Read Ninia Yali AMSAL 18 Bible Online

AMSAL 18 - Ninia Yali bible

AMSAL 18

¹Ap eke ap amu on embeselug enesahalimen wilip atlug amu wereg halug at onggwareg amu fahet furobahat-dauk; ap abit enele omano aren sahaloho embeseruk.

²Ap morue on en eneluk deg ale hweag-esauk on etma nerim boruk; at de endama meneni yatdoho wenggel-hauk kwit wereg ale fahet uruk kwit wereg.

³Siag nim siahap enepuk ale nim aire misig higitdoho lauk; mundoho siahap atuk halug de siahap deg lit wereg.

⁴Ap enele matuk on de wenggelduk on eleruk wilibik waharukmu en hag deg; enggat on fam enele matuk on aire ik lauk ahum yatdeg etma mel ne ik wirig atuk on ebereg hag.

⁵Ap siag duruk on inibil atlug; ap siag duruk eleg on siahap enepuk ale aire siag.

⁶Ap morue on en ele matuk fam de; suahal yeik uruk nim enerim nabukwag ulug nim uruk.

⁷Ap morue on ele matuk fam onggwareg siahap-dauk; at onggwareg en sabu yep-dauk.

⁸Enebug siag uruk ale aire unduk neg deg ap en fano bil hauk.

⁹Ap eke eyabuk higitdoho duruk fug on ai; ap siahap deberuk on nim siag de higitdeg.

¹⁰TUHAN aire anduli yaron belabeg on omamne hag deg; etma ap demdoho duruk on laukmu inili og atuk.

¹¹Famen de ap dungon en enda wenggelduk kwit angge en ebe along baloho wereg boruk; kota fak lehet yaron omamne on en walinggoho kwelabeg anyo hag boruk kwit wereg.

¹²Ap leho fahat-dauk on ai bule wambuhup; famen ap enenda sebele fahat-dauk on de fobik leho feseruk kamuhup.

¹³Wene ebe hein og-esauk on holuk fug angge en onggo folo-folo uruk on aire siag atuk morue on en uruk ale uruk.

¹⁴Ap en it enebe fahet enenda ebetuk ale omano enebe anggin enobam atuk mu wauk kwit enenda boruk ale ai eleg atuk; di ale su ale enendama ebereg lit wereg on omano oho mundoho eleg atuk.

¹⁵Ap hebeleg on en di su ale hweag-esauk on fahet ik obok hag enepuk; ap enggat on en hweag-nesauk ale aire fano ahi boruk.

¹⁶Kwe yatuk on onggo ap hondog eneplug ap lohon akit lauk on nim.

¹⁷Wene dipdoho kong-durukmu etmano en ele atam matuk on aire demdoho neg uruk; famen de ele uruk on anyo enamatuk ale re at nim ele onggo-onggo uruk on anyo walug uruk li em enamatuk.

¹⁸Abut bal angge hwik halug wene minggit-manggat atuk on anyo eleg atuk; ap enalong wereg enap nim uruk ale famen oho re helep anggen fam wal halug duruk halug eleg aik lauk neg.

¹⁹O kota omamne on de horogma aik la alereg famen de ap eke are en enda ouk ap debesi on neg de horogma aik la alere anggin deg. Yeik suahal uruk on aire fak lehet kota fahet omamne on wiroho kwelabeg anyo hag deg.

²⁰Ap en enele uruk on fahet ambiangma it oho hauk;

²¹Enembilik anggen aire siahap enebukoho fano ap enebikoho lit oho omamne humon wereg; ap de enele ambiangman neg anggin hwelauk

²²Ap enohwesi hwelauk halug ai iyale; enohwesi aire TUHAN en enda fano en we og-esauk.

²³Ap enggik eleg on en de heng enepuk kwit elahegdoho enalong enepuk kwit heng enepuk; famen de ap dungon en de enele onggo haperoho uruk.

²⁴Ap are higitdoho duruk fug on eke wereg; famen eke are nim fifuroho duruk on wereg.