en de sebele fahat damin ulug wal hauk.

¹⁵Raja enda fano fam de fanoroho wereg ale aik waharuk; o hobi deg li hena en osit belabik waharuk hag.

¹⁶Emas humdoho hwelauk ale aire ha hag famen enggat atuk ale ai neg de along humon; Perak humdoho hwelauk alere ha hag famen eneluk humon atuk ale ai neg de along humon ai.

¹⁷Ap eke en siag on duruk ale fahet ahaye dulug yatma lauk halug ai; ap onggwareg oluk anyo hwal-dauk kwit duruk on de ai.

¹⁸Winik wonog ambiangma re al berel enepuk. Enewonog atuk on ambiangma re daloroho wamburuk.

¹⁹Ap winik-wonok uruk on omano mug eneplug lauk kwit enangge delduk angge omano foroho ale etma siag; famen enggik elegdoho wereg lit enenda sebele fahat dalug wereg ale ai neg mun fano.

²⁰Hat fobik fano angge nunggwangge hwelahuk no ulug atam hat hweag-hutswa ale etmano ebetuk karuhun; ne hat TUHAN fam henda demdoho dip deg halug fobik holuk mun fano hahayegdoho welaruhun.

²¹Ap enggat on de oluk deg ai fam ap homi enoluk atuk; ele matuk mu re enahayeg durukmu at ele uruk on etma demdoho boruk.

²²Enggat on aire ap hebeleg on enoluk wereg ale indip de ai; ap morue on ouk hauk ai onggwareg morue elekwe.

²³Ap enda wenggeleg on en wene matuk alere enggatdoho matuk. Hweag-esauk ale anyo demdoho neg atuk.

²⁴Enele sakoroho matuk on de kin ahalue unduk mit hag deg lit, unduk mit ai fam enebe fano hiling enepuk.

²⁵ Kobokwe eke enamegma hauk mu bekit deg famen de, kobokwe ai ambiangma re waratuk mu lauk.

²⁶Nauk angge enambono duruk on ai en og eneplug hera dukwag ulug feseik lauk; ahum wereg ai fahet yabuk abiroho wutuk.

²⁷Ap siag duruk on en are eke siahap debeikoho hera duruk. Ele uruk alere indok fut daliban naukmu olok deg hag duruk.

²⁸Ap siag on en enori nim suahal angge neg uruk kwit minggituk; enebug il noruk on en are enda hundig on nim minggit atuk.

²⁹Ap hape on en ori fam seiale hweag-esauk; airoho hweag-esalug it og eneplug namelmel ma omano feseik lauk.

³⁰It ap inil hombut uruk on nim eneyeg ili nim-num uruk on nim fam henepe hebeloho welamuk; at aire olok on endama wenggeloho foruk kwit wereg ma anggere henebe enggatdoho welamuk.

³¹Ap bekitdoho duruk on we enda hundig en og-utuk fam oluk umur yatdoho welaruhu; unggul delag atuk on aire mahkota helag-felag angge duruk on deg laruhu.

³²Enelong wereg aire ha hag famen de folo-folo bet enepuk eleg ai neg fano; enalong fam kota hwalduk ai fano hag famen de mun along de enonggwareg hwal-dauk on ai neg de along hum deg.

³³Ap homi en ebe furoho eneluk omag ulug de enelugap angge hwik duruk helep anggen fam wal haukmu eneluk atuk famen de; onggo furoho hweag-esauk on de TUHAN amu en neg hweag-esauk.