Read Ninia Yali AMSAL 2 Bible Online

AMSAL 2 - Ninia Yali bible

AMSAL 2

¹Namloho, an den wene hweag-hutuk kahi ale wauk kwit de, komo ale hat komo hapuk kahi ale etmano ebetuk kamin.

²Enenda wenggeleg neg en duruk ale etma ebereg wereg lit furoho noluk amag ulug wal hauk kamin.

³Ao, namloho, folo-foloroho wenggel-hauk on ai deg lale ulug wal hauk kwit de furebelug duruk on ai heng uruk kamin.

⁴Ai on de ap en emas hera duruk hag hera duruk kwit, enangge along angge wereg ma mutlug lauk hag mutlug lauk kamin.

⁵Airoho duruk fam de, haren TUHAN fahet enakol boruk ale aire keroho e ulug holuk aruhun. Ai en hat oho Allah wereg ale holuk aruhun.

⁶TUHAN en neg enggat atuk on og-esauk; Aren neg ap homi eneluk atuk on mel, ebetuk on mel, og-esauk.

⁷Ap homi enenda mun bekitdoho neg duruk on mel, enabug siag on eleg angge duruk on mel fam de TUHAN en let enebeheg, il bal-enusug laheg duruk.

⁸TUHAN en de ap enenda bekit fam duruk on fahat enusug welaheg, At fam en siag duruk ale abug eleg on mel de let-enebeheg, alele oko fahat enusug laheg duruk.

⁹Hat namloho an den uruk kahi ale higitdoho duruk karuhun halug, hat fobik demdoho mel, bekitdoho mel, fano roho mel, holuk aruhun. Ne, eke haren fobik nangginoho holuk wereg laruhun ale oho holuk aruhun.

¹⁰Hat mundoho enggat aruhundeg, hat holuk deg ale fam en de hendama healukwag ulug neg duruk karuhun.

¹¹Hat holuk deg ale ai mel hamenggel deg lahen ale etma mel en il baloho fahat-husug laruhu.

¹²Airoho fahat husug lit de ap homi siag ale duruk on en enobabut wereg ale etma hagdoho welahen ha no ulug ohwale hobahakeg, it enambilik famen siag on neg uruk on etma fam en ahayeroho yatma ap hobahakeg duruk karuhu.

¹³It de kobokwe fano on fam lauk ale enerim boruk kwit, kobokwe mumon momal dalug siag ale neg hoporoho wereg.

¹⁴Iren siag duruk ale ai fahet de enonggwareg enahayeg boruk.

¹⁵It kwe bikitdoho lauk fug lit kwasikdoho neg dil lauk.

¹⁶Hat an namloho deg lahenma, hwe siag on en ele ahalue dep-dep fam het-betdoho hobahaikoho lit henda kwelapuk karuhu on aire ele ai hat wauk kam fug.

¹⁷Hwe aire ahun fam dipdoho wereg fug lit Allah fam ele sali isi ale anyo oho apeleg atsi.

¹⁸Hat at obam wirig fil lahun halug de, waratuk mu lahun ale re ai, etma lauk aire kwenangma ap waratuk on laukmu etmano lauk hag.

¹⁹Ap en hwe ai akit lauk on de, sombandoho kobokwe eneluk wereg on fam waharuk on eke wereg fug.

²⁰Aidoho deg ma anggere, namloho hat de ap demdoho on enebut wahun deg, Allah enda boruk ale higitdoho duruk kwit, wereg laruhun.

²¹Ap Allah enda boruk ale higitdoho duruk on halug de, ap enda bekit on wereg laruhu, it ai on de o kwenang TUHAN en sali wat-esasimu etmano wereg lamuhup.

²²Famen de ap onolok ale duruk on mel siag duruk on mel, ai re enanggwenang ma ai etman, Allah en hwik enebik wilibuhu mu, hohol angge yabuk yahoman saroho hwik hauk hagdoho hwik-esahu.