Read Ninia Yali AMSAL 17 Bible Online

AMSAL 17 - Ninia Yali bible

AMSAL 17

¹Siburu weraho on wereg ma wene eleg angge wereg ai mun fano; famen nauk angge di su angge osoho kabog laharuk salim yeik suahal enam atuk ale aire mun siag.

²Amingming angge enda wenggeleg on anyo en omalik nenggali ale duruk on ai furoho hwalduk karuhu; enakni abinggi angge omano omalik ai ori nim higitdoho hwelahup.

³Emas mel perak mel etma re indok ambulbul fam abut balduk famen; ap homi enenda re At TUHAN en neg enebut balduk.

⁴Ap siag ale duruk on de ap ene ele fam siag ale neg uruk muko duruk, ap lal enepuk on de ap homi enebug balduk wene etma neg holduk kale boruk.

⁵Ap eke en ap enenggik eleg on albelesim wat enepuk halug; ai TUHAN wal-debag ahun anyo albelesim watuk. Ap eke en ap airoho duruk on anyo fano hauk ulug ahayeg boruk halug unggum higitdoho hwelahup.

⁶Ap mun sobal atuk on en de enomaliki nim enombasi nim fahet enawonog atuk; ne enomaliki en enewonog atuk ai enaknisi wereg ai en.

⁷Ap enenuk leho on en sei-sei alere uruk ale ai mun kwasik deg; ap morue on en wene fano leho on uk fug alereg.

⁸Ap foman boruk kwit uang enenggik apmane og-esauk on ai along ale boruk; uang enenggik apmane hwelauk ai fam di su ale dil lauk karuhuk boruk.

⁹Ap en nobam enenda enambono neauk kamag boruk kwit halug, iren siag ale hat hobam duswa on omano elehapdoho feiyug; Hat hobam siag ale hapswa on omano nikangge lahaik waharuk kwit neg wereg halug; ai fam en ap hinim bali welahep on anyo kong atuk atuk.

¹⁰Ap morue on fahet fetne angge seratus huli enowaruk ai along deg fug famen; ap ape hebeleg on fahet de seratus en huli komo ale hweag-om on ai neg de higitdeg.

¹¹Ap siag duruk on en olok ale neg hundig hera duruk; famen ap olok on mondorik waharuk anyo hag waratuk on akit mondorik waharuk.

¹²No beruang omalik longgo debelug isinga neg laukmu inim ambi am aire fano; famen ap morue on en morue-morue ale omano fahet asingsing ale durukmu kwelaboho lit wereg ale neg de siag.

¹³Ap eke siag ale fahet fano ale en onggo balduk halug; siag ale re obam olma wilibik waruhu mu wahup fug.

¹⁴Yeik suahal uruk ale indip duruk on aire ik lareg ma husuruk hag; ai fahet de suahal wene owan indip duk eleg hweleg longgo uhup fano.

¹⁵Ap siag duruk on ili og-enepuk kwit ap siag duruk eleg on siahap debeseruk ale etma re TUHAN en erim enepuk.

¹⁶Ap morue on aire wenggelduk ale kwasik deg ma; enggat ale hera duruk kwit uang elehapdoho duruk on aire we alemaroho.

¹⁷Ap eke are on halug de anggin deg li neg akit waharuk; ap eke ombali enda hundig on halug inim hundig lit neg wereg.

¹⁸Ap eke en are ombaleg angge fahet aren baluhuk ulug sali uruk ai ap morue on wereg.

¹⁹Ap siag duruk ale ambono boruk on ai; yeik yapuk ale neg ahayeg duruk. Ap eke ambilik ele humon aire siahap duruk ale neg hera dil lauk.

²⁰Ap eke seiale neg uruk on oluk fanoroho welaruhu fug; ap ambilik anggen handohwal on de anggin obam aruhu.

²¹Omalik sohou on endag-dauk halug de enehummu siag on hweag-dauk; omalik morue on akni anyo ahayeg welaruhu fug.

²²Enenda enahayegdoho neg wereg fam de enebe fam inim fano atuk mu wereg; famen enenda hesilig on aire enenda wat-dauk.

²³Wene unggum bilingguruk ahun uang enenggik apmane hwelauk eleg halug; unggum bekitdoho bilingguruk fug.

²⁴Ap enenda enggat on en boruk alere enenda hambuk deg on hwelela boruk; famen ap sohou on en wenggel duk ale etma re bekitdoho fug.

²⁵Omalik morue on de akni anggin fanggin obam foruk; isinga endama ale on kwelabe foruk.

²⁶Ap siag duruk eleg on fam onggo fein ulug heng uruk ai duk fug ale famen heng uruk ai siagdoho duruk; ap siag duruk eleg on yeik enowatuk ale ai mel duk fug ale duruk.

²⁷Ap enda enggat on etma ele hum ale matuk fug; ap wenggeleg neg duruk on en de enele eleg angge bok wereg.

²⁸Ap morue on oho ele uk fug angge bik-bok wereg ma, enda enggat hebeleg on aruhu boruk.