Read Ninia Yali AMSAL 19 Bible Online

AMSAL 19 - Ninia Yali bible

AMSAL 19

¹Ap enggik eleg on oluk bekitdoho wereg ai mun fano; ap morue on ai seiale wene neg uruk kwit wereg.

²Enebe enasukun kain deg famen duruk ale enapeleg kweleg duruk ale ai siag; ne ap elaluwe siban duruk halug ai siag atuk.

³Ap homi enonggwareg en siahap dauk ai enonggwareg morue elekwe; dulug en de iren wene ai fam de TUHAN siahap deberuk.

⁴Ap dungon de ap ori humdoho kabog uruk famen; ap enggik eleg on ai ori en mundoho fotog-esauk.

⁵Ap wene dipdoho baldukmu etman seiale uruk on aire, at unggum obam feil lauk em we koloroho lil aruhu fug.

⁶Ap hundomog en ap fano on enenda og enepul ulug enebiroho duruk; ap abirangge en ap enenda kain on nim neg bali wareg lala ahi boruk.

⁷Ap enggik eleg on fahet are amep en ohore albelesim deberuk; ne are inim mang-mangno on en en de mun ebenaheg debouk alereg. Aren abiroho duruk famen de, at it inim sebe am fug alereg.

⁸Ap eke en noluk alep ulug mutlug lauk halug de at onggwareg enda dauk kwit duruk; ap eke en at hwelasi ale etmano eberoho foroho halug de at aire fano ahayeg deg laruhu.

⁹Ap wene dipdoho bilinggurukmu etmano en seiale uruk on de ebe unggum og-utlug elehapdoho fohup lit deg.

¹⁰Ap morue on eneluk fanoroho wereg lam alere higit deg fug it enamingming angge on en enalong wereg enap melal enebuk ale re mun siag.

¹¹Ap enda wenggeleg on en de suahal bet duruk kweleg sebel hauk; ap ai siag ale sebeloho embeseruk ale ai en de at mun leho foruk.

¹²Raja olok de singa ngin hag duruk; fano ale raja en duruk on de lil en enggelangge yaho on fam belabik waharuk on hag deg.

¹³Omalik morue on en de akni siahap biahapdoho foruk; ohwe ele sahal sahal on ai bok am fug angge ik dep dep angge wamburuk hag deg.

¹⁴O wirig mel enangge mel aire enaknisi en deg on hwelauk; famen de ohwe enda wenggeleg on ai TUHAN enda fano en we og-esauk angge.

¹⁵Ap ko-ko ale duruk on de noho filik kalepdoho nohoruk kwit neg wereg; fobik de ap ko on ai obok anggolo hahu.

¹⁶Ap Allah wene melaleg diroho airoho ulug hweag-esauk on omano furoho duruk halug ahap wendareg welaruhu; ap along boruk eleg on de fobik wararuhu.

¹⁷Ap homi enenggik eleg on let esauk aire nenangge Allah fam elamna og-utuk hag; fobik At TUHAN en oho onggo og-nesahu.

¹⁸Ketia iale wereg li enomalik furoho hwale fesehup; eleg halug de haren at ebe fobik siag amag boruk kwit duruk kahen.

¹⁹Ap folo-folo enolok atuk on aire fano neg, famen de ambiangma atuk ale etma haren neg hahun. Haren at let duhunmen de, haren at olokap kwelabuhun lit deg.

²⁰Hat komo ale mel holduk kwit eke nim noluk alep ulug boruk kahen halug de; fobik en hat de ap enggat on aruhun.

²¹Ap homi en duhuk ale ulug welaloho foruk alere humdoho wereg; famen de TUHAN en neg wene katukdoho uruk.

²²Ap eke en abut bekitdoho duruk on ale boruk; famen seiale on atuk ale ai siag deg ma enggik eleg on doho wereg ai fano.

²³Holuk fanoroho welaruhun anggere TUHAN along bolug duruk kamin; airoho duhun halug de hat higitdoho hamelmel man ili og-hebeheg duruk karuhu.

²⁴Ap eke re mon ko anggolo siag on wereg; airoho wereg ma re nauk angge ambilikmu kwelabe fouk ale oho re erim deg.

²⁵Ap winik-wonok uruk on unggum og-esaukmu re ap unggum wauk ale enapeleg on de anyo fam en fubi deberuk; ne ap enda enggat on bet dil lauk men de fobik eke nim dopnoroho oluk aruhu.

²⁶Omalik eke en akni isinga anggin-fanggin enebeheg muko wilip enebeheg duruk halug; at onggwareg siahapdoho fahat daukmu enggali wereg.

²⁷Namloho hat wauk ale herim deg halug; hat atam wauihin mu holuk atsi ale etano hapeleg aruhu.

²⁸Enele seiale fam hweag-esauk halug aire wene melaleg ai sebeloho foruk; ap homi siahapdoho feseruk ale aire ap enolok wereg on en de mun fano ale boruk.

²⁹Ap morue on en enda leho fahat-dauk fam; demdoho yeik waruhup lit deg.