Read Ninia Yali AMSAL 21 Bible Online

AMSAL 21 - Ninia Yali bible

AMSAL 21

¹Ik wirig atuk on TUHAN enda boruk aleroho lauk kamag ulug hwale foruk hagdoho; raja enda wenggelduk ale dukwag ulug oho TUHAN en neg hwaloho foruk.

²Ap abirengge en duruk ale enonggwareg en hauk kwit fano duruk kahe boruk; famen TUHAN de enendama nunggwe boruk kwit duruk ale oho mundoho fugwi debeseruk.

³Di angge du angge TUHAN obahet foruk ale aire maben hag famen de; dipdoho deheg demdoho deheg duruk ale ai neg de TUHAN endama ahayeg hauk ale duruk.

⁴Ap olok on ai en siag ale duruk aire; leho fahat-dauk on en mel awonog atuk on nim en mel melale forukmu duruk.

⁵Ap enamururu on en duhuk ale ulug wene melaloho foruk ai fam de di angge su angge sig on walug kwik waharuk; ne indip hwale fouk fug angge duruk fam de obok ale lisoho feik kwik waharuk.

⁶Enenggikmu angge hwenaroho hwelauk on etma re, mundoho folo-folo eleg atuk kwit ap enebe og eneplug bohwe ele sal enepuk mu etma lauk.

⁷Ap olok ahun halug wene melaleg higitdoho duruk fug; ne at ai onggwareg olok ai elekwe ouk-bouk hauk ai.

⁸Ap siag duruk on aire kobokwe yaning-hwaningdoho lauk; ne ap fano on ai oluk fano bekitdoho neg duruk kwit wereg.

⁹Olma ohwe suahal angge neg uruk on ai nim misigmu wereg ale oho fano hag famen; enemu o dum ambolman unggutmu etlema wereg ale ai re mun fano.

¹⁰Ao olok ale duruk on ai en siag olok ale duruk ale neg ahayeg boruk mu; ap misig nim ulug oho eke aren enda enusug lit wereg fug.

¹¹Ap siag duruk on fahet unggum og-esauk ale aire it ap owan enapeleg on anyo fureboukwag ulug; ap enda wenggeleg on halug komo dil lauk men de eke nim enggat aruhu.

¹²Allah mun dipdoho neg duruk on anyo en ap Allah enapeleg on enobam etma duruk ale mundoho oluk deg lit wereg. Aren de fobik elehapdoho fesehuk ulug ai neg wenggeleg lit wereg.

¹³Ap eke enengge eleg on en heng uruk kwit yehei uruk on omano holduk ale erim boruk kwit let enepsi fug halug de; at onggwareg fahet neg let nabukwag ulug heng urukmu at oho hwale fohup fug.

¹⁴Ap homi enolok wereg ma mel enahummu ahe wereg ma mel sebeloho belabe feikoho halug de; onggo we ling-long angge og-esakiyug.

¹⁵Bekit deg ale neg duruk halug de ap fano on de enahayeg hauk, famen ap enolok wereg on de nit nenabug balduk ulug hambukdoho wereg fug.

¹⁶Ap enoluk on en enebe fano wereg ale etmanoroho mutlug lauk eleg halug; at kwenangma ap waratuk on wereg ma lauk ai.

¹⁷Ap enahayegdoho wereg on etma re enangge elegdoho neg welamuhup; ne ap ahalue fam anggur fam neg ebereg lit wereg on halug it dung amuhup fug.

¹⁸Ap homi TUHAN en unggum og-esauk li re ap fano on anggolo hauk de fug; ite it ap siag duruk on ai anggolo ngogdoho hauk.

¹⁹Lekma wereg ale aire mun fano; famen ap ohwe ele sahal-sahal neg uruk kwit suahal uruk on nim o misigmu wereg ale aire siag.

²⁰Ap enda wenggeleg on de enangge humdoho atuk mu enenggik wereg atuk; famen ap morue on de angge mun elehap duruk kwit wereg.

²¹Ap eke en dipdoho duruk ale mel enenda hundig duruk ale mel hera duruk kwit halug de; enendama enahayegdoho wereg ale mel mot-enepuk ale mel enebe umur yatdoho wereg on mel hwelauk karuhu.

²²Ap enamenggel mun siag on en de kota ap tentara buk lel on en kahaleg kweleg famen oho bin kuk alereg; aren fak lehet enenda dip debelug wereg angge omano langguk langgakdoho belabuk alereg.

²³Ap eke en anggin on nobam am no ulug ohwal-dauk kwit halug de; ele ohwaloho matuk kamag.

²⁴Ap winik-wonok uruk kwit enda leho fahat-dauk on en de, ele onggo-onggo eheg, mun siag-biag ale deheg, duruk.

²⁵Ap ko on yabuk wutuk ale erim deg; at ambono boruk angge fam onggwareg wat-dauk;

²⁶Nukoho yatdoho at nunggwangge ambono boruk angge anyo neg wenggelduk kwit wereg; famen de ap bekitdoho wereg on en de enangge balu kabogdoho og-esauk.

²⁷TUHAN de it ap At enerim boruk on en obahet folug og-utuk anggere erim deg; ne mun erim deg on de it enendama siahap enepuk ale wenggeleg lit foruk on aire ebenaheg erim duruk.

²⁸Ap seiale on ele fag-duruk on demdoho uruk bouk fug alereg; famen de ap wene atuk ale mun biling balangdoho eneluk degman uruk halug neg de demdoho uruk bouk alereg.

²⁹Ap bekitdoho duruk on en onggwareg deg ale demdoho oluk deg; famen ap siag on de orohole ambum deg.

³⁰At TUHAN olohotman re, oluk on wenggeleg on mel hebeleg on mel, hambuk halug welam fug alereg.

³¹Ap en dog yapuk kwit enangge kuda fam yapuk famen ohore, enalong atuk ale aire TUHAN en neg debesouk alereg.