Read Ninia Yali AMSAL 22 Bible Online

AMSAL 22 - Ninia Yali bible

AMSAL 22

¹Enengge humdoho wereg aire hareg famen enunuk fano wereg ale ai neg de mun along deg; enangge emas mel perak mel fahat dalug aire hareg famen ap homi en enenda hundig enepuk ale ai neg de along deg.

²Ap dungon mel ap kunggu on mel fahet wene indip misig higit on eke wereg; aire TUHAN en it enebe abirangge wal-enepsi ai.

³Ap enggat on en namel mel ale hil lauk kwit hihil atuk; famen ap morue on ha fug angge lauk men neg anggin on anyo obam atuk.

⁴Ap TUHAN fam enda dip deg on de enda sebele fahat deheg enda sebele fahat dalug welaheg duruk on de; at fanoroho wereg lit angge sigdoho wereg ma ap en oho along boruk kamuhup.

⁵Sabu yepdeg on mel sapna mel etma ap siag duruk on fahet belabegma; hat hahap wendat damin boruk kwit halug de kwe ai la fug.

⁶Omalik ai at oluk higitdoho wereg laruhu ale fahet furoho hweag-utuk kamin; at sobal aruhu li oho hweag-utuk karuhun ale anyo higitdoho wereg laruhu.

⁷Ap kunggu on ai ap dungon apma wereg; ap eke angge elamna baleg latmin ulug wasi on ai angge wasi on ai apma wereg.

⁸Ap a siag on yatsi ai anggin on baluhu; ambiangma re at omamne fam melal-enepukmu etma mundoho eleg aruhu.

⁹Ap enda fano on TUHAN en fano apdeberuk karuhu mu; TUHAN en og-utuk angge omano ap anggolo deg on omano og-esauk karuhu ai fam deberuk karuhu.

¹⁰Ap alitno henepuk on ai muko wilibi fesehup fano; wilibi fesehupmu alitno henepuk ale ai mel minggit-manggatdoho selei ap henepuk ale ai mel eleg aruhu.

¹¹Ap eke ele bekitdoho uruk on mel ele ahalue fam uruk on mel; fobik raja are aruhu.

¹²TUHAN de fano duruk on fahet il wereg famen; ap seiale on en ele uruk ale etma re meiyaloho embeseruk.

¹³Ap ko on anyo olma neg wereg ale ahayeg deg lit; aren diroho uruk, “Dagma no singa wereg anggere an kobokweman senggel nabikohoreg” uruk.

¹⁴Hwe hambena on elere bohwe ele yatdoho yendeg hag; ap TUHAN olok amag ulug duruk on de elma etma obuk uruk.

¹⁵Moruwe-morue ale duruk on omano ap sauwe on enendama dopno isi; famen de komo ale enepuk andomuk anyo fam de it enebut siag on etma aham duk alereg.

¹⁶Ap eke dung aruhuk ulug enda boruk on ap enenggik eleg on sebel esalug ap dungon onggo og-esauk fam ambiangma onggwareg alemat atuk.

¹⁷An den hat fam komo ale ap enggat atuk ale hweag-huruhuk ale etma holduk nu ne hweag-huruhuk alere fureberuk nu.

¹⁸An den hweag-huruhuk ale etma hendama herako fahat dahundeg hahayeg hauk karuhun. Airoho duhun fam de haren dimin boruk ale mundoho duhuk ulug foukdoho welaruhun ai.

¹⁹An den ketia hat hweag-hutuk katmin boruk kahi on aire an nenda re haren TUHAN fam henda dik-demdoho on anyo dip debehun ulug boruk kahi.

²⁰Ai fahet de komo ale tiga puluh en an den hat hobahet baldihik angge aire komo ale fano on fureberuk ale mel enggat atuk ale mel fahet baleg wereg;

²¹ne ebe dik-demdoho on de ke ulug hat holuk atuk on fahet mel baleg wereg. Fobik ap en hat hein og-hapuk halug haren onggo furoho hweag-esauk karuhun.

²²Ap kunggu on at omamne elegma ulug alemaroho fesouk fug; ne wene dipdoho ayo wituk mu kabog-dulug ap duk fug alereg on enangge siahap debesouk fug.

²³TUHAN en it inibil atlug inili oko re ap homi kunggu on fam anggin-fanggin feseruk on etma enoluk oko wahu.

²⁴Ap folo-folo amep laharuk on mel folo-folo bet enepuk on mel hinim mang-mangno duk fug.

²⁵Hat airoho duruk men de fobik at abut oho fohun deg eitog ale aruhu mu elehapdoho embesouk fug ale habuhu.

²⁶Ap amu on ombaleg angge an nim baluhuk ulug sali waruk fug.

²⁷Fobik hat en higitdoho fouk fug alereg laruhun halug hat hebe nohoruk kahen angge oho del dalug lahup anggere sali waruk fug.

²⁸Eke salim kwenang henembu henomban huli bale fousa ma omano hihilik lauk kam fug.

²⁹Ap eyabukmu higitdoho duruk on de hat hil hauihin a? Ap aireg on de fobik yabuk de ap hesangge on enobam olma neg duruk karuhu re fug ite ap raja enobam enebe wereg ma omano duruk karuhu.