Read Ninia Yali AMSAL 20 Bible Online

AMSAL 20 - Ninia Yali bible

AMSAL 20

¹Ik siomo enepuk on nauk on ai fam de mun morue ale duruk kwit enele amusun siag atuk; ne ap ik siomo enepuk on ai nalug duruk on aire mun morue ale duruk.

²Raja olok de singa ngin balduk hag deg; ap en raja olok ap kwelapuk on aire enonggwareg siahap dobahat-dauk.

³We ap morue on en minggit duk ale enahayeg deg; obabut mit-mot deg ale re suahal ale urukmu en ahayeroho lauk on ai.

⁴Ap yabuk ele ko on en de anggwenang fam yabuk wutuk li wiroho yag-dauk fug halug; anggen balduk li em de at anggwenang fam en di angge su angge bal-da fug alereg.

⁵Ap enendama heraho alere ik bogwe habulig on ele apma erahamu deg hag deg; ap en hwenangguruk ale aire enenda wenggelduk on wareg halug hwenangguruk.

⁶Ap humdoho en uruk kwit nenori wereg ulug uruk; famen de demdoho inim dipdoho wereg on hweag-enebuk alere anggin hum deg.

⁷Omalik de enaknisi fano wereg lit, bekitodoho duruk on wereg halug de mun enenda yuag deg.

⁸At raja ebe wene dipdoho bilinggikoho hweriatuk angge fam hweriatlug de, di ale su ale mun siag on etmano il furoho neg hauk.

⁹Ap en enele uruk kwit; “An siagman loloho wilibik waharihik mu anggere nendare mun horeg welahi uruk a?”

¹⁰Anggin wal hauk on mel huli-huli ilit hauk on nim dahandoho wal hauk on aire; TUHAN mun erim deg.

¹¹Omalik en abut fano bekitdoho duruk ale eneluk atuk aire at duruk fam kumu halug enoluk atuk.

¹²Enesanggo re holduk on fahet wereg inil de fu hauk on fahet wereg; birenet etare TUHAN en neg wal-debesi.

¹³Ap nohoruk ale neg ambonoreg on aire enggik eleg aruhu. Ap yabuk abiroho duruk on ai nauk angge humdoho welaruhu.

¹⁴Onggo hundutuk kwit onggo humdeg en ulug yehei uruk famen; mundoho hundi folug onggo humangge fam hundutsi ale ai fahet awonog atuk.

¹⁵Emas nim no berlian nim onggo along deg boruk on ai sebeleg hag famen; wene enoluk atuk ale ai neg de mun along wereg.

¹⁶Ap eke en ori eke enangge baleg angge an den obalma fohuk en warohon uruk halug; ap ai angge enda lit angge oko foroho lamuhup.

¹⁷Lal heheg heraharuk angge naukmu keram de unduk neg deg famen; fobik de ili angge halik-halok uruk hag atuk.

¹⁸Duhuk ale ulug wene melaloho foruk ale higit atuk aire atam enele mako wil-wal halug duruk fam anggere; wene atam melaloho fouk fug angge en dukohon ulug indip duk fug.

¹⁹Ap eke ap amu on enepug balduk ale ahayeg on en halug de wene eke heraho foruk fug; ap ele humdoho hesangge matuk on nim seberuk fug.

²⁰Ap eke akni isinga wip duruk on halug de oluk longgo uhu aire o hupangge esahe lampu nahul atuk mu o hup bin uruk hag aruhu.

²¹Enangge keram folo-folo kabog-dauk on etma; ambiangma fano angge dopno angge wereg fug.

²²Iren siahap henepukmu hit en oho siahap enebuk fug; TUHAN fam neg henenda dip deberukmu aren let henepuk karuhu.

²³Helep nim ilit angge biren nim hwenaroho ilit duruk on eta TUHAN erim boruk;

²⁴TUHAN en ap homi kwenangma suma kwe lauk kamag ulug debesimu anggere; ai fahet ap homi en eneluk kwe ke lauk ulug eneluk am fug alereg.

²⁵Hat hahummu siag hehen hanore TUHAN fahet wam waroho og-uruhuk ulug hele sali folug halug de owan waroho feik la fug anggere furoho wenggel-halug diyug.

²⁶Raja enda enggat on anyo en de sa endama siag wereg ulug; aren enda esalug fesouk fug angge unggum og-esahu.

²⁷TUHAN en ap homi enenda wenggelduk on enggarap debeserukmu; enebe abirangge fene selehapdoho ename foruk.

²⁸Raja en melal-enepuk kwit de aren enda hundig enebeheg, bekitdoho deheg, dipdoho deheg duruk kaman de; at de along wereg on neg welam alereg.

²⁹Ap sauwe on de omamne wereg fam atlug ap homi yande debeseruk; ne ap sobalon leho feseruk ale aire it mundoho yoman on atswa ma ulug duruk.

³⁰Eke li em de enoluk wereg lit asig anggoloroho hauk on ai fam de enolok wereg on anyo horoho elehap duruk; ne foma re ap homi enenda horuruk.